AMOS 5 - Tupuri Bible

Siŋ lawge ma Israyele

¹ Coʼ we sug wããre sen mokay no, Siŋ lawge sen mokay maga ndi ʼwaa wer ɓe ti ɓay mono, Tiŋ mani Israyel no!

² Á leʼe, day se bay go urgi ciŋ wa so Maytigli ma Israyel maga bay de súuli de jobo wa mono Á de súuli ɓi sir maga diŋ ɓe de see ɓe Jobo kãã ge ma urgi ɓe go ciŋ gà.

³ Werga wãã doo kay nono diŋ Manwuri, ga : Ɓi leege maga raw ge de jar durgi ndar hwale, Maga sen gwaʼge wo mono, joŋ ge wo kisi, Day maga sen raw ge de jar durgi kis mono, Maga sen gwaʼ ge wo ma tiŋ mani Israyeln mono Joŋ ge wo hwale.

Ɗege ɗúu go pel bole, nen maga gaalin mo joŋ go seŋ wa

⁴ Werga wãã ne tiŋ mani Israyeln doo kay nono diŋ Manwuri, Ga kiɗ we ndi, ni nday hay we sugi!

⁵ Wo we kiɗgi Betel wa, Wo we Gilgal wa, Joŋ we nen woge Beer-Seba wa. Werga à raw ge yaŋ de Gilgal fẽd ɓuy Day Betel leʼ ge jag yaŋ go.

⁶ Kiɗ we Manwuri, ni nday joŋ we sugi! Joŋ we hẽẽne, nen maga á mo ɗaw Tiŋ mani Josefn doo wùu no wa, Day wùu sen mo roɗn go, Bay daʼ jobo Betel ni ma ʼwarge ɓe go wa.

⁷ Nday maga nday kol joŋre ma de deelen go diŋ fúudur mono, Day nday ɓoʼ joŋre ma keɗedn go nen sir mono!

⁸ Á joŋ gér gojog wo de gér jar freŋ wo Á kol ngel ma de suŋgun wo go de teege Day fer ngel ma de cegen go diŋ ngel ma de suŋ. Á ɗa bii maarog ma kluurin wo le go, Ma nduugi puggi ɓe go ti siri Manwur diŋ ɗúu ɓe.

⁹ Nduu de joŋre ma de ɓlagge ne Jar maga wo de egre ti diŋ se, Ne ngel ma de egre wo ti.

¹⁰ Á caa wo hee de je maga kaŋ nen ɓaara ti wããre jag tiŋ wo mono, Je maga wãã wããre ti faage ɓe mokay no Saara bay de sãy ɓe ti wa.

¹¹ Doosen nono, diŋ wer maga nday dag je coon go, Day pa nday yãã coore ble ɓen go kado, Nday yaʼ bor tiŋ de húulì ma de ceɗge, Ama, nday lag ge ɓil ɓaara gà. Nday peɗ tlalum ma de woore debaŋ wo, Ama nday jo ge yii ɓaaran gà.

¹² Werga ndi yaŋ mbi de koge ɓe, Re ɓayn raw wo ngaɓa debaŋ Ɓlagge ɓayn raw wo kluuri debaŋ Nday joŋ coo je ma keɗed no, nday coon go, Jag kiida mokay no, nday dig de el mani je coon go,

¹³ Mokay so no, diŋ wersen ga ti wur ma doo Kay kay wo no mono, Ga je ma de tin kal ferge go jag ɓe baʼa. Wer maga wur sen wo diŋ wur ma de ɓlagge wo.

¹⁴ Fer we kiɗgi diŋ de ele, bay diŋ ɓlagge wa, Nen maga nday mo hay sugi, Day doosen ga Manwuri, Baa Pantway Mo hay de ɓay doo maga nday wããn nono.

¹⁵ Caa we hee de ɓlagge, ni nday da we de ele, Joŋ we nen kaŋ joŋre ma de deelen jag tiŋ wãã wããre ngel no, Maapo naa ko ga, tiga Manwuri, Baa Pantway joŋ yaŋ nen ko decoo Ti te jar ni Josef maga gwaʼ wo mo laybla no.

¹⁶ Diŋ wersen so ga, Manwuri, Baa Pantway Waŋkluu, wãã doo kay nono ga : Ti ngeln wo ɓuy tuu, à law ge yaŋ, Ti faagen wo ɓuy, à wãã ge yaŋ ga Uh! Uh! À ɗe ge je jeegen yaŋ le ti roo húulí, Day jar maga wo de ko ʼwad siŋ lawge mono À ɗe ge ra yaŋ le kayge.

¹⁷ Ɓil tlalumn wo ɓuy, à law ge yaŋ, Sen diŋ ti wur maga ndi hee ge we ti holaŋ ɓay no Manwur wãã doosen nono.

Ti Wur maga wur mani Manwur nduu we no

¹⁸ Gaali ti jar maga kiɗ wo naw mani Manwurn mono, Nday gor mayse ti wur mani Manwurn mola? Á joŋ ge diŋ suŋgu, bay diŋ poɗag wa.

¹⁹ Á joŋ ge diŋ doo maga jobo daŋ go pel mingiri, Day kal yiŋgi de này urs, noga doo maga jobo De woge liŋ, kaŋ doo ɓe ti kor no kay mono, Cwe kal loŋge ɓe nono.

²⁰ Sen mokay go tinoo nen ɓay celel ga : Naw mani Manwurn joŋ ge diŋ suŋgu, Ama bay diŋ poɗag wa. Á nà doosen nono, á joŋ ge diŋ suŋgu ma de hãã debaŋ Poɗag joŋ ge ni ceb gà hase!

Tosge Baa maga à bay de sãy ɓe ti wa

²¹ Ndi hee de few ɓay wo no, Á bay wo de cõõre jag ɓi wa.

²² De maga nday nduɗ we de siɗgi jag maga À roɗ mo ɓen go ɓuy me de fẽẽre hãge ɓayn wo no Ndi bay de sãy ɓaara ti wa hase. Siigi jag tayge ɓayn wo mo hãʼ no, Ndi bay de sãy weere deere ɓay ma de goɓren wo ti wa Ndi bay ko rage wa ɓuy yaw.

²³ Yaʼ wo go de ngarge jag siŋ ɓon wo see ɓi Ndi bay laa roo mandilna ɓon wo wa.

²⁴ Ama joŋre ma de deelen wo yuu doo bii nono, Joŋre ma keɗedn mo hay doo bii yuuri maga õg gà nono,

²⁵ Nday hay yaŋ mbay de joŋ siɗ jag wo De hãge wo me nen kiŋgi ma doo naan wo yawla, Jar ni Israyel wo?

²⁶ Maŋ we Sukkud waŋ ɓay no, Wo de Riyun sõõ ɓay no, gér baa ɓay maga nday Hay kneʼn mono!

²⁷ Day ndi hoo ge nday yaŋ wo go hãã faale Damase. Wãã doosen nono diŋ je maga ɗúu ɓe ga Manwuri, Baa Pantway.