1 TIMOTE 6 - Tupuri Bible

¹ Jar maga wo diŋ gebeere mo ɓuy, mo ko wo waŋre ɓaaran wo de kããge ma horge sug ti ɓuy, nen maga jobo mo ɗar ɗúu Baa wa lay, mo ɗar hadge naan wa lay.

² Gebeere maga waŋre ɓaaran wo diŋ jar ma ti jag Baa mo men wo horge sug ti ɓaara go ga saara diŋ hẽẽre kããra nà wa. De el ɓen á mo joŋ wo joŋre ne hara de el daŋge pa so yaw werga á wo de kayge de joŋre ɓaaran wo nà diŋ jar ma ti jag Baa se maga á da ra wo mono.

Hadge maga bay ti ngel ɓe wa, wo de horog ma cwãy no

³ Mokay diŋ re maga ndo nen hadge ɓe, ndo nen siigi ɓe go mo so no. Hayga jobo yaŋ had hadge ma tigriŋ, day bay we seege de tayge de wããre ma cwãy mani Waŋkluu naa Yeso Kris wa, noga de tayge de hadge jag Baa naan wa lay no,

⁴ ni je sen diŋ je kee see ɓe mbe koɗe. Á bay de ko mopo wa hase, cege faare wo de leɗge kããra de jar ti wããre ma meʼ meʼ wo de bagge ɓe. Day wo ge laage le go yoo wããre sen wo diŋ huni, carge ɓili, lag cogobe, ɗiggi ma de ɓlagge,

⁵ diŋ faare maga taw gà yoo jar maga ɗiggi ɓaara go de dĩɗgi ga bay wo de ko cwãy wa so mono. Á ɗig wo ɓaaran ga jag Baa diŋ faage maga à daʼ fẽẽre ni.

⁶ Ti cwãy ɓe, jag Baa diŋ daʼge ma kluu mbe, hayga ɓil je sen yaŋ go feh ti fen maga sen go doo ɓe mono.

⁷ Naa bay le de age ti tamsir la de mopo doo wa, day naa raw ge de mopo doo gà pa.

⁸ Wersen so, hayga naa yaŋ daɗ rege wo de õõbe ma ti naa wo no, ni sen kãã mbaara naa we maʼa.

⁹ Ama jar maga da wo ɓaaran ga saara mo kol de hurma mono, sen leɗ ge wo nen re jãɗge. Á bag ge wo go ti rẽw de ɗiggi ma de loɗge ma de ɓlagge debaŋ maga srog wer jar go basge yeɗge mono.

¹⁰ Werga dage solay mokay diŋ kããge ɓlaggen wo ɓuy. Jar po hay da wo we ga saara mo daɗ ne doosen nono, day saara men wo hãge ɓil ɓaara ne Kris go hãã, kol wo car jiili ɓaara go de lawge debaŋ.

Wããre maga Pol bag ne Timote boŋ tawa

¹¹ Ama ndo je mani Baa no, ɗee go see re sen wo ɓuy. Kiɗ diŋ joŋge de deele, saʼge see ɓo see Baa, hãge ɓil ɓo ne hẽne, dage, ɗawge see ɓo ngiŋ, ɗaw see ɓo desãyn lay.

¹² Dur jaw ma ti hã ɓil ne Krisn de woore. Ɗaw faage ma tenen maga taw gà no, werga Baa ɗe mo le ti faage sen ti wur maga ndo hay wãã go ti hãge ɓil ɓo de el pel jar sedewa wo debaŋ deŋ mono.

¹³ Pel Baa ma ɗaw fẽẽren wo tenen ɓuy no, pel Yeso Kris maga joŋ sedewa go ti see ɓe pel Poŋse Pilad de wããre ma de eln mono, ndi de wii moge gana :

¹⁴ Ɗaw wããre jag liŋgin de el bay ɗage, bay re ti lay, hãã go ti wur maga Waŋkluu naa Yeso Kris wo le naa nen mono.

¹⁵ Wo ge go naa nen ɓe ti wur maga go de ngaɓge nà diŋ Baa Waŋ ma boŋ ma de gragge de woore no, Waŋ waŋre lan wo no, Waŋkluu waŋre kluuri lan wo no.

¹⁶ Á mbe ni ne boŋ kay diŋ je maga huu gà á de hayle nen ngel maga go de lerge day jobo wo ni gà jobo bay de koge ɓe ti boŋ wa, day jobo kãã ma koge ɓe gà lay mono. Rage ɗúu no, egre maga taw gà no, ɓuy mokay wo diŋ ma ɓe! Amen!

¹⁷ Riŋ jar maga wo de horog ti tamsir la ga á mo maŋ wo ti see ɓaara ciŋ wa. Riŋ ra ga á mo kaŋ wo ɗiggi ɓaara diŋ ti horog maga bay diŋ horog ma cwãy wan mokay wa. Á ma, á mo kaŋ wo ɗiggi ɓaara diŋ ti Baa maga hã fẽẽre ne naa debaŋ debaŋ mo ɓuy maga ɓil naa mo hay go feh mono.

¹⁸ Riŋ ra ga á mo joŋ wo jar de ele, horog ɓaaran mo hay diŋ joŋge jar de el no. Á mo hay wo de yaŋ, mo hay wo ɓes fẽẽre ɓaaran wo de jar lan wo.

¹⁹ Doo kay nono, á tay wo ciŋ nà diŋ horog ma de el de egre ma gor wur ma pel no, maga saara mo wo daʼge diŋ duniyã ma cwãy no.

²⁰ Timote, ɗaw fen maga à hãn mo mokay de ele, men faare ma de loɗgen ga ɓlag hãge ɓil jar go wo go. Men faare mani jar koge ma de hãygen wo go.

²¹ Werga jar po hay ɗig wo ga saara de daʼ koge re seno, day saara raw men faage hãge ɓil ɓaaran go hãã. Daga Baa mo woo we.