Matta 4 - Bwaki Kifwiyang

Fakware a swe Yesu

¹ Fi̱ki̱m Kwamamu a yikani ki̱ni Yesu a di̱si̱lachangi̱n ko ke n Setan a swe ki̱n.

² A kuteng ki̱ku a da̱u dimwen diti wan taana, kum n ti kukongu, chun a bu ki̱n.

³ Fakware, naba swa̱ka̱ke, a be we di̱ki̱ne ko, “Ka mun nang Bwe Kwama, yi kali yiyu mwi a kau ki̱danne.”

⁴ N Yesu a ke ko, “A mwal ko, ‘Chi ki̱nii ti̱kuriye n ke kana chabtu. Aya ka nang di̱di̱le di̱kwa̱l di̱du ki̱chiredu a di̱Kwamane.’ ”

⁵ Yinu n Setan a ki̱la yal Yesu, a yika Wurchalima, a fi a suu a la chi we Kan Kwama di̱duna Wurchalimanu.

⁶ A yi ki̱n ko, “Ka mun nang Bwe Kwama, rii sutubu we ti̱mu, di̱ne a mwal ko, ‘N Ki̱n ka yi ni̱bu ti̱tumbi̱ri ki̱mu ya̱m. Ka konu ki̱ni fa̱li chi Ko ke ngaudu bewure.’ ”

⁷ Yinu n Yesu a yiti̱ ki̱n ko, “A mwalmwale, a ne mwang swe Tewuduwe Kwama mo!”

⁸ N Setan a ki̱la yal ki̱n a di̱kun di̱swa̱mi̱n, fi a ya yungi̱n ki̱n yaati ti̱ti̱niyu n ti dwiyen chi̱tu kwang.

⁹ Yinu a yi ki̱n ko, “Ka n sung, n siiye, mang ni̱nu ki̱ni kwang.”

¹⁰ N Yesu a yi ki̱n ko, “Setan, yika mi̱n a fi! A mwal ko, ‘Dela Tewuduwe Kwama, sii ki̱n ki̱kun!’ ”

¹¹ Yinu n Setan a du ki̱n. Ni̱bu ti̱tumbi̱ri Kwamamu a be, a dela ki̱n.

Yesu a mwe nangang kangu a Ka̱lili

¹² Yo n Yesu a nwe ko n Yowana a le di̱bi̱nti̱le, a kun a yika Ka̱lili.

¹³ N ki̱n a du Nasa̱ret a ki̱la Kafanawu wu a ki̱ti̱ku La wurdune, wu a ki̱dire ti̱m Chabulum n ti Nafi̱taliye.

¹⁴ Ke a ri chi fa̱ku Yichaya a fwaatu ko,

¹⁵ “Ti̱nwei, ni̱bu Chabulum n ti ni̱bu Nafi̱talimu, n ti̱n bi̱bu ta da a wa̱re la wurduni̱mu n ti kangu ba̱la̱ng we ki̱ti̱ku Wurduni̱mu, n ti kuu Ka̱lili bi̱bu ni̱bu n ke ni̱bu Yafudam a dawemu.

¹⁶ Ni̱bu bi̱bu a no swe a da ki̱liyemu, a ku yiiki̱ku, Bi̱bu a no swe a ki̱liye ki̱letiyemu, a ya yiiki̱ku.”

¹⁷ A mwetuwe ki̱dang kangu, n Yesu ki̱ma di̱mwaru ko, “Ti̱wo ki̱ti̱mu, di̱ne Yaa Kwama a mwatawe.”

Miyari̱mu n Yesu a mwe a yali̱mu

¹⁸ Aya n Yesu ki̱yadu a ki̱ti̱ku la Ka̱liliyang, a ku kebu chi burau ki̱ tau chi̱ngi, n Simun wu ki̱yalu ko m Biti̱r n ti keko n Andi̱riya. N chi ki̱mau dwa̱kai chiyu a far di̱dun di̱ne n chi ki̱tabachi̱ngiye.

¹⁹ N Yesu a yal chi ko, “Ti̱bumite, mang miya chimi̱nu tani̱n yale ni̱bu ka bumiti̱ni̱m.”

²⁰ Bi̱nabi̱na bi̱ki̱mu a kaibu ki̱swi a du kuli̱n chi̱nu, a bunti̱ Yesu.

²¹ Ki̱du fikoye, a ku bi̱kam kebu chi burau, n Yakubu bwe Sa̱badi n ti keko n Yowana. N chi a fi̱l kwa̱mbi̱re mwe ki̱do dwa̱kai chiyu n ti te chi n Sa̱badi, n Yesu a yalti̱ chi we fiko.

²² Bi̱nabi̱na n chi a du te chi we kwa̱mbi̱re mwe a bunti̱ Yesu.

N Yesu a ma mayaku a beti̱n buri̱ntu

²³ N Yesu ki̱bwa̱lu we Ka̱lili ki̱miyadu we kambi muraku ni̱bu Yafudamitu, ki̱mwa ya̱m bi̱li̱m bi̱bu a Yaa Kwamamu, ki̱bera buri̱n ti kwang n ti bi̱bu bwiyu a li̱mbi̱mu.

²⁴ Ya̱m Yesumu a ti̱ran we ti̱m Suriyami kwang. Ni̱bu a le ki̱be ki̱mi̱nedu ki̱ni ni̱bu buri̱ni̱mu nabwen n ti bi̱bu bwiyu a li̱mbi̱mu n ti ni̱bu ki̱nwe riyemu n ti ni̱bu ki̱fi̱bti n ti bi̱bu ki̱kuli ki̱madi̱mu n ti bi̱ngi̱rmani̱mi kwang, a ya beku.

²⁵ Ki̱tuu ni̱be nabwen a bunti̱ ki̱n we Ka̱lili n ti Dikafoli, n ti Wurchalima n ti Yafudiya n ti ti̱mu a wuka ki̱swi la Wurdune.