2 TIMOTE 2 - Tupuri Bible

Je soode Yeso Kris maga ndar gog gà

¹ Ndo wel ɓi no, oo de egre wer woore maga naa daʼn de tayge de Yeso Kris mono.

² Wããre maga ndo hay laan jag ɓi wããge go pel jar sedewa debaŋ deŋ mokay, hãn ne jar maga ndar wo gog gà day wo de see ɓaara de kããge ma had jar tigriŋ wo de ɓe lay mono.

³ Tay see ɓo joŋ bon de ɓi doo je soode Yeso Kris ma de eln nono.

⁴ Je soode maga da we ga se mo hay nen je kluu ɓen de el no, á yõõ ti go ti joŋre ma ɓe de see ɓe gà.

⁵ Je ɗee maga wo ngaɓ jag ɗee daʼ poɗge mokay diŋ ga á ɗee ti faage ɓe.

⁶ Je jeege maga joŋ bon ti joŋre debaŋ nen hoo fen ma de ruggi taŋgun diŋ se.

⁷ Ɗig ti wããre maga ndi wãã mokay no, werga Waŋkluu kol mo yaŋ laɗ wer fẽẽren wo ɓuy.

⁸ Fer ɗig ti ti Yeso Kris moo Dafid maga bir le go yoo jar ma de húulí wo doo Wããre ma de Cõõre maga ndi de siɗgi ɓe go no mono.

⁹ Ndi de joŋ bone, ndi de baŋge doo je joŋ ɓlagge no mono diŋ werga ndi de siɗ Wããre ma de Cõõren go mono. Á ma, wããre mani Baa bay de baŋge wa ane.

¹⁰ Ndi de soɗ bon mo deŋ ɓuy diŋ wer jar maga Baa hoo ra go mono, nen maga Yeso Kris mo yãã ra go, mo grag ra de togoɗge maga taw gàn lay.

¹¹ Wããre sen mokay cwãy, Hayga naa huɗ we de ɓe no, naa lag yaŋ tenen de ɓe lay.

¹² Hayga naa lag we ngiŋ no, ni naa wo ge yaŋ lagge de ɓe ti ngel maga á wo ge hay Waŋ ni mo lay, Hayga naa tobn we go, day se wo ge tob naa go lay.

¹³ Hayga naa yaŋ ndar gog no, ɓen á ndar gog gà Werga á cor wããre ɓen gà.

Je joŋre ma de kããge no

¹⁴ Fer ɓoɗ sug jar ti re sen wo ɓuy, wii ra pel Baa ga á mo leɗ wo kããra ti re ma meʼ meʼ wo wa. Werga leɗge kããra maŋ mopo ne jobo gà ama, á ɓlag go diŋ jar maga wo de coʼ sug ɓaara mono.

¹⁵ Joŋ see ɓo go de kããge ti joŋre maga Baa hãn mo ma joŋge de el doo je joŋre maga bay de sõõre ti joŋre ɓen wa, sii wããre ma cwãyn go ti ngel ɓe keɗed nono.

¹⁶ Faare ma de loɗge maga tay wo de hãge ɓil ne Yeso Kris gà mono, men sen wo go. Jar maga joŋ wo ne, seɗ ge wo mbaara wo tum nen ɓlagge daŋge daŋge, men wo Baa go.

¹⁷ Fẽẽre maga á hadn wo wo ge joŋge doo wããge gwẽẽ maga seɗ de pel de pel nono. Himene wo de Filed wo yoo jar sen wo ni lay.

¹⁸ Á hay men wo cwãy go, day raw wo fer hãge ɓil jar po wo go blam debaŋ ga naa go patala ti wur laage jar go ciŋ yaw.

¹⁹ De sen ɓuy húulì maga Baa ɓoʼ wer tiŋn de ɓe mbe de gwaʼge tiʼ ti ngel ɓe, wããre ɓe ma wer ɓen go de kaŋ lamba ti kaŋge ga : Waŋkluu de ko jar ma ɓen wo, day pa, Wosela ɓuy maga ɗe ɗúu Waŋkluu we no, á mo men joŋre mani naŋ gàn go.

²⁰ À daʼ liŋ ni jobo bay diŋ hãn boo biŋni wo de hãn boo solay wo tawa wa, hãn koo wo de gosoŋge pãy joŋ wo ni lay. Ma taŋgun wo ma joŋ joŋre ma tigriŋ wo sara, à joŋ ma de ɓogn wo ma joŋ joŋre mbe ɓuy koɗ lay.

²¹ Hayga jobo fãã see ɓe we go de el no, á joŋ ge yaŋ diŋ fen ma ti joŋre ma sara no, diŋ je maga de el nen je kluu ɓe no, de kããge ma joŋ wer joŋre ma de eln wo ɓuy.

²² Men ɗiggi jõõ ma preɗ mogen go, kiɗ diŋ joŋge de deele, hãge ɓil ne Krisi, dage, hayge jam de jar maga ɓil ɓaara bay ɗag mono, diŋ tosge ɗe ɗúu Waŋkluu go de jiili ma de el no.

²³ Ama faare ma de loɗge maga maŋ mopo ne jobo po gà mono, men sen go. Ndo yaŋ de koge ga faare sen wo go taw ge diŋ de leɗge kããra.

²⁴ Day, nen daga wejõõ Waŋkluu mo hay leɗ kããra de jar wa. Á mo hay da jar ɓuy, mo hay de kããge ma had jare, mo hay ɗaw see ɓe.

²⁵ Á mo hay had jar maga joŋ wo faare de ɓe desãy ga tiga Baa hã faage yaŋ ne hara ma coo seele ɓaara ga á mo ko wo cwãyn layblaʼ la,

²⁶ noga ti ɓaara fer yaŋ le se kẽẽ, day saara yãã yaŋ go jag rẽw mani Manhúulí maga á bag ra de ɓe seege wer dage ɓen mo layblaʼ no.