Romam 10 - Bwaki Kifwiyang

¹ Kebi̱mi̱m, chi a ni̱r mi̱ne n ti twa̱ba̱ku mangu we di̱Kwama mi di̱ne ke Yisrela a ya swiku.

² N yim mi n chi ki̱bau Kwama yinang aya baku Kwama chiyangu a bunti̱bu a yingki̱ ki̱yilang.

³ Yo n chi a yingbu yile wu ki̱suwedu a di̱Kwama, ki̱funti̱bwi ka ru yi chi. N chi a bunti̱bu yile Kwama.

⁴ Nangki̱n yilangu a kur, a di̱Masiya. Di̱ne wu a ke bi̱yili̱me, a ya fiswe wu wauwade we kakku Kwamangu.

Yuki̱ku di̱ne ni̱bi kwang

⁵ M Musa a mwal ya̱m bi̱bu ko ni ka chiru we bunti̱ku yili̱nangu ko, “Kanang wuwule niye wu a bunti̱ yili̱n ti̱te ka ya ti̱kuri.”

⁶ Aya chi bi̱mwali̱li̱mu ya̱m Kwama a fwaatu we yinangu ni ka ya yile we keku bi̱yili̱mang kangu. “Yidu we ni̱r munu mwi n wure ka fi̱l bwadiye?” Kanang chikiye ke a suwe ki̱ni Yesu Masiya.

⁷ Ka mwang fwadu mwi n wure a ya we ni̱r di̱ti̱nu. Kanang chikiye ke a kuku Yesu Masiya we Kwa̱miyu.

⁸ Kano a fwa ko wule? Di̱kwa̱l Kwamanu a kwami̱ntuwe, we a yii mo n ti ni̱r munu, ka nang chikiye di̱kwa̱l niku bi̱yili̱mangu nang wu ni made.

⁹ Ka n fwa ki̱ni yii mo mwi n Yesu Tewuduwe chire, n ke bi̱yili̱mu we ni̱ru mwi, n Kwama a kuku ki̱n we fure, mwang ya yuku.

¹⁰ Ni ki̱ke bi̱yili̱mu ki̱ni ni̱r, yinu Kwama ka ku ki̱nu naba yile we kakku kangu. Nii ki̱fwadu ki̱ni yi yinu ki̱ya yuku.

¹¹ Yinangu bi̱mwali̱li̱mu ya̱m Kwamamu a fwaangu, ka nang wuwule niye wu a ke bi̱yili̱me a di̱ki̱ne a ne nwe dibwi.

¹² Nangki̱n a ne lakaku we naba ni̱bu Yafudam n ti Yelenamu. N Tewuduwe wiin nang Tewuduwe ka wuwule niye. N ki̱n nang wu ki̱ni ki̱li̱mangu nabwen we bi̱bu ki̱ya ki̱mi̱nu ki̱ni wimu.

¹³ Yinangu bi̱ mwali̱li̱mu ya̱m Kwamam a fwangu, “Kanang wuwule niye wu ka yalu a di̱n Tewuduwe ne ka ya yuku.”

¹⁴ Yoye n chi ka yal wu a kebu bi̱yili̱m yire? N chi ka ke bi̱yili̱mu we wu n chi a nweebuwe yire? N chi ka nwedi yire ka a ne naba di̱mware wenge?

¹⁵ Yinu ka ma di̱mwari yire, ka ni̱ba tumbu chiye? Yinang bi̱ mwali̱li̱mu ya̱m a fwa ko, “Ni̱bu ki̱ma di̱mwari̱mu a le!”

¹⁶ Aya n wure ki̱ke ya̱m bi̱li̱m yinangu faku Yichaya a fwangu, “Tewuduwe n wure a ni bi̱yili̱mu we ya̱m mume?”

¹⁷ Di̱ne yiko, keku bi̱yili̱mangu ki̱beda a nweku ya̱m bi̱li̱m yinu ni̱bu ki̱nwe di̱mwar ya̱m bi̱li̱mu a dur Masiya.

¹⁸ Aya mi̱n ma di̱bi̱du, bi̱yili̱m n chi a nwe ba? Bi̱yili̱mu n chi a nwe: “Ker chi̱nu a bunti̱ ti̱ti̱niti kwang, ya̱m chimu ti̱n a lam ka wule bale we ti̱ti̱nitu.”

¹⁹ Mi̱n bi̱ti̱du ki̱da. Ki̱kumang Yisrela a swaanba? M Musa a mwe a ke ko, n Kwama a yi ko, “Mang yodu ta nwe ki̱fwini ni̱bu n ke kuumu. Ti̱nti̱ne, mang yo chi̱nu ta ma ki̱fwini we kuu wu a swaanbu chiye.”

²⁰ Yinu n Yichaya a mu ni̱ru a fwati̱n ko: “Bi̱bu a baibi̱mu, nang bi̱bu a yayimu. N yung dur mi̱nu we bi̱bu a no bi̱ti̱bu chi yinangu ka yayangu.”

²¹ Aya we Yisrela, n Kwama yi ko, kuko kwadu mi̱n tar fa̱li miyu we bi̱bu a mabu kwa̱mbi̱r a nweti̱bu diimu.