Matta 2 - Bwaki Kifwiyang

Siram ni̱bu yingki̱m chi a twiye

¹ A kuteng ki̱ku a bi̱u Yesu a bi̱n Beti̱lami di̱du a ti̱m Yafudiya, we ki̱dangu n Yiridu nang mai ki̱chau mati̱ne. Bi̱kam ni̱bu yingki̱m chi a twiye a chire a bwa twa̱re a be Wurchalima, a ma di̱bi̱du ko,

² “A bwa̱le Mai ni̱bu Yafudam wu fwiye ni̱bu a bi̱be? Di̱ne ni̱n kuwe ki̱swi ko we bwa twa̱re, ni̱n be nang sii ki̱nu.”

³ Yo m Mai Yiridu a nwe ya̱m bi̱be, ni̱r ki̱nu a ti̱ren, a bwinbu nii we Wurchalima.

⁴ Yinu n ki̱n a mur bi̱dum fansetiye n ti ni̱bu yungku yili̱n Musantu, a bi̱u chi finu ni̱ba bi̱n Masiya.

⁵ N chi a yi ki̱n ko, “A bi̱n Beti̱lami di̱du a ti̱m Yafudiya, nangki̱n fa̱ku a mwal ko,

⁶ ‘M mun Beti̱lami bi̱n di̱du a ti̱m Yafudan, m mun n ke bi̱n di̱ti̱ri̱n we bi̱bu ka ma mati̱n Yafudati̱mu. Mai ka chiredu we di̱mune, wu ka kau naba tore ni̱bu mi̱me, ka nang chikiye Yisrela.’ ”

⁷ N Yiridu a yale ni̱bu yinki̱m twiyemu i daan a swe ware n ti chi n chikun, a bi̱u chi ki̱dangu n chi a kuun ki̱swiyangu.

⁸ N ki̱n a tum chi we Beti̱lami ko, “Yati̱ ta̱l miye ya̱m bwe wumu yinang. Kati̱ ya bi̱yili̱me, ti̱ki̱lawe be ti̱fwami, ke n ya, n sii ki̱n ti̱n.”

⁹ Yo n chi a nwe ya̱m maime, a yika ti̱n. Yo a yaki̱ yikadu we wa̱re, ki̱swi n chi a no ku a twa̱re, a fwetewe a kakku chiyang, n chi a nabu ki̱swi a lanti̱ fi a bi̱n bwe.

¹⁰ Yo n chi a ku ki̱swiye, a ma furi mwen.

¹¹ N chi a le lo, a ya bwe n ti neki̱n m Maryamu. N chi a sung a sii ki̱n. Yinu a kwi kuli̱n chi̱nu, a ni ki̱li̱mang sinariyang n ti ti̱nungri ti̱ti fi̱rfi̱ri ti̱tu ki̱yalu ko luban n ti muri.

¹² Yo n chi a yaki̱ ki̱la ti̱m chime, a bunti̱ wuka wa̱re di̱ne n Kwama a wu chimi̱n ki̱tele a dwakam ko a ki̱ladu bwa a di̱Yiridu se we.

Yusufu n ti Maryamu a wul Masar

¹³ Yo ni̱bu yingki̱m a yikane, wuka naba di̱tumbi̱re Tewuduwe a mwa Yusufu a dwakam ko, “Kun, da̱u bwemo n ti ne ki̱n, ti̱yika Masar yati̱ swe a bwako, ka lami̱nti̱ yo mang yal chi̱n ne, di̱ne m Mai Yiridu ki̱baddu ka chi̱u bwe.”

¹⁴ N Yusufu a kun we kum wuko a da̱u bwe n ti ne ki̱n a yikan Masar.

¹⁵ N ki̱n a swe we bwako a lami̱nti̱ yo n Yiridu a bwange. Ti̱tu a fwe yiko ke a ri chi n Tewuduwe a fwa a yii fa̱kubu ko, “N yale bwemi a Masar.”

Bwesi̱m a bwaran a Beti̱lami

¹⁶ Yo n Yiridu a swaan ko ni̱bu yingki̱m a buti̱ ki̱ne, ni̱r ki̱nu a kaiyan. Di̱ne ki̱fwiniye, n ki̱n a na yilang ko ni̱bu a chiben bwesi̱m bi̱bari̱mu a lam swa̱ti turabi̱mu n ti bi̱bu a lambi̱mu we Beti̱lami n ti bi̱bu a ki̱dire Beti̱lamimu ki̱ni kwang. N ki̱n a bunti̱ chi ni̱bu yingku chi a twiyemu a fwa ki̱mi̱n we bi̱be bwetu.

¹⁷ Nang ki̱swi wu ya̱m Fa̱ku n Yirmiya a ri mi̱ne ko,

¹⁸ “N nwe keme a Rama, wii furi ki̱liki̱li di̱dune. Rayila ki̱kii wii di̱ne bwesi̱m ki̱mu, A kebu wuka nii ka kire ki̱mi̱nu, di̱ne n chi a bwa.”

N Yusufu a ki̱la Nasa̱ret

¹⁹ A kuteng ki̱ku n Yiridu a bwangu, naba di̱tumbi̱re Tewuduwe a mwa Yusufu a dwakam we Masar ko,

²⁰ “Kun, da̱u bwe ti neki̱n ti̱yika Yisrela, di̱ne ni̱bu ki̱baddu ka chi̱u Bwemu a bwaran.”

²¹ Yinu a kun a da̱u loko a yika ti̱m Yisrela.

²² Yinangu n ki̱n a nwe ko n Arkilayu bwe Yiridu ki̱chau kula te ki̱ne we mati̱n Yafudiya tangu, tayi a tau ki̱n di̱ne bwe Yiridu. N Kwama a wu ki̱mi̱n ki̱tele a dwakam, yinu n ki̱n a twa̱ng a yika ti̱m Ka̱lili.

²³ N ki̱n a ya swe a di̱kan bi̱n di̱du ni̱bu ki̱yalu ko Nasa̱reti̱n, di̱ne ke a ri chi fa̱ku Kwama a fwa ko, “Ka yal ki̱nu ko naba Nasa̱rete.”