Matta 9 - Bwaki Kifwiyang

N Yesu a be wu ngi̱rmane nii

¹ Yo n Yesu a le kwa̱mbi̱re mwe, a yabu far di̱dunu, a yika bi̱n ki̱n,

² we ki̱dang kangu, bi̱kam ni̱bu a da̱a̱ nii wu a ngi̱rmangi̱rmane, a be ki̱mi̱ne ki̱n a chi ti̱dari. Yo n Yesu a ku keki̱ bi̱yili̱mang chiyange, a yi nii wu a ngi̱rmangi̱rmane ko, “Kuradu chi we bwe mi, n du mi̱n ki̱leti mwiyu.”

³ We bi̱bu, bi̱kam ni̱bu yungku yili̱ni̱m a fwa we yichiyu ko, “Nii wu a swa̱ba Kwama.”

⁴ Kangu n Yesu a yim ti̱kuran chitangu, a yi chi ko, “A mayire ti̱kuran chi̱ntu a lebe?

⁵ Ti̱ti̱le a la chi, ka ni a yiko, ‘N dumi̱n ki̱leti mwiye,’ n ti ka nii a yi ko, ‘Kun, ya yayuwe?’

⁶ Aya ke ti̱yim ti Bwe Nii ki̱ni dukan we ti̱ti̱nitu ka du ki̱letiyu. A yi wu ngi̱rmane ko, ‘kun, da̱u kwa̱mbi̱re mwemo yika lo, burang mwangu a be.’ ”

⁷ Nii wu a kun, a yikati̱ loko.

⁸ Yo ni̱bu a muran a fikomu a ku ti̱te, tayi a tau chi. N chi a dela Kwama wu a ni ni̱bu dukan di̱dun di̱de.

Yesu a yal Matta

⁹ Tiyangu n Yesu a chakakku ki̱ni yayuwangu, n ki̱n a ku wuka nii wu ki̱yalu ko m Matta, a swe ki̱yiu sangkal, n Yesu a yi ko, “Bumite.” N ki̱n a kun a bunti̱n.

¹⁰ Yo n Yesu a yaki̱ chau chabtu metu a lon Matta, ni̱bu ki̱yiu sangkali̱mu nabwen n ti ni̱bu ki̱letiyimu a be a swe a chau chitu ware.

¹¹ Yo Farisawa a kuwe, a yi Miyari̱m ki̱mu ko, “Wureni a yo naba lo chi̱n ki̱chau chabtu n ti ni̱bu ki̱yiu sangkali̱m n ti ni̱bu ki̱letime?”

¹² Kangu n Yesu a nwe ya̱m bi̱bangu, a yi ko, “Nii wu ki̱ni li̱mange a babu nabari, kana wu a bubuwe.

¹³ Yati̱ ta̱l chi ti̱tu ki̱yungde, mi̱n bau nweki̱ ki̱buneng n ke niku ki̱tumang. Mang bebu di̱ne ni̱bu yilem aya di̱ne ni̱bu ki̱leti̱m.”

Di̱bi̱du a dimwen

¹⁴ Yinu Miyari̱m Yowanamu a beki̱ bi̱u Yesu ko, “Wure ni a yo n ni̱n n ti ni̱bu Farisamu ni̱n da̱u dimwen aya Miyari̱m mumu a da̱bbe?”

¹⁵ N Yesu a ki̱nta chi ko, “Fate wutabre ka ma furi ki̱liki̱lin we ki̱dangu bwele ki̱yiu naye we ware n ti chiyanga? Ki̱swi ki̱bedu wu bwele ki̱yiu naye ka du chide. Nang ki̱dangu n chi ka da̱u dimwen.

¹⁶ “A ne nii ka tal luke wuka̱re ki̱ni di̱lukten di̱fwine we, di̱ne ka di̱lukten di̱fwinu a wubi ti̱ri̱me ka kai luke, ti̱nti̱ne ka su ngi̱raki̱ku.

¹⁷ A ne nii ka kur mwe yili̱me we bechi wuka̱re ni̱bu Yafudame. Ka a kure, besii ka fwedu, yimu ka kura bwa, besi a kaiyan. Ka la chi a kur, a besi ni̱bu Yafudam wu fwiye, besi n ti yimu a ne kaiyadu.”

