Matta 21 - Bwaki Kifwiyang

N Yesu a le Wurchalima

¹ Yo n chi a lam Wurchalima a ya be bi̱ne Betafachi wu a Kun di̱du ki̱ni tini Setuniye, n Yesu a tum miyari̱m ki̱mi burabu.

² A yi chi ko, ti̱ya be bi̱ne wu a kakku change, ta ya kuri̱nge n ti be le kurunge we, ti̱kwimiye, ti̱be miyengi ki̱n.

³ Ka wuka nii ka yi chi̱n ya̱me, ti yi ko, “N Tewuduwe ki̱baddu, a ne kai ki̱swi ka ni chi̱nu.”

⁴ Ti̱tu a fwe ke a ri chi fa̱ku a fwaatu ko,

⁵ “Ti̱yi ni̱bu Siyona ko, ‘Da̱ng Mai chi̱n ki̱be bwa di̱chi̱ne, ki̱n naba bwanuwe a fi̱le kurunge ki̱bedu a le kurunge.’ ”

⁶ Miyari̱mu a ya mati̱ chi n Yesu a fwa chi mi̱nitu.

⁷ Yo n chi a be ki̱ni kurunge n ti le ko, a mau lukei chiyu we kurungetiyu. N Yesu a fi̱l a swe we le.

⁸ Ki̱tuu ni̱be ki̱mau lukei chiyu we wa̱re, bi̱kamu ki̱kiya lwangi̱ntu we ki̱yangtiyu ki̱madu we wa̱re.

⁹ Ki̱tu ni̱be a kakke n ti bi̱bu ki̱nabi̱di̱mu ki̱ngau kwa̱ki̱ru ko, “Dwiyentu n ti̱u Bwe Dauda! Naba delake wu ki̱bedu a di̱n Tewuduwe ne! Wa diye a lwe delaku.”

¹⁰ Yo n Yesu a le Wurchalima, ni̱bu ki̱ni kwang a kun a titiye, ki̱yidu ko, wu n wure?

¹¹ Ni̱bu ki̱bunti̱ Yesumu a ke ko, “Wu nang Yesu fa̱ku wu a chire a Nasa̱ret wu a bi̱n Ka̱lili.”

N Yesu a do Kan Kwamanu

¹² N Yesu a le Kan Kwamanu a Wurchalimanu a kaka ni̱bu ki̱feku chi n ti bi̱bu ki̱ta̱n chimu we mure Kan Kwamane, n ki̱n a yila teburitu ni̱bu ki̱suten ka̱mbi̱ritu n ti ti̱tu a ni̱bu ki̱feku ki̱kubtitu.

¹³ N Yesu a yi chi ko, “A mwalmwale, ‘Ka yal lomi ko lo twa̱ba̱ke,’ aya ti̱yo a kau lon dabi̱kume.”

¹⁴ Yinu ki̱dubi̱bu n ti ki̱kubtiyu a be we Kan Kwamanu a Wurchalimanu. N ki̱n a bera chi.

¹⁵ Aya yo wuduwe fansetiye n ti ni̱bu yungku yili̱ni̱mu a ku chi ka̱ta̱ki ti̱te, n chi a kai ni̱r aya bwesi̱mu ki̱dela Kwama ko, “Bwe Dauda yiu dwiyentu ki̱diya kwadu.”

¹⁶ A yi ki̱n ko, “We mun nwe chitu bi̱bu ki̱fwadita?” N Yesu a yi chi ko, “Ngo, ta kiba, taki̱da Kwama yinang a fwa ko, ‘N miya kana bwesi̱m bi̱ti̱ri̱mu n ti bwesi̱m ki̱lwiyimu mi̱n delaka?’ ”

¹⁷ A du chi we bi̱nu a yika Betani, a ya da bwako.

N Yesu a kai tiyang sinangu

¹⁸ Ki̱ni si̱n yo a kun ki̱ki̱lade, chun a bu ki̱n.

¹⁹ N ki̱n a ku tiyang sinangu we wa̱re, a tubu chi, a yi tiyangu ko, “Ne mwan tu ti̱kulantu ki̱diya kwadu.” Bi̱nabi̱na lwangi̱n tiyangitu a bwa wuri̱m.

²⁰ Yo miyari̱m ki̱mu a ku chitu a fweete, a ya̱r yii, a yi ko, “A mayire tiyang sinangu a bwa dati̱date?”

²¹ N Yesu a ki̱nta chi a yi ko, “Bi̱yili̱m mi̱n fwa chimi̱nu, ka n ti̱ni ki̱ni keku bi̱yili̱mang ta kamabu chiye, ta ma chi a la ti̱ta tiyang sinangu kutan. Ta medu ta yi kunnu tiko, yikan, fi̱tana nabwe la, ka fwe ti̱nu.

²² Ka ti̱ke bi̱yili̱me, chi ta bi̱diti kwang we twa̱ba̱ku, ta yadu.”

Ni̱bu ki̱kama dukan Yesunu

²³ Yo n Yesu a le Kan Kwamane, tikaketi fanseti n ti seli̱bu a yi ko, “Mun ma nangri ti̱ti ki̱ni di̱di̱le dukan, n wure a ni̱n dukan di̱du?”

²⁴ N Yesu a ke ko, “Mang ma chimi̱n di̱bi̱du, ka ti̱ni di̱ki̱li̱ne, mang fwa chimi̱nu ka mi̱n ma nangri ti̱ti ki̱ni di̱di̱le dukane.

