Matta 13 - Bwaki Kifwiyang

Baltaku a naba fike

¹ We diko n Yesu a chir we lo, a ya swe a ki̱ti̱ki̱ laang.

² Di̱ne ki̱tuu ni̱be a mura ki̱mi̱ntuwe, n ki̱n a fi̱l kwa̱mbi̱re mwe a swe we, a du ni̱bu we ki̱ti̱ki̱ laangu.

³ N ki̱n a fwa ni̱bu mi̱n ya̱mu nabwen ki̱ni baltaku, a yi chi ko, “Wuka naba kuwe a yaki̱fiye duum.

⁴ Yo yaki̱ wau dume, bi̱kamu duum a twakan a wa̱re, ki̱ni̱biyu a be sibati̱n.

⁵ Bi̱kamu a yar a fi a kaliye wu a ne ki̱ti̱m we nabwene, a ki ti̱ni datu. Aya di̱ne a ne ki̱ti̱m we nabwene,

⁶ yo kuko a fwe, a twi ti̱n. Di̱ne a ne ki̱ti̱mu ka swe kiyineng mi̱n we.

⁷ Bi̱kamu a yar a fi a kwa̱da, kwa̱da a li̱ngke dumu a kiyemu a yimbu dwiyedu.

⁸ Bi̱kamu a yar a ti̱m bi̱yili̱m, a chir ki̱kutiyu kulitu wan turukun turukun, bi̱kamu wan ti̱ta ti̱ta.

⁹ Wu ki̱ni ki̱teliye a nwe.”

Chi baltaku ki̱yungde

¹⁰ Miyari̱m ki̱mu a be a bi̱u ki̱n ko, “A mayire mun fwa chi mi̱n ya̱mu ki̱ni baltake?”

¹¹ N ki̱n a yi chi ko, kana chi̱n bi̱bu a ki̱nta chii̱mu ti̱yim ti̱laiyiri ti̱tu a Yaa Kwamatu, aya bi̱bu a kebu bi̱yili̱mi̱mu a yimbu.

¹² Aya wu ki̱ni chiye ka yiddu we nabwen, ke n ki̱n a ri chibu. Aya wu a ne we ki̱ne, kono nang ti̱tu a fa̱la̱ng kangitu n ki̱n ka kwalati̱nu.

¹³ Nang chi a yo mi̱n fwa chimi̱nu ki̱ni baltake. Kasi ki̱ku ki̱kudangu, a kubu chi. Kasi ki̱ku ki̱nwedangu, a swaanbu.

¹⁴ Ya̱m fa̱ku Yichayamu a ri a di̱chiye ko, “Tani̱n nwedu, aya a ne ta swaanu. Tani̱n da̱ngdu, aya a neta ku chiki.

¹⁵ Di̱ne ni̱tu ni̱bu bi̱bitu a ma kuli̱n ki̱teli chiyu a nwebu di. A sume kwalangi chiyu, Ko ke chi swaanu we ki̱ni kwa̱la̱ngiyu. Yinu ke chi nwe ti̱nuwe ki̱ni ki̱teli chiyu. Di̱ne ke chi swaanu we ni̱tu chitu, Ko ke chi ki̱ladu bwa di̱mi̱ne we, n be chi.”

¹⁶ “Aya we di̱chi̱ne! kwa̱la̱ngi chiyu ki̱kudu yinu ki̱teli chiyu ki̱nweti̱nu.

¹⁷ N fwa chimi̱n bi̱yili̱m, fa̱kubu nabwen n ti ni̱bu ni̱ri dini̱mu a bau ka ku ti̱tu ta kuutu, aya n chi a kubu, a bau ka nwe chitu ta nwetu, aya n chi a nwebu.

N Yesu a fwa chi baltaku ki̱yungde

¹⁸ “N Yesu a fwa chi baltaku ki̱yungde.

¹⁹ N ki̱n a yi ko, ka ni a nwe ya̱m Yaa Kwamamu a swaanbe, fakware ki̱ful ki̱nu ka yiti̱tti̱ ya̱m Kwamamu a no a ni̱ri̱mu.

²⁰ Ya̱m duumu a yar a kalimu, a ti we wu a nwe ya̱mu, a yiu, a kwar ti̱n kani yurabe.

