2 PIYER 1 - Tupuri Bible

Piyer hee jag ne Jare

¹ Wããre sen mokay yer diŋ ndi Simoŋ Piyere, ndi diŋ wejõõ Yeso Kris de ɓoʼ mege siɗ wããre ɓen go ne jar mono. Hãn wo ne jar maga hã wo see ɓaara go ne Yeso Kris ɓil boŋ wer de deele Baa wo de Yeso Kris doo naa no lay mono.

² Daga Baa mo woo we, mo hã jam we debaŋ, wer koge ɓay maga nday ko Baa wo de Yeso Kris Waŋ naan mono.

Baa ɗe jare, raw far rage

³ Baa hã egre ɓen we ne naa maga naa mo daɗ fẽẽre ma de el wo ɓuy, maga naa mo lag de saʼ see naa de Baa, kaŋ nen naa we ti je maga ɗe naa le go ga naa mo tay de ɓe ti grag ge ɓe ma de woore wo de de el ɓe no.

⁴ Diŋ wersen á raw tay jag de naa de el de woore debaŋ ga se hã mopo yaŋ ne naa, maga day wo ge we daʼ fen maga á wãã ga se hãn we we, nday mo daŋ re ma ɓlag jar go, ga de joŋ waŋ ti tamsir lam, nday mo tay go diŋ de Baa.

⁵ Wersen dur we debaŋ ga nday mo kaŋ seele ma de el jag hãge ɓil ɓay ne Baa ni, kaŋ koge re ti seele ma de eln no.

⁶ Dur we debaŋ lay ga nday mo kaŋ diggi see ɓay de see ɓay jag koge re no, kaŋ ɗawge see desãy jag diggi see ɓay de see ɓay no, kaŋ saʼ ge see ɓay de Baa ti ɗawge see desãy no.

⁷ Blam sen ɓuy, kaŋ we tay ge de kããra doo hẽẽreben jag saʼ ge see ɓay de Baa no, jag tay ge ɓay de kããra doo hẽẽreben, kaŋ we dage ni.

⁸ Mo deŋ ɓuy diŋ re maga nday mo joŋ doosen no, day hayga nday yaŋ joŋge doosen no, ni re sen kol we yaŋ joŋ joŋre de el debaŋ ti koge ɓay maga nday ko Waŋkluu naa Yeso Kris mono.

⁹ Ama je maga bay we de re sen mokay ɓil wa, nen ɓe ko go hãã hãã gà á doo je rẽwn no, ɓlagge ɓe maga yog le go ɓaa, ti ɓe yõõn go.

¹⁰ Diŋ wersen hẽẽre ɓi, dur we debaŋ ma saʼ see ɓay de egre ti ɗúu maga Baa ɗe we le, de far ge maga á far we le go mono. Hayga nday yaŋ joŋge diŋ doosen, ni nday leɗ nen ɓlagge gà hase.

¹¹ Wersen Baa hã faage we bul ma woge laa ge ti ngel maga je yãã naa go Yeso Kris Waŋkluu hay Waŋ ni tum mono.

¹² Diŋ wersen ndi fer ɓoɗ sug ɓay ti fẽẽre sen wo tum tum, ko de maga nday mbay go de ko ge ɓe, ndi siɗn we maga nday mo la g de egre ti kidolgi maga nday daʼ ne mono.

¹³ Ama ndi da ga ndi pũy we go de ɓoɗ ge sug bay ti fẽẽre sen de maga ndi yaŋ wara tenen ɗa mono.

¹⁴ Werga ndi de koge ga ndi men ge see ɓi se ma de húulín la yaŋ go gusi, doo maga Waŋkluu naa Yeso Kris naa nen ɓe go me nono.

¹⁵ Diŋ wersen ndi de dur gi debaŋ ga ndi mo men fẽẽre sen wo we maga nday mo gwaʼ ɗig ti ɓaara blam húulí ɓi.

Jar maga ko wo woore Krisi

¹⁶ Wersen wùr bay de lagge diŋ ti mbaa wo de ɗiggi koge re po maga wùr ɗign de see wùr ma kaŋ nen ɓay ti a ge Waŋkluu naa Yeso Kris maga á fer ge le de egren mo wa, ama wùr kon de gragge de woore de nen wùri.

¹⁷ Werga Baa Pããben gragn de woore nen wùri, raw togoɗ ge ɓe le nen sagge ɓe se de Wooren ga : Je ma deŋ mo deŋ diŋ Wel ɓi, ndi dan debaŋ, ɓil ɓi go ti ɓe feh.

¹⁸ Wùr laa gẽẽge se ga a le ciŋ de sug wùr de maga wùr hay le ciŋ ti húulì ma bay ɗagn de kããra mono.

¹⁹ Wersen wùr de koge ga wããre maga jar siɗ wããre ma jag Baa go hay wãɗ wo á cwãy. Wersen, joŋ we see ɓay de ele, wããre sen doo gér maga ler ngel go de suŋ, hãã ngel wo le go kos tee ge, maga waa ma ndar ge de jag toŋ mo ler ngel go we jiili.

²⁰ Ko we re ma kay go taŋgu ɓuy ga jobo ɓoɗ wer wããre Baa ma de siɗgi ɓil kefder ɓen go de ɗiggi ɓe gà.

²¹ Werga siɗ gi wããre Baa po bay le de a ge boŋ de ɗiggi je tabay wa hase, ama kay jar téebeere wo siɗ wããre Baa diŋ Nenterse ma bay ɗag de see ɓe.