AMOS 4 - Tupuri Bible

¹ Coʼ we sug wããre ma kay de ele, nday man deere ma Basan wo, Maga wo ciŋ ti húulì ma Samarin mono, Nday maga nday joŋ coo jar maga fẽẽre ɓaara bay wa mono Nday maga nday ndreɗ jar coo wo go mono, Ga day nday wii werpiiri ɓay wo ga : Á we le de yii naa jo sog la mono!

² Waŋkluu, Manwuri, go de haʼge ti sen ti ɗúu debay ɗag ɓe no : Ko we ɗa : Wurpo a ge wo yaŋ le see ɓay, Ti ngel maga à led ge nday yaŋ le go de teɗebbe, Day à led ge weere ɓay wo yaŋ le go de jawre wo.

³ Nday lag ge yaŋ go de ɗeere, wosela pel ɓe ti mungi tiŋ wo, Day nday leɗ ge yaŋ wo go nen ɓaŋ ti húulì Hermone, Kay diŋ wããre ma jag Manwuri.

Tosge Baa ma lurumlurum

⁴ See we Betel, ni nday joŋ we ɓlagge! See we Gilgal, ni nday joŋ we ɓlagge de daŋge! Joŋ we siɗgi jag wo de jag toŋ Day hã we dim ɓay wo ti kiŋgi swaʼ tum!

⁵ Joŋ we siɗgi jag ma joŋ suseʼ ɓayn wo de tayge de defõõre! ʼWad we ɓay ni nday dus we fẽẽre hãge ɓay maga nday Hã ra de dage ɓay mono! Werga á mo taʼ la diŋ fen maga nday dan mono Jar ni Israyel wo, Kay diŋ jag Manwuri.

Riŋgi go pel bol ma de koɗkoɗe

⁶ Day ma ɓin ndi joŋ nen ɓoʼ koŋne wo ne nday ti, Go ɓi leege ɓayn wo ɓuy, Ti ngel maga nday de lagge ni mo ɓuy hoole pẽẽ daʼ ge ni gà. Mbe de sen ɓuy, nday kãã ma fer ge le see Manwur gà Kay diŋ wããre ma jag Manwuri.

⁷ Day ma ɓi ndi peŋ ge nday de rage baa De maga few hay yaŋ mbe de gwaʼge ni swaʼ ɗa, hãã wo kaŋge go see weege fẽẽren wo mono. Ndi joŋ ge nen ra baa ɓi leege maapo mo taʼ la no, Ndi joŋ ge nen ra baa ɓi leege ma lan wo mo taʼ gà. Pay maapo yaŋ maga baa ra ɓil ɓe, Pay ma lan yaŋ maga baa ra ɓil ɓe gà se hig go.

⁸ Ɓi leege maapo wo ɓog noga swaʼa, Raw wo kiɗ bii ma joge ɓi leege ma la no Day jwaale ɓaaran joŋ ge nen tawge go gà. Mbe de sen ɓuy, nday kãã ma ferge le see ɓi gà. Kay diŋ wããre ma jag Manwuri.

⁹ Ndi kaŋ daʼge way wo ne nday ti de bìrí, Pay sugnee ɓay ma ngaɓan wo, pay tlalum ɓayn wo, pay figiye ɓay wo de Olifiye ɓayn wo no, Degornog hay re wo ra go. Mbe de sen ɓuy, nday kãã ma ferge le see ɓi gà. Kay diŋ wããre ma jag Manwuri.

¹⁰ Ndi hay ɓoʼ bulfũŋ wo ti holaŋ ɓay Doo maga ndi hay joŋ le Ejipte nono, Ndi id weere jõõre ɓayn wo go de moslam, Day ndi men mbi ga jar mo horge piiri ɓay wo no, Ndi hay joŋ ga fõõre no ma de buɗgin mo nduɗ wo Fõɗ nday ti kaŋ ɓay wo no. Mbe de sen ɓuy, nday kãã ma ferge le see ɓi gà. Kay diŋ jag Manwuri

¹¹ Ndi hay brum nday go Doo maga Baa hay joŋ Sodom wo go de Gomor nono, Nday hay doo heege maga à naan le go nen wùu nono. Mbe de sen ɓuy, nday kãã ma ferge le see ɓi gà Kay diŋ wããre ma jag Manwuri.

¹² Diŋ wersen so, mokay diŋ fen maga ndi joŋ ge Nen joŋ ndo de ɓe mono, O Israyele! Day werga ndi joŋ ge ndo doo sen no so mono, Kneʼ see ɓo go ma yiŋgi de Baa ɓo no, O Israyele!

¹³ Werga mo caw diŋ je maga bor húulì wo, Day joŋ leege mono, Á diŋ je maga kaŋ nen je tabay ti ɗiggi ɓe wo mono, Á diŋ je maga kol ngel ma de teege go de suŋgu, Day see go ciŋ ti ngel ma gesiŋ wo mono, Ɗúu ɓe ga Manwuri, Baa Pantway.