2 TIMOTE 4 - Tupuri Bible

¹ Ndi de kam moge pel Baa lay, pel Yeso Kris maga cag ge re jar ma tenen wo de jar ma de húulín wo lay mono. Ndi de wii moge ti ɗúu age Kris wo de twaywaŋ ɓen gano :

² Sii wããre mani Baan go, wãã ne go de egre, hay bo nen fruygi, hay bo nen bone, siɗ ne jar ga á mo yãɗ wo wããre Kris, ruɗ ra, coɓ nen ɓaara, had ra desãy de ele.

³ Werga wurpo a ge yaŋ le, maga jar day ge wo coʼ sug hadge ma cwãyn gà so, ama á raw ge wo seɗge diŋ wer dage ɓaara de see ɓaara, day tay ge wo jar had jar yaŋ wo le see ɓaara ngaɓa debaŋ ga á mo had wo saara diŋ de re maga coo yaŋ jag saara mono.

⁴ Á coʼge wo sug wããre ma cwãyn gà so hase, kaŋ ge wo nen ɗiggi ɓaara go ɓuy diŋ ti mbaa wo.

⁵ Ama ndo, hay diŋ je ɗaw see ɓo see fẽẽren ɓuy, soɗ mbo bon no, joŋ joŋre siigi Wããre ma de Cõõre no, taw jag joŋre peele ɓo ne Baan go ɓuy.

⁶ Ama ma ɓi, ndi go de hã see ɓi baa jag siigi jag no, naw ɓi a we go ma húulí.

⁷ Ndi dur jaw ma de eln we go, ndi day we go ti ngel ma bag jag ɗee no, ndi ɗaw hãge ɓil ɓi ne Kris we.

⁸ Patala gawraŋ poɗge blum ɓin yaŋ gor mege, Waŋkluu ma cag re de deelen hãn ge me Wur seno. Á hãn ge diŋ me tawa gà ama á hãn ge ne jar maga wo de gor age ɓen mo ɓuy lay.

Bag ge wããre ne Timote boŋ tawa

⁹ Kiɗ faage ma age le see ɓi deparday.

¹⁰ Werga Demas men me go wer cõõre fẽẽre ma ti tamsir ma patala no : á raw Tesaloniggi. Kresaŋ raw Galad, Tid raw Dalmasi lay.

¹¹ Gwaʼ see ɓi la diŋ Lug boŋ. Baa Mark le wer ɓo, werga á kay me yaŋ ti joŋ re ɓi no.

¹² Ndi ɓoʼ Ticig wo go Efese.

¹³ De maga ndo leʼ we le age no, ni ndo hoo õõbe ɓi ma kluu maga ndi hay menn le Trowas ni Karpus le me doo, maŋ kefdern le me lay, daŋge ɓuy diŋ kefder ma de hõõge ma de waŋgen wo no.

¹⁴ Aleksaŋder je toogen joŋ me de ɓlagge debaŋ, ama Waŋkluu poɗ ne yaŋ ti joŋre ɓe maga á joŋn mono.

¹⁵ Ndo lay, koɗ see ɓo doo ɓe, werga á go de giŋgi de faare ti re maga naa de siɗgi ɓe go mo ɓuy no.

¹⁶ Ti ferge wããre ɓi go ti see ɓi jag kiida ma taŋgun mokay, jobo boŋ laa ooge see ɓi ni boŋ gà á men wo ndi go ɓuy. Daga Baa mo kee ɓlagge sen mokay ne hara ti wa.

¹⁷ Waŋkluu raw ɗaw mege doo ɓe, raw coɓ nen ɓi maga ndi mo siɗ wããren go de egre, jar maga bay wo diŋ jar Jwif wa mo ɓuy mo laa wo ne, day ndi raw yããge le go jag mingir no.

¹⁸ Waŋkluu yãã ge me yaŋ go jag re se ma de ɓlaggen wo ɓuy, wo ge yaŋ go hay mege pel ɓe ti twaywaŋ ɓe ma ciŋ no. Á mo hay de togoɗge wo tum sagsage! Amen!

Herge jag ma blam no

¹⁹ Hee jag ne Prisil wo de Akilase, hee jag ne jar ni Onesifor wo lay.

²⁰ Eraste gwaʼ le go Korente, day ndi raw men Trofim le Mile lay, werga á hay de cegè.

²¹ Kiɗ faage ma age le deparday taŋgu ngel yaale no. Ewbulus, Pudense, Linusi, Klodiya wo de hẽẽre naa lan wo ɓuy her wo jag wo mo.

²² Daga Waŋkluu mo hay de ɗiggi ɓo! Daga Baa mo woo we! Amen!