MaSalimo 1 - New Tumbuka Bible

Buku lakudanga MaSalimo 1—41 Kutumbikika kwenecho

¹ Ngwakutumbikika munthu, uyo wakureka kurondezga urongozgi wa ŵaheni, nanga nkhutorerako mendero gha ŵakwananga, nesi kuŵa pamoza na ŵakuchonjora.

² Kweni wakukondwa pakusunga dango la Fumu, ndipo wakulanguruka nalo muhanya na usiku.

³ Iyo wali nga ndi khuni, ilo lapandika mu mphepete mwa tumironga twa maji, ilo likupambika vipambi mu nyengo yakhe, ndipo mahamba ghakhe nagho kuti ghakufota chara. Chose icho wakuchita chikumwendera makora.

⁴ Kweni ŵaheni kuti ndimo ŵaliri chara. Iwo ŵali nga ndi mwerero, uwo mphepo yikuwuruskira kutali.

⁵ Ntheura ŵaheni kuti ŵamkuchintha chara pa zuŵa la weruzgi, nanga mbakwananga mu mpingo wa ŵarunji.

⁶ Pakuti Fumu yikumanya nthowa ya ŵarunji, kweni nthowa ya ŵaheni yizamkumara.