Titus 2 - Bwaki Kifwiyang

Miyaku ki̱yilang

¹ Aya m mun, yung chiti turitu a fi̱rantuwe bi̱yili̱mitu.

² Miya kwartabu a kau seli̱bi̱mu mi̱n yinangu ka tau dutu chitangu, a funti̱ bwi, a swe wudidi, a tiwe keku bi̱yili̱mangu, ki̱ni mi̱laku n ti bwa̱ki̱ ni̱rang.

³ We yiko ti̱n, yung nati̱n seli̱bi̱mu mi̱n, n chi a ma da wu yile wu a nati̱m bunti̱ki̱me, n ke bi̱bu ki̱mwera ti̱kwani a dutu bi̱kami, ka bi̱bu ti̱norantu a kau chimi̱n bwime. N chi a miya chitu a leletu.

⁴ Ke n chi a miya nati̱n fwa̱ni̱mu mi̱n kangu ka mi̱la kwartabu chimu n ti bwesi̱m chimu ke a kau,

⁵ bi̱bu ka tau dutu chiim, bi̱bu ki̱ni wauwadu ni̱rem, bi̱bu a me ki̱to di̱kur lon chimu, bi̱bu ki̱bunti̱ yii kwartabi̱ chime, ke ya̱m Kwamamu a yadu swa̱ba ku we.

⁶ We yiko mwang wu bwelemu mi̱n ki̱tele mwi a tau dutu chitu.

⁷ We ka nang ti̱ti̱le chiye, a kau tikake wu ni̱bu ka ni̱n kuun yile, wu a lwe chi ni ka da̱du ka yodu a ni̱re. Funti̱ bwi we miyaku mwangu, madu ti̱kali we.

⁸ Yung chi ti̱yilitu ke yungku mangu a kadu chi ti̱kwilan we. Ke bi̱bu ki̱kwila nidi̱mu a nwe dibwi, a ne ya chi ti̱bwilai ti̱tu ka fadu we dutu chi̱renutu we.

⁹ Yung ka̱biyu mi̱n mwi a ma ni̱bu lom chimu mi̱n ti̱yilitu we kasi nang ti̱ti̱le chi. A ma chi naba lo ka nwe ta̱ma̱nge. A yitadu ya̱mu we ware,

¹⁰ n ke ni̱bu ki̱di̱ka fa̱liye, n ti ki̱ki yikongu, bunge n chi ka yung kwa̱mbi̱ru n ti ti̱yilitu. Di̱ne ke miyaki̱ku a di̱n Kwamanu naba yuke chire a ya dukanu kasi no file.

¹¹ Nangki̱n n Kwama a yung li̱me ko di̱ne yuku ni̱bangi kwang.

¹² Li̱me wu ki̱yung ni mi̱nu ko ni du dati yi kusiyu a newe ware Kwamayu, n ti kubeku kuli̱n ti̱ti̱ni̱nu, ni tau dutu chi̱retu, ni kau ni̱bu yilem, niyang yung duum ni̱r Kwamanu we ti̱ti̱nitu.

¹³ We fiswe ki̱yolange n ti yo ni̱re niyang madi yiko ni yan mi̱n ti̱n li̱me wu ki̱bede, ka nang chikiye, kuku dwiyen Kwama ti̱duitu n ti naba yuke n Yesu Masiya.

¹⁴ N Yesu a ni yikiyu di̱ne ke a chaku ni we chi ti̱kwanitu a nura ni, a mar ni kasi bi̱ki̱mi siin, bi̱bu a ni dutu chitu ki̱ tum yilemu.

¹⁵ Yung ya̱mi yiyu, ru ni̱bu mi̱n ni̱ti̱tu mwi a nang tum yile, N lwe mwang ma ti̱tu. Di̱ne yiko, kedu ni a swa̱ba̱nu we.