Matta 14 - Bwaki Kifwiyang

Bwa Yowana naba Batisma

¹ We ki̱swi wuko, m Mai Yiridu a nwe ya̱m Yesumu.

² A yi ni̱bu ki̱ma ki̱mi̱n nangangmu ko, “Wu nang Yowana naba Batisma, wu a kuntewe fure. Nang chi a yo ki̱ni dukanu ki̱mang chi ka̱ta̱kite.”

³ Nangki̱n m Mai Yiridu a tau Yowana a kwau a di̱bi̱nti̱l di̱ne n ki̱n a da̱u Yirudiya naye ke ko n Filibu.

⁴ Di̱ne n Yowana a tau ki̱mwa Yiridu ko, “We yilangu, a dakabu mwang bau Yirudiya.”

⁵ N Yiridu ki̱baddu ka chi̱u Yowana aya n ki̱n ki̱nwe tayi ni̱biyu, di̱ne n chi a da̱u Yowana fa̱ku Kwama.

⁶ Aya yo di ni̱bu a bi̱n Yiridu a kanenge, fwa̱n Yirudiya a yiu chimi̱n yilang. Ti̱tu a li̱ma Yiridu ni̱r.

⁷ N ki̱n a mwe ki̱ni di̱twa̱mbi̱r ko, “N twa̱m mi̱n, chi mun badditu mang ni̱nu.”

⁸ N ki̱n a ma nangangu ki̱ni ya̱m ne ki̱ni̱mu a yi ko, “Yo miye dur Yowana naba Batisma a kwa̱se ki̱ka̱ng we fi.”

⁹ M Mai a kai ni̱r, aya di̱ne di̱twa̱mbi̱ru n ki̱n a tu a manu, a yi ni̱bu ko a ma befwa̱ne mi̱n chi ki̱badditu.

¹⁰ N ki̱n a yo ni̱bu a biye dur Yowana we di̱bi̱nti̱lu.

¹¹ A be ki̱ni dur Yowana a kwa̱se a ni fwa̱nu, wuko a yiu, a ya niti̱ neki̱n.

¹² Miyari̱m Yowanamu a be, a da̱u kwa̱me a ya fur, a yikan a ya fwa Yesu mi̱n.

N Yesu a chau ki̱ni ni̱bu kuni yunu

¹³ Yo n Yesu a nwe ya̱m bi̱be, a fi̱l kwa̱mbi̱re mwe, a du fiko, a yika wuka fi n ki̱kun. Yo ki̱tuu ni̱be a nwe ya̱m bi̱be, a duwe bi̱nti̱ chitu a bunti̱ Yesu ki̱ni nani.

¹⁴ Yo n Yesu a su we kwa̱mbi̱re mwe, a ku muraki̱ ni̱bangu nabwene. A nwe ki̱bune chi, yinu a bera chi mi̱n buri̱ntu.

¹⁵ Ki̱ni me, miyari̱m ki̱mu a be fi a di̱ki̱ne a yi ko, “Fi a ma di̱kir, di a le. Yai ki̱tuu ni̱be, yo ni̱bu a yika bi̱ntu chi ke a ya ta̱n chabtu.”

¹⁶ Yesu a yi chi ko, “A dakabu ka ki̱ladu, ti̱ni chabti̱tu.”

¹⁷ N chi a yi Yesu ko. “A ne chabtu we kana ki̱daniyi yunuyu n ti chingiyi yurau.”

¹⁸ “A yi chi ko, ti̱be miye ki̱n.”

¹⁹ A yi ki̱tuu ni̱be ko, ti̱sweswe we swa̱ki̱ku. A da̱u ki̱daniyu n ti chingiyu, a kuku kabu a dii, a wana Kwama, a wulan a ni miyari̱m ki̱mu, bi̱ki̱mu a kera ni̱bu mi̱n.

²⁰ Ki̱tuu ni̱be a chau a lwe. A mur ti̱bukentu a rii ti̱ti̱ngriti kub chiri turau.

²¹ Bi̱bu a chabi̱mu kwartabu kuniriti tunu a bwin nati̱bu n ti bwesi̱mu.

Yesu a ya yayu, a di a mwe

²² Bi̱nabi̱na n Yesu a yo miyari̱m ki̱mu a le kwa̱mbi̱re mwe a yabu wuka bale. A du ki̱n we fiko ka yo ki̱tuu ni̱be a ya li̱mang.

²³ A kuteng ki̱ku a yo ki̱tuu ni̱bengu, a fi̱l kun n ki̱kun, a twa̱ba̱ bunitu we. Di a le ki̱n we bwako.

²⁴ We ki̱swi wuko, kwa̱mbi̱re mwe a tibe laa, labi mwetu ki̱yingledu, ki̱fi̱be a nibu chi da suku di̱ne ki̱ni dukan.

²⁵ Ki̱ni kunsin, n Yesu a fwadu miyari̱mu mi̱ntuwe ki̱bedu a di a mwe.

²⁶ Yo miyari̱mu a ku ki̱n ki̱faduwe mwe, ni̱tu chitu a ti̱ren. N chi a bwe kemi ko, “Waa butu!”

²⁷ Bi̱nabi̱na n Yesu a yi chi ko, “Kwako! Ti̱wulu we, m mi̱n.”

²⁸ M Biti̱r a yi ko, “Tewuduwe, ka nang mune, ke n ya bwa di̱mune we di a mwe.”

²⁹ Yesu a yi ko, “Be.” M Biti̱r a su we kwa̱mbi̱re mwe, ki̱yadu we dii a mwe, ki̱yika bwa di̱Yesuwe.

³⁰ Yo n ki̱n a ku ki̱fi̱be la, ni̱ru a ti̱ren, n ki̱n a mwe ki̱su mure mwe. N ki̱n a bwe keme ko, “Tewuduwe! Yui.”

³¹ Bi̱nabi̱na n Yesu a tar fa̱la̱ngu a tau. A yi ko “M mun wu keku bi̱yili̱m mwangu a ki̱tane, mun kama wule?”

³² Yo n chi a le kwa̱mbi̱re mwe, ki̱fi̱be a ti ti̱n.

³³ Bi̱bu we mure kwa̱mbi̱re mwemu a sii ki̱n ko, “Bi̱yili̱m, m mun Bwe Kwama.”

N Yesu a be ni̱bu ti̱burani̱mu a Chanesa̱ret

³⁴ Yo n chi a yabu la, a si̱ka ti̱m Chanesa̱ret.

³⁵ Kangu ni̱bu a bi̱ni̱mu a swan ko n Yesuwangu, n chi a na yilang we ti̱m chimu a da̱u ti̱na ki̱dire. Ni̱bu a be ki̱mi̱ne ki̱ni bi̱bu a burani̱mu.

³⁶ N chi a wana ki̱n ko a du bi̱bu a bubuwemu a twai kasi no nang luke ko, bi̱bu a twayimi kwang a be.