Romam 9 - Bwaki Kifwiyang

N Kwama a sutu Yisrela a kau ni̱bu ki̱m

¹ Mi̱n fwa bi̱yili̱mu di̱ne mi̱n wu Masiya, n ke ti̱kwani. Fi̱ki̱m Kwamamu ki̱ma mati̱n nweku ni̱r mi̱nitangu a yim mi̱n fwa bi̱yili̱m.

² Ni̱r mi̱nu a kaiyan nabwen, ni̱r mi̱ni kwadu ka ti̱kuran.

³ Di̱ne ni̱bu mi̱mu ki̱tuum ni̱mu a fi wiinemu, mang kedu Kwama a yomi yii ki̱diya kwadu n kwala Yesu Masiya ka di̱ne ke n yu kebu mi̱mu.

⁴ Ni̱bu bi̱bu nang Yisrela, n chi bi̱bu a sutu chi a kau ki̱dum bwesi̱m Kwamamu. N Kwama a kwa̱l chimi̱n dwiyen kitu. A ma bwa̱ki̱ ya̱m ki̱mu n ti chi a niti̱ chi yilang kangu. N chi a ya da wa siiku kange we Kan Kwamanu, a niti̱ chi, ti̱kantu chi ti̱tu a fwa n ti chitu.

⁵ Bati̱tukebu m biu chi, nang ki̱kuwang Yesu bwiye wu n ki̱n nang Kwama chiti kwange, delaku n di̱ki̱n ki̱diya kwadu. Amin.

⁶ Ti̱kuran Kwamatu we ni̱bu ki̱mu a kabu ti̱kusi. Di̱ne n ke ka nang wuwule niye wu tile ko siin naba Yisrela m bi̱u Kwama.

⁷ Ti̱nti̱ne, n ke ka nang wuwule niye wu a chire a ki̱kuwang Yibrayimange, bwesi̱m Yibrayim. Di̱ne ya̱m Kwamamu fwa ko, “Mwang ya bukebi̱bu mang bwa̱u n ti muni̱mu a di̱Yichaku we. Kasi ki̱ku n Yibrayim ki̱ni bi̱kam bwesi̱m ti̱nti̱nangu.”

⁸ Kanang chikiye, bwesi̱m Kwamamu a chirebu a bi̱be niye aya bi̱bu ki̱chiredu a riku ya̱m bwa̱ki̱mangu nang kasi bwesi̱mi siini̱mu.

⁹ Nangki̱n, n Kwama fwa we ki̱dangu a bwa̱u ya̱mu n ti Yibrayimangu ko: “Ka ki̱swi a lame, mang ki̱ladu, n Saratu ka bi̱u bwe.”

¹⁰ Kaang ki̱swerang we. Bwesi̱m Rebekamu ki̱ni te wiin, ka nang chikiye, n tuke chire n Yichaku.

¹¹ Aya yo a tibu bi̱u bwesi̱mi burabi̱me, yo a tibu ma chi a le ka leebite, a ya di̱yal a di̱Kwama (Ya̱m bi̱bu a yungi siin sutuki̱ Kwamangu ki̱bunti̱nu a doki̱ kang)

¹² A yi naye ko, “Bwe wusele beka si wuti̱re.”

¹³ Yinanga a mwal we ya̱m Kwamamu ko, “N mi̱la Yakubu aya n ko Yichuwa.”

¹⁴ Yoye ni yidu ko wule? N Kwama ki̱swaduswaba? “Ko bayim!”

¹⁵ N Kwama a yi Musa ko, “Mang nwe ki̱bune wu mang sute ti̱nti̱ne, mang yo ni̱r ki̱bunen mi̱nu we wu mang sute.”

¹⁶ Di̱ne yiko, a bunti̱ba a chi ni a kur a ni̱r ki̱ne ka funti̱ku bwiyang kange a ti̱ya ki̱bune Kwama.

