2 KRONIG 36 - Tupuri Bible

Jowahas kol ti waŋ : Yehoyakim wo de Yehoyakin

¹ Ngaɓa ma ɓi sirn kal wo baa Yowahas je ni Josiyas no, raw kaŋge ɓe waŋ ti ngel pan ɓe Jerusalem.

² Kiŋgi Yowahas hay doo ɓog ti swaʼa, de maga á kol ti waŋ mono, day á kal joŋ waŋ Jerusalem few swaʼa.

³ Waŋ Ejipte kal age sroge ɓe go ti paale waŋn Jerusalem ni doga tuu, kal yãã targe doo sir Juda boo solay nen maŋ kelew ndar swaʼa, de boo biŋni nen maŋ kelew doo swaʼa.

⁴ Waŋ Ejipte kal kaŋ Elyakim hẽn Yowahasn waŋ ti Juda wo de Jerusalem, day kal coo ɗúu ɓe ga Yehoyakim. Neko kal baa hẽn ɓe Yowahas kal rawge de ɓe Ejipte.

⁵ Kiŋgi Yehoyakim hay doo ɓog ti dwee de maga á kol ti waŋ mono, day á kal joŋ waŋ Jerusalem kiŋgi hwal ti boŋ. Á joŋ fen ma de ɓlagge nen Manwuri, Baa ɓe no.

⁶ Nebukadnesar waŋ Babilon kal nduugi leʼge ɓe, day kal ɓoʼ dala ɓe de boo dobe ma woge de ɓe Babilone.

⁷ Nebukadnesar kal hoo fẽẽre ma ɓi tiŋ mani Manwur no, kal rawge de ɓaara Babilon ma laage ɓi tiŋ waŋ wo go Babilone.

⁸ Te joŋre Yehoyakim wo no, fẽẽre horgese maga á joŋ ne, de fen maga hay see ɓe mono, sen wo de yerge ɓil kefder waŋre ma Israyel wo de ma Juda. Je ni ɓe Yehoyakin kal joŋ waŋ ti ngel ɓe.

⁹ Kiŋgi Yehoyakin hay nenmaʼa, de maga á kol ti waŋ mono, day kal joŋ waŋ Jerusalem few swaʼ de naw ti hwale. Á joŋ fen ma de ɓlagge nen Manwuri.

¹⁰ De maga kiŋgi ma defayn kos go mono, waŋ Nebukadnesar kal rawge de ɓe Babilon de fẽẽre ma de woore ma ɓi tiŋ mani Manwurn wo. Á kal kaŋ Sedesiyas hẽn Yehoyakimn waŋ ti Juda wo de Jerusalem.

Sedesiyas kol ti waŋ, à yãã Jerusalem go

¹¹ Kiŋgi Sedesiyas hay doo ɓog ti boŋ de maga á kol ti waŋ mono, day á kal joŋ waŋ Jerusalem kiŋgi hwal ti boŋ.

¹² Á joŋ fen ma de ɓlagge nen Manwuri, Baa ɓe no. Á laa dayge fer ti see ɓe gesiŋ pel Jermi je ndar nen wããre ma jag Baa gon gà maga hay wãɗ wããre ti jag Manwur mono.

¹³ Á joŋ mokay giŋ waŋ Nebukadnesar draʼ lay maga hay wiin ga á mo hãʼ go ti ɗúu Baa mono. Á deŋ gor ɓe go, dweɗ jiili ɓe go, hay nen maga se fer le see Manwuri, Baa mani Israyel no.

¹⁴ Waŋre jar siɗ jagn wo ɓuy, de ngaɓan ɓuy dus wo joŋ joŋre ndarge gog ma de hãã debaŋ, joŋ wo fẽẽre horge see te mani wer jar wo no. Á dem wo tiŋ mani Manwur maga saara hay fããn go Jerusalem mono go.

¹⁵ Manwuri, Baa mani pããre ɓaaran wo hay lag jar peele wo le ma riŋ rage go pel bol gus tuu yaw, werga á hay de sãy maga se mo ɗaw jar sen wo ti ngel lagge ɓaaran ni.

¹⁶ Ama á hay wo fegge ti jar peele Baa wo no, á hay mbuɗ wo foo wããre ɓaara no, feg wo ti jar ndar nen wããre ɓen ɓe go sen wo no, hãã nen maga tĩĩgi go de waŋ mani Manwurn joŋ nen urgi le ti jar ɓen wo no, day saŋgu ɓe laa daʼge gà so.

¹⁷ Doo kay nono, Manwur kal nduugi de waŋ jar Kalde wo ne hara ti day kal id weere jõõre ɓaara wo go ɓi tiŋ Baa ɓaara no. Á kãã wo ma men wel ma jõõn gà men wo maytigli gà ko je ma de tããbe no, ko hayba bloo ma ti de puy kaŋkaŋ no, saara men maapo gà. Manwur hã ra go ne hara doo ɓuy.

¹⁸ Nebukadnesar hoo fẽẽre ma de woore ma ɓi tiŋ Baan wo wo go Babilon ɓuy, ma kleere wo de ma kluuri wo, horog ma ɓi tiŋ mani Manwur no, horog ma liŋ ni waŋn wo de mani minisdir ɓen wo no.

¹⁹ Á roɗ wo tiŋ Baan go, mbuɗ wo kor ma ti Jerusalemn go. Roɗ wo tiŋ mani waŋren wo go, ɓlag wo fẽẽre ma de wooren wo go ɓuy.

²⁰ Nebukadnesar hoo jar maga gwaʼ wo tenen jag jaw mo ɓuy wo go Babilone, day saara kol seege wer ɓe gebeere, gebeere weere ɓe wo lay, hãã go ti wur maga jar Perse kol wo wãã wããre ngeln de twaywaŋ ma ɓaara mono,

²¹ nen maga wããre maga Manwur hay wããn ne Jermi jag mono mo leʼ jag go. Sirn gwaʼ ge yaŋ go de tobge nen kiŋgi doo renam, hãã nen maga kiŋgi iggi ɓen mo baa wo jag go, ma poɗge go ti ngel iggi maga à hay horge sug le ti sen wo gà mono.

Sirus hã faage ma boo tiŋ Baa no

²² Nen kiŋgi ma taŋgu mani Sirus waŋ Persen mono, nen maga wããre maga Manwur hay wããn go ne Jermi jag mo leʼ jag go mono, Manwur kal pũy ɗiggi Sirus waŋ Perse go, maga á mo wãã wããre ma kay go jag ciŋ kloŋ de yerge wo go ti twaywaŋ ɓen ɓuy.

²³ Wãã doo kay nono diŋ Sirus waŋ Perse : Ga Manwuri, Baa ma ciŋn hã waŋre ma gesiŋn wo la ɓuy go ne ndi, day á hã joŋre maga ndi mo wo boo tiŋ ne se Jerusalem ti ɓaŋ Juda me doo. Jar maga wo yoo ɓay diŋ jar ɓe mono diŋ wose wo la? Daga Manwuri, Baa ɓen mo hay de ɓe, day á mo see mbe!