Matta 5 - Bwaki Kifwiyang

Miyaku a bale kunne

¹ Yo n Yesu a ku ki̱tuu ni̱be, a fi̱l bale kunne a swe we, miyari̱m ki̱mu a swe ki̱mi̱ntuwe,

² a mwe ki̱miya chi mi̱nu.

Delaku ki̱yilang

³ “Ni̱bu delaki̱m bi̱bu a yim ki̱taku chiyangi̱mu, Yaa Kwama n wu chi.

⁴ Ni̱bu delaki̱m, bi̱bu ni̱tu chitu a kaiyani̱mu, n Kwama ka kire chi mi̱nu.

⁵ Ni̱bu delaki̱m bi̱bu a kukubu dutu chiti̱mu, ka chau ti̱ti̱nitu.

⁶ Ni̱bu delaki̱m bi̱bu ni̱tu chitu ki̱baddu ka tum chi n Kwama ki̱badde, n Kwama ka ri chimi̱ndi chib.

⁷ Ni̱bu delaki̱m bi̱bu ki̱nwe ki̱bunemu, n Kwama ka nwe ki̱bune chi ti̱n.

⁸ Ni̱bu delaki̱m bi̱bu ni̱tu chiti wa̱la̱k, Nangki̱n, n chi ka ku Kwama.

⁹ Ni̱bu delaki̱m bi̱bu ki̱yo kunkaki̱mu ka yal chidu ko bwesi̱m Kwama.

¹⁰ Ni̱bu delaki̱m bi̱bu ki̱nwe riye di̱ne yilemu Yaa Kwama n wu chi.

¹¹ “Ni̱bu delaki̱m n ti̱n bi̱bu ni̱bu ki̱mi̱ki̱ chi̱nu, ki̱fumachi̱nu, ki̱mwe chimi̱n kasi no bi̱bi̱le ki̱duum ti̱kwanim di̱ne mi̱ni̱mu.

¹² Ti̱ma ti̱mi̱lan ki̱ni furi mwemwe di̱ne ki̱ti̱me chi̱n wuduwe we bwa diye, di̱ne a lakanbu n ti kangu n chi a ma ki̱ni fa̱kubu feredimu.

Bum n ti yiiku

¹³ “N ti̱n nang bum ti̱ti̱nimu. Aya ka li̱mang bumangu a riye, yili̱me ko ka ki̱lawedi yire? Bwa kake a ne chi ni madi ki̱ne we, ka n ke ni fwalu a bwa, ni̱bu ka fabadi naniye.”

¹⁴ “N ti̱n nang yiiku ti̱ti̱niyangu. Yinang bi̱n di̱du a di a kunni tasi̱n.

¹⁵ Sunti̱du kwefi̱ra we fiti̱la mo! A la chi ni yodu a ti̱du, ko ke a yii ka nang bwa̱le kwang.

¹⁶ A fiwine, ti̱yung yiiku changu, ke ni̱bu a ku, a swaan nangi̱ri chi̱ntu, a dela Kwama wu a diye.”

Miyaku a yili̱n

¹⁷ “Ti̱kamaduwe ti kanodu m be mang kwi yili̱n Musatu n ti chi fa̱kubu a miyanitu, mang bebu kwiku aya m be ke n ri ya̱m bi̱bu.

¹⁸ Mi̱n fwa chimi̱n bi̱yili̱m, ka dii n ti ti̱ti̱nitu we ki̱yade, a ne chi a ne ride we. Ka ki̱kwi ya̱me, ka ti̱tu ni̱bu ki̱kudu ko n ke ti̱kan chite.

¹⁹ Di̱ne yiko, nii wu ka ki kaang yilang kasi no nang ki̱ti̱rangu we yili̱n ti̱tu yinu ka miya bi̱kam mi̱nu ko a ma ti̱ni yiko, ka kau wuti̱re we Yaa Kwama. We yiko, wu ka bunti̱ yilangu ka miya ni̱bu mi̱nti̱nu ko a nang bunti̱ne, ka ya dwiyen ti̱dui we Yaa Kwama.

²⁰ Mi̱n fwa chimi̱nu, a dakan yile chi̱n ka la wu ni̱bu yungku yili̱n Musati̱mu n ti ni̱bu Farisamu. Ka a newe yiko, a ne ta le yaa wu a diye ko bayim.”

Miyaku a ki̱fwini

²¹ “Ti̱nwe ni̱bu a yi tukebu chi̱remu ko, ‘Chidu ni we. Wu ka chi̱u niye, ka ya mwataku.’

²² Aya m mi̱n, mi̱n yi chi̱nu mi: Ni ki̱ma ki̱fwini n ti ke ko ka ya mwataku. Ti̱nti̱ne, wu ka yi keko ko, ‘M mun nii wu kuse,’ ka ya kakku kwa̱l kabaki̱n. Yinu wu ka tu keko ko, ‘Di̱rre,’ ka wuran bwi ki̱ni far ki̱ran.”

²³ Di̱ne yiko, ka mun yadu mwang ma niku a se Kwama, yinu n kur chi mwang ma ke mo mi̱ne,

²⁴ du niku mwangu we se Kwama, yan doka we ti kemo didin, yinu m be ni niku mwangu.

