Romam 5 - Bwaki Kifwiyang

Li̱mang n ti ti̱mi̱lan

¹ Ki̱ka̱ngu niyang kau ni̱bu yilem di̱ne keku bi̱yili̱mang chirengu, ni ya Li̱mangu n ti Kwama di̱ne chitu n Yesu Masiya Tewuduwe a ma nimi̱ne.

² Di̱ne keku bi̱yili̱mang chirengu, m Masiya a yo ni ya da fi wuduwe ni ti mi̱n. Ni ma ti̱mi̱lan we yo ni̱re wu a fiswe ware n ti Kwama we dwiyen kitu.

³ A bwin yiko, n chi̱ni ni ri̱kadu we nwe riye di̱ne ni yim riye ki̱ya̱r ni we dako, ki̱yodu ni ya ruku.

⁴ Ya̱rki̱ku ki̱yo Kwama ki̱nwe ta̱ma̱ng ki̱ni da chire, keku Kwamang ki̱bedu ki̱ni yo ni̱re wu a yaku yukange.

⁵ Yo ni̱re wu a ne ka kau ti̱kusi we ni̱r chi̱renu di̱ne ni yim n Kwama a mi̱la ni, a ni chi̱ni Fi̱ki̱m bi̱bi wauwaudi̱m di̱ne mi̱laku kang.

⁶ Ti̱da̱ng we yo no n chi̱ni niyang tibu ya dukane, m Masiya a bwa di̱ne bi̱bwilamu a ki̱swi wu n Kwama sute

⁷ Di̱ne a ma bwar yinang ka n chi̱ni ni ya wu ka bwadu ko ke ki̱ yu nii wu yilengu. Kasi ki̱ku ni medu ni ya wu ka bwadu di̱ne nii wu yilengu.

⁸ Aya n Kwama a yung mi̱laki̱ kangu we di̱chi̱niye yo n chini we ki̱leti suke, n Masiya a bwa di̱ne chini.

⁹ Yo a chaku niye di̱ne ki̱tuumu a fwali̱me, ki̱kumag n ki̱n ka yu nidu we ki̱fwini Kwama.

¹⁰ Kangi yangu a no n chi̱ni fakwarbu Kwamam aya ki̱ka̱ngu ni ya dokaku n ti Kwama di̱ne bwa wu n Yesu a ma. A mwintuwe ni swidu we ti̱welan ki̱diya kwaditu di̱ne ti̱kuri kitu.

¹¹ N ke ka ti̱tu, ni ma ti̱mi̱lan di̱ne chi n Kwama a ma a bweko n Tewuduwe Yesu Masiya, wu a di̱ki̱ne ni ya dokaku.

N Adamu n ti Masiya

¹² Tiyangu ki̱letiyu a lewe ti̱ti̱niyangu a nii wiinangu, yinu bwa di̱ne ki̱letiye, yinu we yiko, bwa a tau ni̱bi kwang, di̱ne ni̱bi kwang a ma ki̱leti.

¹³ Ki̱kumang, ki̱letiyu n we ti̱ti̱nitu feredi yo yili̱n Musatu a tibu bede. Di̱ne yilangu a newe we, ki̱letiyu a yabu kiku

¹⁴ Aya a mwetuwe ki̱dang Adamuwangu, a lanta ki̱dang Musa, bwa a ma mati̱n ku ni̱betu ki̱ni kwang. A matuwe kasi no nang bi̱bu a mabu ki̱le a wa̱re wiin wu n Adamu a ma mi̱ne, yo a bunti̱bu yilang Kwamange. Adamu no ki̱duum we wu a no ka bede.

¹⁵ Aya Ki̱li̱mang Kwama a newe yinang ki̱leti Adamu. Nangki̱n ki̱le Adamuwe a yal ni̱bu mi̱ne bwa. Aya li̱me Kwama nabwen, a mwinta yo ki̱li̱mangu n ki̱na ma a ni wiinangu, ka nang chikiye n Yesu Masiya a be ki̱ni delaku we ni̱bu nabwen.

¹⁶ Ti̱nti̱ne ki̱li̱mang Kwamangu n ke di̱ne nangang ki̱le nii wiinnange. Yinu mwa̱taki̱ku a nabe ki̱le nii wiine yinu a be ki̱ni kayaku. Yinu ki̱li̱mang a nabe nee ki̱letiyu, yinu ki̱li̱mang Kwamangu a be ki̱ni kwalan ki̱len.

¹⁷ Bi̱yili̱m, di̱ne ki̱le nii wiine, bwa a ya da wu ka kwaba ni̱be nabwen. Aya ti̱wannantu nabwe di̱ne n Yesu Masiya n ki̱kun nang wu a kwira lwadi̱me we. Kanang wuwule niye wa yiu li̱me a ya swiku n ti fi swe yile n ti ki̱n kama mati̱n ti̱kuri a di̱Masiya.

¹⁸ A tatuwe yiko, di̱ne ki̱le ni wiine, ni̱bi kwang a kau ni̱bu ki̱leti̱m. A fi wiine naba yile wiin, a chaku ni̱bu mi̱ne ti̱kuritu a no twiyaditu.

¹⁹ Aya yinangu nii wiin a nwebu diyangu, ni̱bu nabwen a kau ni̱bu ki̱letiyangu, yiko ti̱n di̱ne nii wiin wu ki̱nwediye ni̱bu nabwen ka kau bi̱bu ki̱tum yilem.

²⁰ Yilangu a lewe a yo ki̱letiyu nabwen, aya fi ki̱letiyu susube, li̱me ki̱suddu ki̱laan yiko we dungkwale wuko.

²¹ Yinangu ki̱letiyu ki̱ma mati̱ntu we bwangu, ki̱tau ni̱bu a ki̱letiyu, we yiko ki̱yo yile ki̱ma mati̱ntu we tumku yile wu ki̱bedu ki̱ni ti̱kuri ki̱diya kwadite a di̱Yesu Masiya Tewuduwe chire.