AMOS 3 - Tupuri Bible

Jar mani Baan wo nen bag blam wããre go ti fen maga Baa joŋn see ɓaara mono

¹ Jar Israyel wo, coʼ we sug wããre, maga Manwur go de wããge ɓe ti ɓay mokay no : Ti feelen wo ɓuy, Maga ndi cegaɗ le go de ɓaara Ejipte mono.

² Ndi joŋ nen hoo nday le go, diŋ nday tawa, Yoo wer jar ma ti tamsir wo ɓuy Diŋ wersen ga ndi wii gi jag ɓay yaŋ Ti ngel yeɗge ɓay go wo no.

Baa wãã wããre, je ndar nen wããre ɓen kãã ma hayge baʼ gà

³ Jar po maŋ wo mbaara faage yaŋ wer kããra ɓog Bay tay jag go taŋgu pel bol yawla?

⁴ Mingir bũy mbe yaŋ de koɗ yoo koo ga bũy Bay daʼ này pel ɓe ni yawla? Wel mingir ngar mbe jag yaŋ le ɓi tuu ɓen de koɗ ga Ngar bay daʼ mopo yawla?

⁵ Wedwee leʼ mbe yaŋ go gesiŋ de koɗ ga Ga leʼe, de maga mopo bay mbe we de gungi pel ɓe ni wa mo yawla? Saale bày hoo mbe yaŋ go ciŋ ga hoo De maga mopo bay mbe de bagge ni wa mo yawla?

⁶ À ʼwaa mbe coo yaŋ ɓi leege po ga ʼwaa, Ga day jar ma ɓil ɓen joŋ wo hẽẽne yaŋ gà yawla? Gaali nduu mbe yaŋ ɓi leege po, Ga je age de ɓen bay diŋ Manwur wa mono nduu mbe yaŋ yawla?

⁷ Doo kay nono, Waŋkluu, Manwuri, bay joŋ Mopo maga se sii wããre ɓe ma de yoŋren go taŋgu ne Weere jõõre ɓe jar ndar nen wããre ma jag ɓen wo gà nà baywa.

⁸ Mingir de bũygi mono, hẽẽne joŋ wose yaŋ gà la? Waŋkluu, Manwur ti wããre mono, Wose ndar ge nen wããre yaŋ go gà la?

Caage kiida Samari

⁹ Joŋ we nen ʼwad ɓay ma kay ɓi tiŋ waŋre ma Asdodn wo no, Day ɓi tiŋ waŋre ma Ejipte wo no, Ni nday wãã we ga : Tay we ti go Ti húulì ma Samarin wo no. Day ko we mbay ɗa, glubgi mani ɓen kluu mo deŋ ɗa so la? De joŋge coo ma ti holaŋ ɓen wo mo deŋ no!

¹⁰ Á bay wo de ko joŋ mopo ma de deele wa Kay diŋ jag Manwuri, Ɓi tiŋ waŋre ɓaaran wo mono, fẽẽre maga á yãɗ wo ra de waŋ wo de frumgi mono, wo de corge ti kẽẽ kaʼ kaʼa.

¹¹ Diŋ wersen ga Manwur wãã doo kay nono ga : Koɗa, je heen day le! Á go de yiŋ ti sirn ɓuy! Á taw ge egre ɓon go, Á go de frum tiŋ waŋre ɓon wo no.

Wããre «pẽẽge» ma de tog pele

¹² Wãã doo kay nono diŋ Manwuri : Ga de ngaɓge doo maga je koɗ horog yãã ɓaale horog Le go jag mingir ɓoge, Noga yãã sug horog le go jag mingir boŋ no mono, De ngaɓge doo sen no lay ga jar Israyel Maga wo de tiŋ Samari, yãã ge wo le go jag Jar hee ɓaaran wo no. Saara jar maga wo de mbeɗge ti fẽẽre suuli wo De tapi ma Damas won mono.

Riŋgi go taŋgu pel bole

¹³ Coʼ we sug ɓay, ni nday joŋ we Sedewa Ma kay ne tiŋ mani Jakobn ti. Kay diŋ jag Waŋkluu, Manwuri, Baa Pantway no.

¹⁴ Ti wur maga ndi wii gi jag Israyel ga Á mo bag blam wããre go me ti rawge jag ɓi go ɓen wo mono, Ndi wii gi jag ɓe yaŋ ga á mo bag blam wããre go Me ti ngel siigi jag ma Betel wo no, Cõõ ngel siɗ jagn mbug gi wo go, Day leɗ ge wo yaŋ go gesiŋ,

¹⁵ Ndi srog ge tiŋ ma ti ngel ceeren yaŋ go Ne tiŋ ma de ngel tobn ti, Tiŋ waŋre ma de borge de saŋ fẽẽren ɓlag ge wo yaŋ go, Ti ngel sen tiŋ wo debaŋ far ge wo jag yaŋ go, Kay diŋ wããre ma jag Manwuri.