Matta 6 - Bwaki Kifwiyang

Miyaku a da wuyile

¹ “Ti̱ma daan ki̱ni nangi̱n ti̱yili chi̱ntu, di̱ne a ne kuki̱ku durang we nangang ki̱yilangu. Ka a kabi yiko, a ne ta ya ki̱ti̱me we Te chi̱n wu a diye.

² “Di̱ne yiko, ka mun ma nike, ri̱kadu yimwiyu we chi mwang maatu, tiyangu ni̱bu di̱bebelin a kambi muraku ni̱bu Yafudamitu n ti neti̱ loyu ko ke ni̱bu a wer chiyangu. Bi̱yili̱mu nang bi̱bu, n chi a tu a yiu sure chi kwang.

³ Aya ka mwang maka wuka niye, kedu wuka nii a yindu chi mun maditu we.

⁴ Chi ti̱yilitu mun maditu, ma n lailaye. Te wu a diye wu ki̱ku ka ti̱ti̱le chi mun madite, ka ni̱n ki̱ti̱me mo.

Miyaku a twa̱ba̱ku

⁵ “We ya̱m twa̱ba̱ku buniyangi̱mu, ti̱kaduwe tiyang ni̱bu di̱bebelin bi̱bu ki̱twa̱ba bunitu a fi tiye we kambi muraku ni̱bu Yafudamitu n ti neti̱ loyu ko ke ni̱bu a ku chi. Bi̱yili̱m mi̱n fwa chimi̱nu, a tu a yiu ki̱ti̱me chi.

⁶ Ka ya mun twa̱ba̱ bunite, yinge dur munu a kan, twa̱ba̱ bunitu we di̱Tewuduwe, n ki̱n wu niyang kube, wu ki̱ku ti̱lairite, ka ni̱n ki̱ti̱me mo.

⁷ Ka yati̱ twa̱ba̱ bunite, ti̱bwidu ya̱muwe tiyangu bi̱bu a yimbu Kwamamu ki̱madangu, n chi ko kate ka nwe chidu di̱ne nabwe ya̱me.

⁸ Ti̱maduwe nang chi, di̱ne Te chi̱n a yim chi ti̱baditu kasi no nang ki̱dangu ta tibu fwa ya̱ma̱ngu.

⁹ “Ti̱twa̱ba̱ buniti ying, Te ni̱n wu a diye, di̱n muni wauwadu.

¹⁰ Yaa mo a be, yo ni̱n ma we ti̱ti̱nitu, tiyangu wenga bwadiyangu.

¹¹ Ni ni̱n chabtu ti̱ditu.

¹² Du ni̱mi̱n ki̱leti niyu, tiyangu ni̱n du bi̱bu ki̱ma ni̱mi̱n ki̱letimu.

¹³ Yo ni̱n ledu sweki̱ku we, aya yu ni̱n we bwila.

¹⁴ “Ka ti̱du bi̱bu a ma chimi̱n ki̱letimu mi̱n ki̱leti chiye, n Te chi̱n wu a diye ka du chimi̱n ti̱nu.

¹⁵ Ka ta du ni̱bu mi̱nbu ki̱leti chiye. N Te chi̱n wu a diye a ne du chimi̱n ti̱nu.”

Miyaku a dimwen

¹⁶ “Ka yati̱ da̱u dimwene, ti̱kaiyu kabi̱ni we tiyangu ni̱bu di̱bebelinu ki̱madangu yo ki̱ da̱u dimwene. N chi ki̱kai kabi̱ni chiyu di̱ne ke chi yung ni̱bu ko chi ma dimwen. Bi̱yili̱m mi̱n fwa chimi̱nu, n chi a yiu sure chi di̱mbi̱ri̱m.

¹⁷ Aya ka mun ma dimwen, fu kabumo, wa ti̱ki̱nung we dur munu Yinangu mun madi kwadangu.