²¹ Aya yade ya̱mu a mabu ki̱yineng we ni̱re, a baki̱swi bayim, yo riye n ti fumaku a kune di̱ne ya̱m Kwamame, n ki̱n ki̱ki̱ladi kuteng.

²² Wu a yar a kwa̱da, nang wu a nwe ya̱m Kwamamu, aya ti̱ti̱nitu n ti kuli kitu a da̱u ti̱kuran kitu, a kwaba ki̱n, a yimbu ma nangang Kwamangu.

²³ Aya duumu a yar a ti̱m bi̱yili̱mu, ki̱fwa nii wu a yiu ya̱m Kwamamu a swaan ti̱ne, duum ki̱mu ki̱chir chabti̱tu kuul, wani turukun, bi̱kamu wani ti̱ta.”

Baltaku ki̱ni ki̱kweri

²⁴ N Yesu a fwa chimi̱n kaang baltaku ko: Yaa diye ni swe ti̱nu ki̱ni wuka nii wu a ya fiye dum bi̱yili̱m a kuu ko.

²⁵ Aya yo ni̱bu a dara duumi ki̱ni kume, fakware ko a ya fiti̱ ki̱kweri we duum bi̱yili̱m ki̱mu a yika ti̱n.

²⁶ Yo chaam a mwe ki̱yo fili̱ntu we dutu chite, ki̱kweri a kwa̱la̱n.

²⁷ Ni̱bu nangangmu a yi ki̱n ko, “Tete, mare n fi duum bi̱yili̱m we kuu, ki̱kweri a taa bwa̱le?”

²⁸ N ki̱n a yi ko, “Fakware a ma nangang ki̱ku.” Naba nangange a bi̱u ko, “Ni ya, ni kub, ni kur a bwa?”

²⁹ Yinu a yi chi ko, “Kwako,” ka ni kub ki̱kweri, ni kai duumi ki̱n.

³⁰ Ti̱du a dwiye ware a lami̱nti̱n ki̱swi kakke, we ki̱swi kakke, mang yi ni̱bu ki̱swidi̱mu mi, ti̱mur bi̱yili̱mu n ti ki̱kweri dangdang. Ti̱twi ki̱kweriyu aya bi̱yili̱mu ti̱kur a bi̱ne.

Ki̱kwi ki̱si̱rai

³¹ N Yesu a fwa chimi̱nti̱ kaang baltaku ko, “Yaa wu a diye ni swedii ki̱kwi ki̱si̱raiye wu nii a wau a kuu ko.

³² Kasi ki̱ku ki̱kwi wuti̱rengu aya ka a dwiyene, ki̱kau tiyang ki̱duwang we lambu, ki̱ni̱biyu beki̱ mati̱ ki̱kuli we ki̱yangtikiyu.”

³³ N Yesu a fwa chimi̱nti̱ kaang baltaku ko, “Yaa wu a diye yinang yis wu naye a se n ti miim a lami̱nti̱ yo a fuwe.”

N Yesu a ma nangangu ki̱ni baltaku

³⁴ N Yesu a fwa ki̱tuu ni̱be mi̱n ya̱m bi̱bi kwang ki̱ni baltaku. A ne bi̱kam ya̱m we bi̱bu n ki̱n a fwa chi mi̱nbu ki̱ni baltakumu we.

³⁵ Ti̱tu a ri chitu fa̱ku Kwama Yichaya a fwaatu ko, “Mang fwa ya̱mu ki̱ni baltaku, Mang fwa ti̱tu a lai feredi yo n Kwama a mwe a yo ti̱ti̱nite.”

N Yesu a fwa chi ya̱m ki̱kweri̱mu ki̱yungde

³⁶ N Yesu a du ki̱tuu ni̱be a le lo, miyari̱m ki̱mu a nabu a yi ki̱n ko, “Fwa ni̱mi̱n chi baltaku a ki̱kweri chami ki̱yungde.”

³⁷ A yi chi ko, “Nii wu a fi duum bi̱yili̱me nang Bwe Nii.

³⁸ Kuu nang ti̱ti̱nitu, duum bi̱yili̱mu nang bwesi̱m yaamu, yinu ki̱kweri nang bwesi̱m fakwaremu.