¹⁷ We ya̱m Kwamamu, n Kwama a yi Firauna ko, “N sutu mun ke n yung dukan mi̱nu a di̱ mune, yinu ke di̱n mi̱nu a ti̱ran we ti̱ti̱niti kwang.”

¹⁸ Di̱ne yiko, n Kwama ki̱nwe ki̱bune ka wuwule niye wu n ki̱n a ku diye. Ki̱ yo bi̱kamu mi̱n ni̱ri ki̱ngki̱ng bi̱bu n ki̱n a ku ka yo chimi̱ndi̱mu.

Ki̱fwini Kwama n ti ki̱bune ko

¹⁹ Aya we tibe chi̱n wuka ka medu ka yidu ko, “Yinu yo yiko, a mayire n Kwama we ki̱ku ki̱le chire chike? N chi a mabu chi n ki̱n ki̱baddita?

²⁰ Ko bayim, m mun n wure, mun nii duri ki̱liye, nang wu mwang bi̱u Kwama we chi ki̱madita? Ke ti̱mubritu a bi̱u chitu ko a mayire mwang muyi yaa?”

²¹ We swaanku kawurengu, naba muke a newe ki̱ni da, ka muddu we di̱swani̱ni dini̱nu kubi ti̱tu ka ma ki̱mi̱n ki̱duli n ti ti̱tu a ka kani̱n fwali̱n tuiyenga?

²² Kanodu ka n Kwama ka yung ki̱fwini ko n ti dukan ki̱ne, a dabi ki̱ni ne riye wu, ki̱na no do di̱ne ni̱bu bwilame.

²³ Yiko ti̱nti̱n, n ki̱n a ke ka kure kuli ki ti̱tu a nabwe dwiyen kitu we bi̱bu n ki̱n a do ka nwe ki̱bune chimu. Bi̱bu n ki̱n a do feredi ka ya dwiyen kiti̱mu.

²⁴ Kanang chikiye n chi̱ni bi̱bu Kwama a yali̱mu aya a newe kana ni̱bu Yafudam n ti kuuti yikayi kwang.

²⁵ Yinanga fwa we Yosiya ko, bi̱bu n ke ni̱bu mi̱mu, mang yidu mi ni̱bu mi̱m. Ti̱nti̱ne ku wu mang mi̱labe, mang yalu mi, “Wu mi̱lare.”

²⁶ Ti̱nti̱ne, we finu a fwa mi̱ni siin ko, “N ti̱n ke ni̱bu mi̱me, we fiko ni̱bu ka yidu ko, ‘Bwesi̱m Kwamamu wukure.’ ”

²⁷ We Ya̱m Yisrelamu, fa̱ku Yichaya a kuku keru a yi ko, “Kasi ki̱ku nabwe Yisrela yinang yane langu bayim we bi̱bu a kulen we Yisrelamu ka ya yuku.

²⁸ Nangki̱n, n Tewuduwe ka kaba ti̱ti̱nitu mi̱nu ki̱ni kwang. A ne kai ki̱swi ka mwatadu kwang.”

²⁹ Yinangu n Yichaya a fwangu, “A du bi̱kam chi̱remu tuule, a no ni kadu yinang Sodom n ti Komara.”

Kwalan keku bi̱yili̱mang Yisrela

³⁰ Yoye ni fwadu ko wule? Yiko, yikayu kuuti yiyu a bunti̱bu yile a yati̱ yile wa niku bi̱yili̱mange.

³¹ Aya Yisrela a funtbwi ki̱bau wa̱re yile a bunti̱ku yili̱nang a yabu.

³² Wure ni a yo? N chi a babu a wa̱re wa keku bi̱yili̱mange. A bunti̱ funti̱ku bwiyang chiyang. We yiko n chi a yar we kale yare.

³³ Yinanga mwalmwale ko, Ti̱da̱ng n yo kale a Siyona kale yare, ka yo ni̱bu nabwen ka yaru. Aya wu a ke bi̱yili̱m a di̱ki̱ne a ne nwe dibwi.