Filemoni 1 - New Tumbuka Bible

¹ Kufuma kwa ine Paulosi, uyo ndi kayidi chifukwa cha Khristu Yesu, pamoza na Timote mubali withu, kwa iwe Filemoni wakutemweka withu na muteŵeti munyithu,

² na Apiya mudumbu withu, na Arikipo musilikari munyithu ndiposo na mpingo uwo ukukumana mu nyumba yako.

³ Uchizi na mutende vyakufumira kwa Chiuta Ŵadada na Fumu Yesu Khristu viŵe namwe.

Kutemwa kwa Filemoni na chipulikano chakhe

⁴ Nkhumuwonga Chiuta wane nyengo zose para nkhukumbuka iwe Filemoni mu malurombo ghane.

⁵ Pakuti nkhupulika za kutemwa na chipulikano icho uli nacho kwa Fumu Yesu ndiposo na kwa ŵatuŵa wose.

⁶ Nkhuromba kuti wenenawene winu mu chipulikano mphanyi wakwezga kamanyiro ka uweme wose uwo ngwithu mwa Khristu.

⁷ Wa mubali wane, kutemwa kwako kwandipa kukondwa kukuru chomene na kundisanguruska pakuti mitima ya ŵatuŵa yawezgekeramo chifukwa cha iwe.

Paulosi wakuŵeyererera Onesimo

⁸ Mwa ntheura, nanga ndingaŵa na chikanga chikuru mwa Khristu chakutilangula kuchita icho nchakukhumbikwa,

⁹ ndipouli chifukwa cha kutemwa, nkhukuŵeya ine Paulosi, nkharamba ndiposo sono ndili mukayidi chifukwa cha Khristu Yesu.

¹⁰ Nkhukuŵeya mu malo mwa mwana wane Onesimo uyo wakazgoka kuŵa mwana wane mwa Khristu apo nkhaŵa mu gadi.

¹¹ Kale Onesimo wakaŵa wambula chandulo kwa iwe, kweni sono ngwa chandulo kwa iwe na kwa ine wuwo.

¹² Sono nkhumuwezgera kwa iwe ndipo pakuchita ntheura nkhuŵa nga ndakutumizgira na mtima wane wuwo.

¹³ Ndakhumbanga kuti wakharenge nane kuno kuti wandovwirenge mu malo ghako, apo ndili mu gadi chifukwa cha Uthenga Uweme.

¹⁴ Ndipo kuti nkhakhumba kuchita ichi kwambula kuti iwe wazomera chara, mwakuti ureke kuchichizgika pakuchita lusungu, kweni ukwenera kuti uchite mu wanangwa wako.

¹⁵ Panji ndicho chifukwa Onesimo wakawukako kwa iwe kwa kanyengo kachoko waka, mwakuti wawezgekere kwa iwe na kukhara nawe nyengo zose.

¹⁶ Kuti waliso nga ndi muzga chara, kweni wakuruska muzga, ndi mubali wakutemweka chomenechomene kwa ine. Ipo kwakuruska, iwe ukwenera kumutemwa mu thupi na mu Fumu.

¹⁷ Ntheura usange iwe ukundipima kuti nkhusangana nawe mu chipulikano, umupokerere nga ndi umo ungapokerera ine.

¹⁸ Usange wali kukunangirapo kanthu, panji wali na ngongole kwa iwe, mrandu wakhe uŵe wa ine.

¹⁹ Ine Paulosi nkhulemba ichi na woko lane na lane kuti ndizamkulipirapo. Kweni ungaruwanga chara kuti umoyo wako uwo nchifukwa cha ine.

²⁰ Ntheura wa munyane, nkhukhumba kuti undovwire chifukwa cha Fumu. Sanguruska mtima wane mwa Khristu.

²¹ Pakugomezga kuti uli wakupulikira, nkhulemba kwa iwe apo nkhumanya kuti uchitenge vinandi kujumpha ivyo ine ndayowoya.

²² Ndiposo undinozgere malo ghakuti ndizakagonemo pakuti nkhugomezga kuti Chiuta wapulikenge malurombo ghinu na kundiwezgera kwa imwe.

Kutauzga kwa umaliro

²³ Wakumutauzgani Epafura, mukayidi munyane uyo wali mu gadi chifukwa cha Khristu Yesu.

²⁴ Ŵateŵeti ŵanyane: Mariko, Arisitariko, Dema na Luka, nawo ŵakumutauzgani.

²⁵ Uchizi wa Fumu Yesu Khristu uŵenge namwe.