¹⁸ Di̱ne ke ni̱bu a yinduwe ko mun ma dimwen. Te wu mwang kube, wu a yim chiti kwange ka ni̱n ki̱ti̱me mo.”

Ti̱yo ni̱ru a lo wu a bwadiye

¹⁹ Ti̱mur yichiyu mi̱nu kuliti we ti̱ti̱nitu, fi ki̱bwa̱ta n ti fi sa̱ngre a ne ka kaiye n ti fi dabi̱kum a ne ka wure.

²⁰ Aya ti̱mur yichiyu mi̱n kulitu a bwadi, fi ki̱bwa̱ta n ti sa̱ngre a ne ka kaiyinde n ti fi dabi̱kum a ne ka wure.

²¹ Di̱ne fi kuli mwitu we mi̱ne, nang fi ni̱r munu wetuwe.

Yiiku bwiyang

²² “Nu nang yiiku bwiyangu, ka nu mo ki̱ni li̱mange, bwiyi kwang ka ya yiiku.

²³ Aya ka numo a ne li̱mang wenge, bwiyi kwang ka kwala yiiki̱ku. Ka yiiku bwiyangi ki̱liye, ki̱liye ka su ki̱nati̱ng.”

Mwang bunti̱ Kwama ka kuliya

²⁴ A ne nii ka sii ni̱bu lomi burabe we. A mwintuwe n ki̱n ka ko wuka, ka ke wuka, ka ka nii dukan ki̱nu a wu wiine, ka du wuka. A ne da we mwang bunti̱ Kwama n ti ka̱mbi̱r ki̱da kiin.

Ti̱yo ni̱ru a di̱Kwama

²⁵ Di̱ne yiko mi̱n fwa chimi̱nu, ti̱kuradu chiwe chabti̱tu ta chaditu n ti chi ta node, ka kuli̱n di̱du ta dodu a bwiyine. Ti̱kuritu a labu chabti̱ta? Yinu bwiyu a labu kuli̱n di̱dori̱na?

²⁶ Ti̱da̱ng ki̱ni̱biyu, n chi a fibu chi, a kabbu chi, a murbi̱ chi we bi̱ni chiyu. N Te chi̱n wu a diye ki̱chadu ki̱ni chi. N ti̱n ta labu ki̱ni̱biya?

²⁷ N wure we tibe chi̱n di̱ne ti̱kuran kitu ka suddu ka awa wiine?

²⁸ Yinu a mayire ta kai ni̱ru we chi ta dodite? Ti̱da̱ng fili̱ntu we di̱kiru tiyangu ki̱dwiyedu, n chi a mabu nangang ka̱mbi̱rang a kubuti̱bu kuli̱n.

²⁹ Aya mi̱n fwa chimi̱nu, kasi no m Mai Solomon n ti dwiyen kitu, a doonbu kuli̱n leran di̱du we tiyang fili̱ntu.

³⁰ Ka n Kwama ka ywa̱ta swa̱ki̱ku a di̱kirinu mi̱ndiye, ti̱tu diwu ki̱ni ti̱kuri fi̱nenang ki̱le ki̱rangite, a ne ma chimi̱n ti̱tu a la Yeta, n ti̱n bi̱bu keku bi̱yili̱mang changu a ki̱tani̱mu.

³¹ Di̱ne yiko, ti̱kuradu chiwe tiko, “Nang chau wureni, ka nang no wureniye, ka niing do wureniye?”

³² We kuu ni̱bu bi̱bu a yimbu Kwamamu, ti̱tu nang chi a mabu ti̱kali ki̱ne. Aya Te chi̱n wu a diye a yim ti̱badu.

³³ Aya a la chi ti̱bau Yaa Kwama n ti yile ko, ti̱tu chi kwang ka nii chi̱nu.

³⁴ Di̱ne yiko, ti̱kuradu chiwe ya̱m fi̱nenangi̱mu, di̱ne fi̱nenangu n wu Kwama. Kanang wuwule diye ki̱ni wuko riye.