²⁵ “Do tibe mo datu n ti fakwaremo wu ki̱yadu ka yali̱nu a kan kabaki̱ fanseti. Ti̱doka we wa̱re yo ta tibu lam kan kabaki̱ ne, ka newe yiko, ka dunu n ti Mai kabake, wuko ka dunu n ti di̱karan, di̱karanu ka mari̱nu a di̱bi̱nti̱l.

²⁶ Bi̱yili̱m mi̱n fwa mi̱nu, a ne mwang chiredu ka mwang febu di̱si̱nu ki̱ni kwange.”

Miyaku a ti̱kuli

²⁷ “Ti̱nwe a fwa chimi̱n ko, ‘Madu ti̱kuli we.’

²⁸ Aya mi̱n fwa chimi̱nu, ‘Ka nii a da̱ng naye ri̱i̱ng, a kubene, a tu a ma ti̱kulitu n ti naye wuko we ni̱r ki̱nu.’ ”

²⁹ Di̱ne yiko, “Ka nu wu a kang ki̱yilange ki̱yonu ki̱ni ki̱lenge, chaku n mau a bwa, a la chi mwang kwala balangi kiin we bwiyu n ti ki̱ku bwiyi kwang ka le ki̱rangangu.

³⁰ Ka fa̱la̱ng ki̱yilangu nang ki̱ku ki̱bedu ki̱ni ki̱lenge, chaku n mau a bwa. Ka la chi mwang kwala balangi kiin n ti ki̱ku bwiyi kwang ka le ki̱rangangu.”

Miyaku a chiku ki̱nang

³¹ Ni̱bu a fwa chimi̱n ti̱n ko, “Ni ka chi̱u naye ko mi̱n ki̱na, ka nii naye ko lwangi̱n chiku ki̱nanu.

³² Aya mi̱n fwa chimi̱nu, ‘Ni ka chi̱u ki̱na we naye ko, ka n ke di̱ne yariye, a yo naye ki̱ni sulai.’ Aya wu ka yiu naye, ki̱ma ti̱kuli.”

Miyaku a di̱twa̱mbi̱r

³³ Yinu ti̱ nwe a yi tukebi̱ chi̱remu ko, “A twa̱ndu ti̱kwanitu we, aya ri chi mwan bwa̱u mwang ni Tewuduwe.

³⁴ Aya mi̱n fwa chimi̱nu, ti̱twandu chi we, ko bayim ka ki̱ni bwa diye, di̱ne kweer Kwama.

³⁵ Ka ki̱ni ti̱ti̱niye, di̱ne nang fi ki̱fwali̱n naniye. Ka ki̱ni Wurchalima di̱ne nang bi̱n Mai Wuduwenu.

³⁶ Twa̱nduwe ki̱ni dur mun di̱ne kasi no ki̱riyangi kiin a ne mwang medu mwang sutedi tweng ka ki̱liye.

³⁷ A dakan ya̱m chimu kanodu ‘ngo’ ka ‘ngango.’ Ka a su ti̱te n ti̱u fakware.”

Miyaku a ki̱yerang

³⁸ Ti̱nwe a fwa ko, “Kwalange di̱ne kwalange, nuum di̱ne nuum.

³⁹ Aya mi̱n fwa chimi̱nu, ti̱yeduwe ka nii a ngan a di̱dane, yo ki̱mi̱nti̱ di̱kanu a ngau ti̱n.

⁴⁰ Ka wuka nii a mar keme di̱ne ke a yiti̱n belukemo, chaku wuduwe niti̱ ki̱n.

⁴¹ Ka wuka nii wu ki̱ni dukane a mwintuwe ko ti̱ya yayu wu a si̱re wiine, ti̱ya wu a si̱ri yurabu.

⁴² Nii wu a bi̱n chiye, ni. Wu a be ki̱bau di̱si̱ne, dangduwe we.”

Ke ki̱ni bi̱bu a koni̱mu

⁴³ Ti̱nwe a yi chi ko, “Mi̱la kemo, ko fakware mo.

⁴⁴ Aya mi̱n yi chi̱nu mi, mi̱la fakwarbu mumu, twa̱ba̱ bi̱bu ki̱fumani̱mu mi̱n.

⁴⁵ Ke ti̱kau bwesi̱m Te wu a diye, n ki̱n ki̱yo dii ki̱fwe kuko we ni̱bu bi̱yili̱m n ti̱ bi̱bwilamu. Ti̱nti̱ne, ki̱tume mwe we ni̱bu yilemu n ti bi̱bu a tumbu yilemu.

⁴⁶ Ka ti̱mi̱la kana bi̱bu ki̱mi̱la chi̱ni̱me, ta ya wuwule ki̱ti̱me? Bi̱bu ki̱yiu sangkali̱mu ki̱ma ti̱ni yiko?

⁴⁷ Ka ti̱si kana kebu chime, ti̱lakan a file n ti bi̱kamu? N ke chi bi̱bu a yimbu Kwamamu ki̱ma ti̱na?

⁴⁸ Ti̱buli̱m yichiyu ki̱ni yile, ti̱ri ki̱ni yile yinangu Te chi̱n wu a diye a ri ki̱nangu.”