²⁵ N Yowana a ya dukanu ki̱mang batisma nu a fi̱re? A di̱Kwamanga ka a ni̱ba?” N chi a twayan we yichiyu ki̱yidu ko, “Ka ni yiko a di̱Kwama, ka yidu ko a mayire ta kebu bi̱yili̱mu we di̱Yowana?

²⁶ Aya ka ni yi ko a niye, ni le fi̱re we ni̱bu, di̱ne n chi a ke ko n Yowana fa̱ku.”

²⁷ A yi Yesu ko, “Nang yimbu.” Yinu n Yesu a yi chi ko, “Mi̱n ne mang fwa chimi̱nu ka mi̱n ma nangri ti̱ti ki̱ni di̱di̱le dukane.”

Baltaku a nii wu ki̱ni bwesi̱m kwartabi̱ burabe

²⁸ Yesu a chakakku ko, “Ti̱da̱ngi yire? Wuka ni ki̱ni bwesi̱mi burau bi̱bari̱m, a ya we wu kakke a yi ko, ‘Bwemi, ya ma nangangu we ku yinabe diwu.’

²⁹ Bwe a yi ko, ‘Mang yabu.’ A kuteng ki̱ku a kun a ya.

³⁰ Yinu te a ki̱la bwa wu robe a yi ti̱n wuko yiko ti̱n. Wuko a ke ko, ‘Mang yadu tete.’ A kuteng ki̱ku a yabu.

³¹ We tibe chi wuwule a ma chii n te ki̱n ki̱badditu?” N chi a ke ko, “Nang wu kakke.” N Yesu a yi chi ko, “Bi̱yili̱m mi̱n fwa chimi̱nu, bi̱bu ki̱yiu sangkali̱mu n ti ti̱banitu ka tu chi̱nu we Yaa Kwama.

³² Aya n Yowana a be ka yung chi̱n wa̱re yile, ta kebu bi̱yili̱mu we di̱ki̱ne aya ni̱bu ki̱yiu sangkali̱mu n ti ti̱banitu a ke bi̱yili̱mu. Ki̱ni yiko, ta wobu ki̱ti̱mu ta keti̱bu bi̱yili̱mu.

Baltaku a ni̱bu nangam a ku yinabiye

³³ “Ti̱nwe ki̱ku baltaku, wuka nii we wu a fi ku yinabe, a kwa̱r kuu ko ki̱ni kali, a yoti̱ di̱kulenu kani̱n yammi̱n yinabi we kuu n ti tiyangu kani̱n ton ya̱ma̱ngu. A ni bi̱kam ni̱bu kuu ko a nang sudu, a yika ti̱n.

³⁴ Yo ki̱swi kakke a lame, a tum kabi kiyu we ni̱bu ki̱sudumu ko a yiu ki̱mi̱ne ti̱kulantu.

³⁵ Bi̱ki̱mu a tau kabi yiyu, a ngau wuka, a chi̱u wuka, a kwelati̱ wu tare.

³⁶ N ki̱n a ki̱la tumti̱ bi̱kam ka̱bi a la bi̱kaki̱mu ki̱ni nabwentu. Bi̱ki̱mu a ma chimi̱nte yinanga ma bi̱kamangu.

³⁷ A kuteng ki̱ku, a tum chi mi̱n bwe ko si̱ne ko, ka ku ki̱siyang bwe miyangu.

³⁸ Yo ni̱bu sukumu a ku bwe, a fwa we bwiti chiyu ko, ‘Bwe ka chau kula nau, yani chi̱u ki̱n ni chati̱ kula ko.’

³⁹ N chi a tau ki̱n, a mau ki̱n, a kuteng yaa kwale ku yinabe, a chi̱u ki̱n.

⁴⁰ “Ka naba lo kuu yinabe a benge, ka ma ni̱bu suki̱m bi̱bi yire?”

⁴¹ N chi a yi ko, “N ki̱n ka chi̱u ni̱bu bi̱bwilam bi̱bu. N ki̱n ka ni bi̱kam ni̱bu kuu yinabe bi̱bu ka ni ki̱n ki̱ti̱me yoko ka mur chabti̱te.”

⁴² N Yesu a yi chi ko, “Ta kibuwe tattiki̱dai Kwamanga? ‘Kale wu ni̱bu mukki̱m a konge, nang kale a da a la chiye. N Tewuduwe a ma ti̱tu, a kau chi ya̱r yii, we di̱chire.’

⁴³ “Di̱ne yiko, mi̱n fwa chimi̱nu, kuuti ka yitu chi̱n Yaa Kwama, ka ni ni̱bu ki̱ma nangang ki̱yilangu.”

⁴⁴ [Wu ka yaru we kale ka wuredi bi̱si̱l, aya wu kwam ka yarti̱nuwe, ka kwa ki̱nu yinang kur ki̱ti̱n.]

⁴⁵ Yo tikaketi fanseti n ti ni̱bu Farisamu a nwe ki̱ku baltaku Yesunge, a yim ko ki̱fwa ya̱mu a dur chi̱n.

⁴⁶ N chi a bau wa̱re ka tan ki̱ne aya ki̱nwe tayi ki̱tuu ni̱beyu, di̱ne a ke ko n Yesu fa̱ku.