Matta 7 - Bwaki Kifwiyang

Ti̱yo nii mi̱nu ki̱lewe

¹ “Ti̱nidu ka wuwule niye ki̱lewe, ke a ni ti̱nu chi̱n ki̱lewe.

² Nangki̱n, tiyangu ti̱mwata ni̱bu mi̱n ya̱ma̱ngu, ka mwata chimi̱n ti̱ni yiko. Kwele mun swende, nang wu ka swemi̱n ti̱ni ki̱ne.

³ Wule yo mun da̱ng be di̱fi̱li̱n ki̱tinu a nu ke monu, mwang kurbu ki̱takulangu a numonge?

⁴ Mwang medi yire, mwang chaku ke mo mi̱n di̱fi̱li̱n we nuko, yo ki̱takulang we wumo nuwe.

⁵ Naba di̱bebeline, mwe n chaku ki̱takulangu we nu mo, yinu mwang chaku ki̱yilang swa̱ka̱n a nu ke monu.

⁶ “Ti̱nidu kadatiyu ti̱yili Kwamatu we, yinu ti̱nidu sulti̱kumiyu kali ka̱mbi̱riyi wuli̱bi̱wuli̱biyu we, ke ki̱la nwe chimi̱n burang.

Ti̱bi̱u, ti̱bau, ti̱bu kwa̱ru

⁷ “Ti̱bi̱u ka nii chi̱nu, ti̱bau ta yadu, ti̱bu kwa̱ru ka wudu chimi̱nu.

⁸ Kanang wuwule niye wu ki̱bi̱de, ki̱yiddu, wu ki̱badde ki̱yadu yinu n ki̱n wu ki̱bu kware, ka wudu ki̱mi̱nu.

⁹ N wure we tibe chi̱n wu bwe ko ka bi̱u ki̱danne n ki̱n ka nii kale?

¹⁰ Ka a bi̱u chi̱nge, ka nii so?

¹¹ Ka n ti̱n, n ti̱n bi̱bwilamu, ti̱yim ti̱ni bwesi̱m chimu chi ti̱yiliye, kano Te chi̱n wu a diye a ne ni bwesi̱m ki̱mu ki̱li̱mangu we bi̱bu a bi̱u ki̱ni̱ma?

¹² “Kanang ti̱ti̱le chiye, ma ni̱bumi̱n ti̱n yinangu no mun baddu n chi ka mami̱ndangu. Ti̱tu a dal yili̱ntu n ti chi fa̱kubu a fwaatu di̱mbi̱ri̱m.

Kwa̱rri kuddi̱n n ti di̱di wuti̱li̱n

¹³ “Lenga kwa̱ri kuddi̱nu, di̱ne wa̱re wuti̱le ka yo nii a twiyaku, nang wa̱re lantange. Ni̱bu nabwen ki̱tau wa̱re wuko.

¹⁴ Aya kwa̱ri kuddu, nang wa̱re burinching wu a ti̱kuriye, ni̱bi bayim bi̱bu ki̱yaduwemu.

Tiyang n ti ti̱kulan kii

¹⁵ “Ti̱ma daandaan ki̱ni fa̱kubu ti̱kwanimu. Bi̱bu ki̱be fi a di̱chi̱ne ki̱ni di̱ba̱l kwamin we bwi chiyinu, aya n chi bawuti, chun a lwe bwi chiyu.

¹⁶ Ni swaan chidu we a nangari chitu, ni ya ti̱kulan sinangitu we kwa̱da? Ka ti̱tu a ki̱selangitu we siinanga?

¹⁷ Di̱ne yiko, ka ki̱ki̱le tiyang ki̱yilange ki̱ tu ti̱kulan ti̱yili aya tiyang ki̱bwilangu ki̱tu ti̱kulan ti̱bwilai.

¹⁸ “Tiyang ki̱yilangu a ne tu ti̱kulan ti̱bwilai, tiyang ki̱bwilangu a ne tu ti̱kulan ti̱yili.

¹⁹ Kanang ki̱ki̱le tiyang ki̱ku a tubu ti̱kulan ti̱yiliyange, ni̱bu ka swidu ka maru a ki̱rang.

²⁰ Yiko, we nangi̱n chitu ta swaan chidu.

Mang yimi̱nbu chi̱n we

²¹ “N ke ka nang wuwule niye wu ki̱yalu ko ‘Tewuduwe, Tewuduwenge we!’ Ka le Yaa Kwama ka n ke wu ki̱tum ki̱ke Temi wu a diye.

²² Nibu nabwen we diko beka fwadu ko, Tewuduwe, Tewuduwe, mare ni̱n ma fa̱kui ki̱ni di̱n mun, we di̱n munu ti̱nti̱n ni̱n chaka ki̱fi̱bti ni̱n mati̱ chi ka̱ta̱kitu nabwen.

²³ Mi̱n fal mang yi chidi tas mi, ‘Mang yinchi̱nbu. Ti̱yika mi̱n a fi ni̱bu bi̱bwilam!’

Ni̱bu Muku Lomi Burau

²⁴ “Nii wu a nwe ker mi̱nu, yinu a ma nangang ki̱ne, ka kadu yinang naba yingku wu a mu loko a kwame.

²⁵ Yo mwe a swi, latiyu a riye, ki̱fi̱be a kune a ngau lo, lo wu a yarbu, di̱ne a mu lo a kwam.

²⁶ Yinu wu a nwe ya̱m mi̱mu, a mabu nangang ki̱ne, ka kadu nang di̱r di̱du a mu loko a yane.

²⁷ Yo mwe benge, latiyu a ri, ki̱fi̱be a kun a ngau lo, lo a yar ki̱ni keru dukan ko, kuuum!”

Dukan Yesun

²⁸ Yo n Yesu a ri fwaku ya̱m bi̱be, tayi a tau ni̱bu a muran we fikomu.

²⁹ Di̱ne ki̱n ki̱miya chimi̱nu tiyang nii wu ki̱ni dukane a newe tiyang ni̱bu yungku yili̱n chimu.