Be fwa̱ne wu a bwa n ti naye a bubuwe

¹⁸ Yo n Yesu we ki̱fwa ya̱me, wuka tikake kan muraki̱ne a be fi a di̱Yesuwe a sung we a kakki̱ Yesuwangu a yi ko, “Fwa̱n mi̱nu a bwa a mabu ki̱twalang. Aya be yo ki̱mi̱n fa̱la̱ng, n yim ka kunnu.”

¹⁹ N Yesu a kun n ti Miyari̱m ki̱mu, a bunti̱ nii wu.

²⁰ Wuka naye wu a ma swa̱tu kub chiri turab ki̱kur ki̱tume, a kanengi kuteng a twai ki̱ti̱ku luke wu n Yesu a do.

²¹ N ki̱n a yi we yikiyu ko, “Ka no n twayin ka luke ko, mang bedu.”

²² Kangu n Yesu a sabran a da̱ngangu a yi ko “Ma furi mwe mwe, fwa̱n mi̱n, keku bi̱yili̱mang mwangu a been. We fiko naye wu a be.”

²³ Yinu n Yesu a le lo naba tikake a ku ni̱bu ki̱kura chimu n ti bi̱bu ki̱kira winimi kuuu!

²⁴ A yi chi ko, “Ti̱kun mi̱n a fi. Fwa̱n di̱du a bwabu, ki̱da kana dum,” N chi a nu Yesumi̱n di̱nur swa̱baki̱n.

²⁵ Yo ni̱bu a chir fi̱lange, n Yesu a le a tau fa̱la̱ng fwanangu, fwa̱nu a kun ti̱n.

²⁶ Ya̱m bi̱bu a ti̱ra ti̱mi kwang.

N Yesu a be ki̱dubu n ti bi̱bu ki̱lwa̱bi̱ ya̱mim

²⁷ N Yesu ki̱du fikoye, ki̱dubi burau a nabu ki̱n, ki̱yalti̱ chitu ko, “Bwe Dauda, nwe ki̱bune ni̱n.”

²⁸ Tiyangu n Yesu a le wuka longu, ki̱dubi̱bu a be fiko, n Yesu a bi̱u ko, “Ti̱ke bi̱yili̱mu mang medu mang be chi̱na?” N chi a ke ko, “A ne twayaku we Tewuduwe.”

²⁹ Yinu a twai kwalangi chiyu a yiko, “Ti̱be, di̱ne keku bi̱yili̱mang changu.”

³⁰ Yinu kwalangi chiyu a wuden. We fiko, n Yesu a wu ki̱teli chiyu ki̱ni dukan ko, “Tifwa wuka mi̱nu chi a fwetu we.”

³¹ Aya n chi a chir, a ti̱r ya̱m Yesumu we yaa wuko n ti ti̱m bi̱ki̱mu ki̱ni kwang.

³² Yo n chi yaki̱ chirede, ni̱bu a be ki̱mi̱ne ki̱ni wuka nii wu ki̱fi̱bti a la bwiyu n ki̱n a yimbi̱nang fwaanti̱ ya̱me.

³³ Ki̱dangu ki̱fi̱bti a chirangu, di̱fun di̱du a fwa ya̱m. A ya̱r ki̱tuu ni̱be yii. N chi a yi ko, “Nang kuunbu ti̱tu chi we ti̱m Yisrelamu.”

³⁴ Aya bi̱kam ni̱bu Farisamu a yi ko, “Ki̱ma nangangu ki̱ni dukan tikake Mai ki̱fi̱btiye.”

Yesu a nwe ki̱bune ni̱be

³⁵ N Yesu a bunti̱n bi̱nti̱tu n ti beti̱ bi̱ntiyu ki̱miya ni̱bu mi̱nu we kambi muraki̱ chitu, ki̱fwa ya̱m bi̱li̱m Yaa Kwamamu, ki̱berati̱ buri̱ntu.

³⁶ Yo n ki̱n a ku ki̱tuu ni̱be, a nwe ki̱bune chi, di̱ne n chi ki̱nwe riye yinang kwanti yiyu a ne naba toke wei.

³⁷ Yinu a yi Miyari̱m ki̱mu ko, “Nangang kakkangu nabwe aya ni̱bu nangangmi bayim.

³⁸ Di̱ne yiko, ti̱twa̱ba̱ buni, ke Tewuduwe a tume ni̱bu nanganmu ke a kau.”