1 TIMOTE 1 - Tupuri Bible

Heege jage

¹ Wããre sen mokay yern diŋ ndi Pol maga diŋ je peele Yeso Kris ti jag Baa Je yãã naan go lay, ti jag Yeso Kris, je maga ɗiggi naa de kaŋge ti ɓe lay mono.

² Ndi ɓoʼn wo ne Timote wel ɓi ma cwãy maga ndi biŋn de hã ɓil mono. Daga Baa Pããben wo de Yeso Kris Waŋkluu naa mo woo wo ndo, mo ko wo decoo ɓo, mo hã wo jam ne ndo.

Wosela mo koɗ see ɓe de el doo hadge ma bay blamn wo

³ Doo maga ndi hay wii mo de maga ndi de rawge Masedwan nono, ndi riŋ mo wo ga hay mbo Efes ni ma riŋ jar maapo ga á mo had wo hadge maga bay ti ngel ɓe wa wa.

⁴ Ruu ra ga á mo men wo wããre mbaan wo de re keege moore ɓaara ma ɓaaɓaa wo go, werga sen kaŋ diŋ faare ti yoo ɓaara, kay ra ti joŋre Baa ma wer hãge ɓil ne Krisn gà lay.

⁵ De el ruugi sen diŋ ma naa nen dage maga a le go jag jiili ma bay ɗag wo de ɗiggi ma de el no, de hãge ɓil ma kidolgin go.

⁶ Seele se ma de el doo kayn jar po wo yoo ɓaara mbuɗ wo faale go ne hẽne, raw wo yeɗge go wer faare ɓaara ma de loɗge no.

⁷ Á da wo ɓaara ga saara mo hay diŋ jar had jar de jag liŋgi no, ama á bay wo laa wer wããre ɓaara maga saara de wãɗge ɓe mo wa lay, bay wo laa wer fen maga saara ga saara siɗn go de egre mo deŋ wa lay.

⁸ Naa de koge ga jag liŋgi de ele, hayga à yaŋ joŋ joŋre de ɓe ti ngel ɓe,

⁹ hayga à ko we ga à joŋ jag liŋgi bay diŋ ne je joŋ de el wa mono. Á joŋn diŋ ne jar hãy hãy wo de jar maga day wo yãɗ jag gà wo, ne jar maga hoo wo sug ti Baa gàn wo de jar joŋ ɓlaggen wo, ne jar ma de ɓlaggen wo de jar ɓod foo fẽẽre mani Baan wo go, ne jar id pan ɓaara noga man ɓaara wo go, ne jar id húulín wo,

¹⁰ ne jar joŋ figliwn wo, jar suɗgi de kããre ɓaara werpiirin wo, jar joŋ terere gebeere wo, jar car geteʼ wo, jar maga haɗ wo ti gùrn wo de fen po ɓuy maga de caa hee de hadge ma cwãyn mono.

¹¹ Hadge sen mokay de tabge de Wããre ma de Cõõre ma de togoɗge mani Baa no, Wããre se ma de Cõõre maga Baa hãn me ga ndi mo siin go mono.

Pol de joŋ suseʼ ne Baa ti de el ɓe no

¹² Ndi joŋ suseʼ ne Waŋkluu naa Yeso Kris ti maga á hã egre me ti joŋre ɓin mono. Ndi joŋ suseʼ ne hẽn ti maga á ko me ga ndi de kããge, day se raw kaŋ mege joŋ joŋre ɓen mono.

¹³ Ndi hay taŋgu diŋ je ɗarge ɓe, ndi hay joŋ bon jar ma de eln wo, ndi hay far ti see ɓi ciŋ. Ama de sen ɓuy Baa raw mbe ko decoo ɓi, werga ndi hay bay de hã ɓil ɓi ne hẽn wa, ndi hay bay de ko re maga ndi joŋn mo wa lay.

¹⁴ Waŋkluu naan raw woo mege debaŋ, wer hãge hã ɓil wo de dage maga de tay naa de Yeso Kris mono.

¹⁵ Wããre ma cwãy maga à nen yããge ɓe ɓuy diŋ ga Yeso Kris a ti tamsir la yãã jar ɓlagge wo go, day je ma de ɓlagge yoo ɓaara daŋge ɓuy diŋ ndi.

¹⁶ Ama, Baa kal ko decoo ɓi maga jar mo ko ga Yeso Kris de ɗaw see ɓe gorge nà diŋ see ɓi je ma de ɓlagge daŋge ɓuy no, maga jar maga hã ge wo ɓil ɓaara ma woge nen tenen maga taw gàn mo ko wo see ɓi.

¹⁷ Daga rage ɗúu no, togoɗge no, mo hay wo diŋ ma Waŋ ma tenen tiʼ tum ga huu gà day nen jar kon gà mono, ma Baa ma boŋ no, wo hãã tum sagsage! Amen!

¹⁸ Wel ɓi Timote, fen maga ndi wãã sen wo ne ndo mokay de tabge de ndarge nen wããre Baa maga à hay wããn le go taŋgu ti ɓo diŋ ga ndo mo dur jaw ma de eln

¹⁹ de ɗaw hãge ɓil ɓon wo de ɗiggi ma de el no. Jar po yaŋ wo, laa wo dayge yãã jag ɗiggi ɓaara ma de eln gà wersen daage raw leʼ bii go de hãge ɓil ɓaara ne Kris go.

²⁰ Himene wo de Aleksaŋder maga ndi hay hã ra go ne Manhúulí maga á mo ko wo ga à ɗar Baa gà wo yoo jar sen wo no.