2 TIMOTE 3 - Tupuri Bible

Naw ma blam wo no

¹ Fer ɗig ti wããre sen mokay no, gaali joŋ yaŋ wo debaŋ ti wur naw ma blam wo wo mono.

² Werga jar téebeere kol ge wo yaŋ ɗiggi diŋ ti see ɓaara tawa tawa, da wo solay debaŋ, far wo ti see ɓaara ciŋ, keɗ wo see ɓaara, ɗar ge wo Baa yaŋ, day wo yãɗ jag pan ɓaara wo de man ɓaara wo ge gà keɗ wo jar jag gà day ge wo horge sug ti fẽẽre ma Baa gà.

³ Kol ge wo graŋ, ko wo de coo jobo gà car wo re ne jar see, joŋ wo re pad pade, joŋ wo de hãã, joŋ wo hee de fẽẽre ma de el wo ɓuy.

⁴ Kol wo lag cogob ne jar ti, joŋ wo go hãy hãy, keɗ wo see ɓaara, da wo joŋ fẽẽre ma fruy see ɓaara de daŋ Baa yaw,

⁵ ko wo doo ga saara de ɗaw hãge ɓil maga naa hãn ne Yeso Kris mono, paga go jag ɓaara la tawa, ama á men wo egre ma cwãyn go. Ɗee see ɓo go see jar sen wo.

⁶ Jar po yoo ɓaara raw wo raŋ tiŋ wo, kaŋ wo cee ne naare maga bay wo de ti wa ti, ma joŋ ɓlagge de ɓaara, kog ra wo wer ma joŋ fẽẽre maga ɓil ɓaara da ra wo wer sar sar debaŋ,

⁷ diŋ naare maga kiɗ wo tum ga saara mo hade, ama day wo go ti koge ma cwãyn gà mono.

⁸ De ngaɓge doo ga Janes wo de Jambres hay giŋ wo Moyis de faare nono. Jar sen giŋ wo cwãyn ge doosen no lay. Á wo diŋ jar maga ɗiggi ɓaara go de ɓlagge, jar maga hãge ɓil ɓaara ne Kris maŋ mopo gà mono.

⁹ Ama á see ge wo wo pel gà werga jar ko rage yaŋ go ɓuy ga á wo diŋ jar loɗge, doo ga jar se ɓogn hay joŋ wo no lay.

Bag ge wããre ma blam taw no

¹⁰ Ama ndo, ndo hay ko faage maga ndi hay hadge de ɓe, seele ɓi no, ɗiggi ɓi maga ndi go de bag jag ɓaara mono, de hãge ɓil ɓi no, ɗawge see ɓi no, dage ɓi wo de oole ɓi ngiŋ no,

¹¹ joŋge bon maga à joŋ bon ɓin wo de bon ɓi no. Ndo yaŋ de ko fen maga daʼ me le Antiyos, Ikoniyum, Listre de joŋge bon maga ndi soɗ ra le ni mono. Á ma, de sen ɓuy, Waŋkluu yãɗ me le go jag ɓaara ɓuy.

¹² Wersen, jar maga da wo ga saara mo see ti faage Baa de deele de tayge de Yeso Kris mokay, à joŋ ge coo ɓaara yaŋ.

¹³ Ama ma jar ma de ɓlaggen wo de jar car geteʼ wo, sen mbuɗ gi wo nen ɓaara yaŋ tum joŋge diŋ ɓlagge no, á yeɗ ge wo jar po wo yaŋ go, day yeɗ ge wo see ɓaara go lay.

¹⁴ Ma ɓo mono, hay ngiŋ ti re maga ndo hay laa ne, day ndo yããn mo ɓuy de egre. Ndo yaŋ de ko jar had moge de wããre sen wo no.

¹⁵ Le ti klee ɓo ɓaa, ndo yaŋ de ko Wããre Baa maga à yern go, day wo de kããge ma hã koge re mo, ma woge de ɓo daʼ pẽẽge mono wer hãge ɓil ne Yeso Kris mono.

¹⁶ Wããre sen ɓuy à yer diŋ de egre Nenterse Baa, day se de el ma had cwãy no, ma coo ɗiggi maga bay ti ngel ɓe wa, ma kneʼ re ma de ɓlaggen wo, ma had jar de seele ma de deele no,

¹⁷ nen maga je mani Baan mo hay go de grag see ɓe ti ngel ɓe keɗed ma joŋ joŋre ma de eln wo ɓuy.