Romam 2 - Bwaki Kifwiyang

Mwataki̱ Kwamange

¹ Di̱ne yiko, ti̱n fal ti̱ne ya̱m we, n ti̱n bi̱bu ti̱ku ki̱leti bi̱kami̱mu. Kangu ti̱ku ki̱le bi̱kamangu, we di̱chi̱ne yare ki̱bedu. Di̱ne n ti̱n bi̱bu ti̱mwata ya̱m a ni̱bumu ti̱ma ti̱n chitu wu n chi ki̱made.

² Ki̱ka̱ngu, ni yim mwataku Kwamangu a bi̱yili̱m, we bi̱bu ki̱ma ki̱letimu.

³ Aya m mun! Wu mun fwa ya̱m we ki̱chitu wu mun mati̱ne, mun kamadu mwang swidu we mwataku Kwama Tenga?

⁴ Ka mun swa̱ba nabwe li̱me Kwama n ti muku ni̱ran kangu n ti bwanu konga? Mwang yimbu mwi li̱me Kwama di̱ne ke n wo ki̱ti̱ma?

⁵ Aya di̱ne ni̱r muni ki̱ngki̱ng mwang nwebu diye, mun yal dur munu mi̱ne ki̱fwini Kwama wuduwe we di wu n Kwama ka tidi tas di̱ne kabake.

⁶ N Kwama ka ni kawure wuko ki̱ti̱me, ka wu yile, ka wu bwila.

⁷ We ni̱bu bi̱bu a yoti̱ ni̱ru we kwing ki̱ma chi a le, ka ni chi ti̱kuri ki̱diya kwadi.

⁸ Aya bi̱bu ki̱bau dutu chiitu mi̱n dwiyeni̱nu, bi̱ba ko bi̱yili̱mu ki̱bunti̱ bwilamu, n Kwama ka ma ki̱fwini ki̱ni chi nabwen.

⁹ Kanang wuwule niye wu ki̱ tum bwila, ka wuranbwi ki̱ni riye n ti di̱kumen: A mwetuwe ni̱bu Yafudam, ka swan ti̱nu a Yelena.

¹⁰ Aya dukan n ti dwiyentu n ti li̱me, n wu ka nang wuwule niye wu ki̱ma chi a le. A mwetuwe ni̱bu Yafudamu ka swanti̱na Yelena.

¹¹ Nangki̱n, n Kwama a swabuswabe.

¹² Kanang wuwule niye wu a yar yo a yimbu yili̱n Kwamate, ka ya ti̱welan we ki̱taku chiyangu. Aya wa yar we yo a yaki̱bunti̱ yili̱ne, ka ya kabaku ki̱ku a yili̱nange.

¹³ Aya bi̱bu a nwe yilamu a kau chi mi̱nbu wa̱re swike we kakku Kwamamu aya bi̱bu ki̱bunti̱ yili̱n Kwamati̱mu nang bi̱bu ka ya delaku Kwamamu.

¹⁴ We Kuutiyu a newe ki̱ni yili̱n Kwamati̱mu, ka bunti̱ yili̱ntu we ni̱tu chitu, a kau chi mi̱n yili̱n Kwamatu, kasi ki̱ku n chi a newe ki̱ni a yili̱ni̱mu.

¹⁵ Yo kwer n chi a nwe we ni̱tu chiitu, yilangu ki̱ma nangange, bwi chiiyu a kau di̱mwar, ki̱yaka chidu we ni̱tu chitu ki̱toti̱ chidu.

¹⁶ Di ka bedu wu n Kwama ka kaba ni̱bu mi̱n ki̱letiye, ki̱dangu ka kaba ni̱bu mi̱n ti̱lairi ti̱tu a di̱Masiya te, yinang ka ya̱m bi̱li̱m mi̱ma fwangu.

Ni̱bu Yafudam n ti yili̱n Musatu

¹⁷ M Mun wu mun ngau kwiye mwi m mun naba Yafuda, mwi mun bunti̱ yili̱n Kwamaye, mun kuku ti̱ni dur mwi m mun n yim Kwama,

¹⁸ mwiko n yim chi Kwama ki̱baddite, di̱ne mwang swaan we yili̱ntu chi a da makite,

¹⁹ Yinu n yo we ni̱r munu mwi n lwe mwang twa̱ku wu a kubu diye, mwang kau yiiku we ni̱bu a swaanbu chi me.

²⁰ N ke mwang miya bi̱bu n ke ni̱bu Yafudam mi̱nu, bi̱bu mwang da̱u mwi di̱bu di̱ne a swaanbu ya̱m Kwamame, di̱ne muni ki̱ni yili̱n Kwamatu mwang medu mwang miyaditu.

²¹ M mun wu mun miya bi̱kamu mi̱nde, mwang miyabu dur munu mi̱nba? M mun wu mwang kebu ni̱bu ka ma kuti̱te, mwang maba?

²² M mun wu mwang yi mwi ni̱bu a madu ti̱kulitu we, mwang maba? M mun wu mwang babu mwang nwe ya̱m di̱yori̱me, mwang mabu kuti̱tu we senga?

²³ N ti̱n bi̱bu ti̱kuku duru ti ti̱bunti̱ yili̱ni̱mu, ta kaibu Kwama mi̱nbu ni̱ru we yo ta bunti̱bu yilanga?

²⁴ Yinangu a mwalangu, “Kuuti ki̱ swa̱ba di̱n Kwama nu di̱ne chi̱n!”

²⁵ Biku laabiyang ni̱bu Yafudamu ki̱ni ki̱kwi ka ti̱yadu we yilange, aya ka ti̱ki yilange, ti̱ki̱la ti̱kau yinang bi̱bu a no yimbu Kwamam.

²⁶ Ka bi̱bu ke ni̱bu Yafudam a bibu laari̱mu a bunti̱ chi yilangu ki̱fwade, n Kwama a ne mar chidu ka kadu yinang bi̱bu a bi laari̱ma?

²⁷ Bi̱bu a bibu di̱ten laari̱mu, yinu ki̱bunti̱ yili̱nti̱mu, ka mar chi̱nu a bwa di̱ne kasi ki̱ku ta yim yili̱n ti̱tu ta biti̱ labitangu, ta bunti̱bu yili̱ntu.

²⁸ Naba Yafuda siine niyang da̱ngbu a biku laarangi siine n ke di̱ten bwine.

²⁹ Naba ni̱bu Yafudam siine ni kudu a ni̱r ki̱n, biku laarang kangu ki̱ku a Fi̱ki̱m a ni̱rang, n ke yili̱n ti̱mwali̱ri. Ki̱duum ni̱bu bi̱bumu, n Kwama nang wu ki̱wer chide, n ke ni.