2 TIMOTE 1 - Tupuri Bible

Heege jage

¹ Wããre sen mokay yer diŋ ndi Pol maga diŋ je peele Yeso Kris ti dage ma Baa, ndi maga à de ɓoʼ mege siɗ wããre ti tenen maga naa daʼn de tayge de Yeso Krisi, tenen se ga Baa hay wãã go ti ɓe mono.

² Ndi hãn wo ne Timote, wel dage ɓi no. Daga Baa Pããben wo de Waŋkluu naa Yeso Kris mo woo wo ndo, mo ko wo decoo ɓo, mo hã wo jam ne ndo.

Joŋge suseʼ wo de wããre coɓge nene

³ Ndi joŋ suseʼ ne Baa maga ndi de joŋ peele ne hẽn de ɗiggi ma bay ɗag doo ga moore ɓi hay joŋn wo le no lay mono. Ndi yaŋ tosge tum de suŋ lay, de ceg lay ti ɓo,

⁴ werga ndi fer ɗig ti ti mberbe ɓon wo, day ndi de dage debaŋ ga ndi mo yiŋ nen de ɓo maga ɓil ɓi mo fug go feh fehe.

⁵ Ti ɓi de kaŋge tum ti hãge ɓil ɓo ma cwãy no, diŋ hãge ɓil se maga kaa ɓo Lowis wo de man ɓo Ewnis hay wo le de ɓe taŋgu ɓo mono. Ndi de koge cwãy ga ndo yaŋ de hã ɓil ɓo doosen no lay.

⁶ Diŋ wersen so, ndi wo de riŋ ndo ga baa wùu joŋre maga Baa hay hãn mo ti wur maga ndi hay kaŋ doo mo ti mono.

⁷ Werga, Nenterse maga Baa hãn ne naa mokay bay ma fer naa go de pãy wa, ama Baa hã ne naa diŋ Nenterse egre, dage kããra wo de koge re.

⁸ Joŋ sõõre ti joŋge sedewa go ti Waŋkluu naan wa lay, ti ɓi je ma ti daŋgay wer ɓen wa lay. Tay joŋ bon de ɓi ti Wããre ma de Cõõren de egre maga Baa hãn mo mono.

⁹ Á diŋ je maga yãã naa go mono. Á ɗe naa le go ga naa mo kol go jar ɓe bay wer joŋre ma de el po ga naa joŋn wa, ama diŋ wer ɗiggi ɓe de see ɓe wo de dage mani ɓe no, diŋ wer ɓil de el ɓe maga á joŋn ti naa de Yeso Kris le go taŋgu ɓaa hãã mono.

¹⁰ Á raw naa nen ɓil de el sen go ne naa patala diŋ de age Yeso Kris Je yãã naa go no, Yeso Kris maga taw egre húulín go day raw naa nen tenen maga taw gàn wo de debay húulín go ne naa de Wããre ma de Cõõren mono.

¹¹ Baa raw ɓoʼ mege diŋ je ʼwad ɓay Wããre se ma de Cõõren go, diŋ je hadge ɓe ne jar lay.

¹² Diŋ wersen so ga ndi soɗ mbi bon ti re sen wo mo deŋ ɓuy mono. Sõõre bay joŋ ndi ti sen wa werga ndi de ko je maga ndi de hã ɓil ɓi ne hẽn mono, day ndi de koge cwãy ga á de kããge ma ɗaw har ɓi, hãã go ti Wur seno.

¹³ Ɗaw wããre ma cwãyn maga ndi hay yaʼ jag ɓaara mo de el de oole ti hãge ɓiln wo de dage maga de tay naa de Yeso Kris mono.

¹⁴ Ɗaw hadge ma de el maga à hãn mo doo de egre Nenterse ma bay ɗag maga de hayle ɓil naa mono.

¹⁵ Ndo yaŋ de koge ga jar ma ɓi sir Asin ɓuy men wo ndi go, yoo jar sen wo diŋ Fijel wo de Hermojene.

¹⁶ Daga Waŋkluu mo naa nen dage ɓen go ti jar ni Onesifor wo, werga á hay coɓ nen ɓi we ceɓ lay, day geyam ɓin horge wo see ne hẽn gà lay.

¹⁷ De maga á hay a Rom mokay, se raw kiɗ mege de debaŋ debaŋ, hãã wo daʼ mege.

¹⁸ Daga Waŋkluu mo woo ne wo see Waŋkluu ti Wur seno. Ndo yaŋ mbo de ko joŋre maga á joŋn see ɓi le Efes go de el de daŋ wosela ɓuy.