Matta 16 - Bwaki Kifwiyang

Bakku chi ka̱ta̱ki

¹ Ni̱bu Farisamu n ti ni̱bu Sadukiyamu a be ka swe Yesu ki̱ni di̱bi̱du ko, “Yung ni̱n di̱mwal di̱du a chi ka̱ta̱kiin di̱du a chire a bwadi.”

² N Yesu a yi chi ko, “Wuka yo ki̱ni me, dii kwa̱didi, ti̱yidu tiko fi̱nenang ti̱mu ka woradi nga̱ra̱ng.

³ Ki̱ni si̱n ka ti̱ku twiye a dili ki̱liye, ti̱yidu ko, ‘Yaka swi mwe.’ Ti̱yim dwadi wu, a chi nui chiyu a kuuwe, aya ta yimbu tiyangu ta fwa chi ki̱fwedu a ki̱dang ki̱kitu.

⁴ Ki̱dang ki̱bwilang ki̱ku ti̱kuli a ni̱bu a yimbu Kwamam, ki̱baddu ka ku chi ka̱ta̱ki, aya a ne chi ka̱ta̱kitu ka yung chi̱nitu we, ka a su ti̱ttu a di̱Yunanatu.” Yinu n Yesu a du chi a yikan.

Yis ni̱bu Farisamu n ti ni̱bu Sadukiyamu

⁵ Yo miyari̱mu a lam wuka bale we nabwe fare, yinu a kur, a tabu a yikabu ki̱ni ki̱danne.

⁶ N Yesu a yi chi ko, “Ti̱ma daandaan ki̱ni yis ni̱bu Farisamu n ti ni̱bu Sadukiyamu.”

⁷ N chi a ta̱l ya̱m bi̱bu we yichiyu a bi̱u ti̱n ko, “Di̱ne niyang bebu ki̱ni ki̱danniya?”

⁸ Di̱ne n Yesu a yim chi n chi ki̱twayadite, a bi̱u chi ko, “N ti̱n bi̱bu keku bi̱yili̱mang changi bayimi̱mu, wureni a yo ti̱twayadu we yichiyu tiko a ne ki̱danne we!

⁹ A lanta ki̱kang ta swaanba? Ti̱tabu kangu mang chabi ki̱ni ni̱bu kuniriti tunu ki̱ni ki̱danniyi yunuya? Ti̱tabu ti̱ti̱ngritu ta ri ki̱ni ti̱bukenita?

¹⁰ Ka ta tabu ki̱ni ki̱danniyi yi̱di̱bi̱n yiyu ni̱bu kuniriti taana a chabiya? Ti̱tabu ki̱ni ti̱ti̱ngri ti̱bukenitu ta karita?

¹¹ Wule a yo ta swaanbu tiko ya̱m mi̱mu n ke bi̱bu a ki̱dannime? Aya ti̱ma yi daan ki̱ni yis ni̱bu Farisamu n ti Sadukiyamu.”

¹² Yinu miyari̱mu a swaan fal ko, ya̱m yis n Yesu kiyi chidu ko a ma daani̱mu, n ke yis wu a ki̱danne, aya ki̱fwa ya̱m ti̱kwanimu ni̱bu Farisamu n ti ni̱bu Sadukiyamu ki̱miyadi̱mu.

M Biti̱r a yi ko n Yesu nang Masiya

¹³ Yo n Yesu a lam bale Kaisariya Filibu, a bi̱u Miyari̱m ki̱mu ko, “Ni̱bu ki̱yidu ko Bwe Nii n wure?”

¹⁴ N chi a ke ko, “Bi̱kamu ki̱yidu ko Yowana naba Batisma, bi̱kamu ko n fa̱ku Yiliya, bi̱kamu ko fa̱ku Yirmiya, ti̱nti̱ne bi̱kamu ko wuka fa̱ku Kwama.”

¹⁵ Yinu n ki̱n a ki̱la yi chi ko, “N ti̱nde, ti̱yidu ko m mi̱n, n wure?”

¹⁶ N Simun Biti̱r a ke ki̱mi̱n ko, “M mun nang Masiya, Bwe Kwama wukure.”

¹⁷ N Yesu a ke ki̱mi̱n a yi ko, “M mun naba delake Simun bwe Yunusa, n Kwama wu a diye nang wu a yungi̱n ya̱m bi̱be, n ke nii wu a ti̱ti̱niye.”

¹⁸ Aya mi̱n fwa mi̱nu ki̱ka̱ngu m mun Biti̱r, “Kanang chikiye m mun kwam, we kwam wu ni̱bu bunti̱ki̱ mi̱mu ka rudu we yi ki̱ri̱ng. Kasi no bwa a newe ki̱ni dukan ka yingle chi.

¹⁹ Mang ni̱n mangsoli yaa wu a diye, chitu mwang bwa̱u a ti̱ti̱nitu a bwa̱u we bwa diye aya ti̱tu mwang kwi we ti̱ti̱nitu, ka kwiyadu we bwa diye.”

²⁰ Yinu a wu miyari̱m ki̱mu mi̱n ki̱tele yinang ko, a fwadu wuka nii mi̱nu we didiin ko n ki̱n nang Masiya.

N Yesu a fwa ki̱duum bwam ki̱mu

²¹ A mwetuwe ki̱dang kangu, n Yesu ki̱fwa Miyari̱m ki̱mu mi̱nu ko, a mwintuwe ka ya Wurchalima, ka nwe riye nabwen we fa̱li tikaketi n ti wuduwe fansetiye n ti Ni̱bu yungku yili̱ni̱mu. A yi chi ko ni̱bu ka chi̱u ki̱nu, aya ka kunnu ki̱ni ti̱kuri we wu tare di.

²² M Biti̱r a ti ware a ki̱ti̱ku ki̱kwabu ki̱nu ko, “A bwin mun, Tewuduwe!” A yi ko, “Ti̱chitu wu a ne ka fwenduwe!”

²³ N Yesu a sabran, a yi Biti̱r ko, chimi̱n a fi, m mun Setan! M mun ki̱twakulang we kakku mangu. Ti̱kuran mwitu ti̱tu a nangang ti̱bwiyangi n ke ti̱tu a di̱Kwamai.

²⁴ Yinu n Yesu a yi miyari̱mu ko, “Nii a ke ka bumiti̱ne, a kuru yikiyu we, a da̱u ki̱tiyang bwang kangu, a bumiti̱ne ti̱n.

²⁵ Nangki̱n, wu ki̱bau ti̱kuri kite, ka kwaladu aya wu a kwalan ti̱kuritu di̱ne mi̱ne ka yadu.

²⁶ Ta̱ma̱ng kangu wureni ka n ya ti̱ti̱nitu n kwala ti̱kuri mwite? Ti̱nti̱ne, nii ka ni wureni, wu ka suten ti̱kuri kite?

²⁷ Nangki̱n, Bwe Nii ki̱yikadu, ka ki̱ladu ki̱ni dwiyen Te ki̱nitu, ki̱ni ni̱bu ti̱tumbi̱ri ki̱mu, yinu n ki̱n ka ni ka nang wuwule niye ki̱ti̱me ko. Kanang wuwule niye yinang ka n ki̱n a ma nangangu.

²⁸ Mi̱n fwa chimi̱n bi̱yili̱mu, bi̱kam chimu we fi a ne ti bwadu ka ku ki̱laku Bwe Nii a mati̱nki.”