³⁹ Fakware wu a fi ki̱kweriye nang Setan. Ki̱swi kake, nang kunki̱ ti̱ti̱niyangu, ni̱bu swiki̱mu nang ni̱bu ti̱tumbi̱ri Kwamamu.

⁴⁰ “Yinangu a swi ki̱kweri a twiyangu, yiko we di swan kute.

⁴¹ Bwe Nii ka tume ni̱bu ti̱tumbi̱ri ki̱mu, n chi ka chaku ki̱kweri we yaa ko n ti chi ki̱yo ki̱letiye n ti ni̱bu ki̱ma ki̱leti mu.

⁴² Ka mar chidu a ki̱rang ki̱bwilang we bwanu n chi kani̱n kira wiini, n ti ki̱rti̱ku numang.

⁴³ We ki̱swi wuko, ni̱bu ni̱ri dini̱mu ka yiidu yinang kuko we yaa Te chiye. Nii ka nwede, a nwe.

Kuli ti̱tu niyang yimbitu

⁴⁴ “Yaa diye yinang kuli ti̱lairi a wuka kuu. Nii a ya, a ki̱la laituwe. Aya di̱ne ti̱mi̱lane a yikan, a ya feku kuli̱n ki̱ni kwang a be tani̱n kuu wu.

⁴⁵ “Ti̱nti̱n, Yaa Kwama yinang ni wu ki̱feku kuli̱n a kwa̱mba̱r ki̱ babba kaliyi wulbi̱wulbiye.

⁴⁶ Yo n ki̱n a ya wu a la chiye, a yikan, a ya feku ti̱tu n ti̱u ki̱niti kwang a be a ta̱n kale wu.

Baltaku a dwa̱ka

⁴⁷ “Ti̱nti̱ne, Yaa Kwama yinang ni̱bu ki̱tau chingi yo a mai dwa̱ka we laa a woo chingiyi nabwen.

⁴⁸ “Yo a riye, fangimchi̱m a chake, a ki̱ti̱ku laang. Yinu n chi a swe we ki̱ti̱ku laang, a chaku yiyiliyu a yo a ki̱ti̱ng, a kur yiyu a lebiyu a bwa.

⁴⁹ Ka kadu yiko we kunku di swan kutengu. Ni̱bu ti̱tumbi̱ri Kwamamu ka bedu ka chaku bi̱yili̱mu we bi̱bwilamu.

⁵⁰ Ka kur chidu a far ki̱rangin, fi n chi ka kiin wii ka ki̱rti̱n numme.

⁵¹ “Ti̱swaan ti̱ta?” N chi a ke ko, “Ngo,”

⁵² N ki̱n a yi chi ko, “Kanang chikiye ti̱tu a yung ka nang wuwule naba yungku yili̱ne, yinang fangko lo wu a wo kuli̱n di̱ka̱ri̱nu n ti di̱fwinu we kan ki̱ne.”

Ni̱bu a ko Yesu we Nasa̱ret

⁵³ Yo n Yesu a ri fwaku ya̱mi yiye, a du fiko a chakakku,

⁵⁴ Yo a yika bi̱n ki̱ne, a mwe ki̱miya chimi̱nu we kambi muraki̱ Kwamatu, n chi a ya̱r yii ki̱yidu ko, “Nii wu a ya yingki̱ku n ti dukan chi ka̱ta̱ki ti̱tu a fi̱re?”

⁵⁵ Wu n ke bwe kafinta? N ke wu n neki̱n m Maryamuwa? Kebi̱ ki̱mu n ke Yakubu n ti Yusufu n ti Simun n ti Yafuda?

⁵⁶ Bi̱wuti̱m ki̱mu, n ke bi̱bu n chi̱ni ware kwadi̱ma? N ki̱n a ya bi̱bu ya̱m a fi̱re?

⁵⁷ N Yesu a yi chi ko, Fa̱ku Kwama ki̱ni ki̱siyang kasi no a fi̱re a bwin bi̱n ki̱nu n ti loko.

⁵⁸ Di̱ne n chi a kebu bi̱yili̱me, n ki̱n a mabu chi ka̱ta̱kitu we bwako nabwen.