Matta 10 - Bwaki Kifwiyang

N Yesu a yal miyari̱mi kub chiri burau

¹ N Yesu a yal miyari̱mi kub chiri burabi̱mu a ni chi dukanu ka chaku ki̱fi̱bti, ka beti̱ buri̱ntu.

² Ti̱tu nang di̱mbi fandubi̱bu kubchiri burab, n Simun wu ki̱yalu ko Biti̱r n ti Andi̱riya keko n ti Yakubu bwe Sa̱badi n ti Yowana ke ko.

³ N Filibu n ti Bartolomi n ti Toma n ti Matta wu ki̱yiu Sangkale n ti Yakubu bwe Alfiyus n ti Tadiyu.

⁴ N ti Simun naba Kanana, yinu n ti Yafuda Yiskariyoti wu n ki̱n a kwa̱l Yesuwe.

N Yesu a tum Miyari̱m ki̱mu

⁵ N Yesu a tum Miyari̱m ki̱mi kub chiri burabi̱mu a ngau chimi̱nti̱ ki̱kure ko, “Ti̱yaduwe ni̱bu a yikayu kuuti. Ti̱nti̱ne ti̱ledu di̱kan bi̱n we Samariya.

⁶ Ti̱tibe bwa kwanti yi lairi ni̱bu Yisrelame.

⁷ Yati̱ mwa chi tiko, Yaa Kwama a mwatawe.”

⁸ Ti̱be bi̱bu a bubuwemu, ti̱kuku bi̱bu a bwarani̱mu, ti̱swar ni̱bu mwa̱limu, ti̱chaki̱ti̱ ki̱fi̱bti. Ta ta̱nbu ta̱ne, ti̱ ni ti̱miduwe miye.

⁹ Ti̱da̱du ti̱kan chi we yinang ka̱mbi̱r di̱du ta tani̱n chiin.

¹⁰ Ti̱da̱du wuka swe we n ti luke yurau n ti ka ki̱wamiye ka dwamenge, naba nanga a dakan ka ya chabtu kitu.

¹¹ Kanang di̱di̱le bi̱n di̱du ta ledi̱ne, ta bau nii ki̱nwe tai Kwamaye, ti̱swe we lo wuko a lami̱nti̱ yo ta du fiko.

¹² Ka yata le lo niye, ti̱si chi.

¹³ Lo a yiu chi̱ne, ti̱yo chimi̱n delaku, wu a ko chi̱ne, ti̱chir ti̱n ki̱ni li̱mang changu.

¹⁴ Lo a ne yiu chi̱ne ka, ka siti̱bu ki̱tele we ya̱m chime, Ti̱bu kuru we nani chiyu yo kano ti̱chiru, ti̱du lo wukonge.

¹⁵ Mi̱n fwa chimi̱n bi̱yili̱m, n Kwama ka nwe ki̱bune bi̱n Sodom n ti Komara we di kabaku Kwama ka la bi̱nti̱ ti̱tu a ko chinitu.

Riye wu a bwa kake

¹⁶ Da̱ng, mi̱n tumchi̱nu yinang kwanti a tibe bawutiye, di̱ne yiko, ti̱kasan yinang soti, ti̱tau bwanu yinang ki̱kubti.

¹⁷ Ti̱ma daandaang, di̱ne ni̱bu ka le kan kabaki̱nu ki̱ni chi̱n, ka twalachi̱nu we kambi muraku ni̱bu Yafudamitu.

¹⁸ Di̱ne mi̱ne, ni̱bu ka yadi ki̱ni chi̱n a kakku bi̱duum n ti mati̱m, di̱ne di̱mwar di̱yili̱nu ta ma a kakku chiyanu n ti yikayu kuuti ti̱n.

¹⁹ Yo ka yadu ki̱ni chi̱n a kakke, ni̱tu chi̱ntu a kaiyaduwe chi ta fwaditu, di̱ne n ki̱n ka ni chi̱n chi ta fwaditu we ki̱swi wuko.

²⁰ Di̱ne nii ka fwa ya̱me n ke chi̱n, Fi̱ki̱m Te chi̱n wu a diye ka fwa chimi̱n ya̱mu.

²¹ Ke ka ni keko ko ni̱bu a chi̱u, te ti̱n ka ni bweko, bwesi̱mu ka yaradu n ti bi̱bu a bi̱u chimu, ka yodu ni̱bu ka chi̱u tebu chimu.

²² Ni̱bu a yimbu Kwamamu ka ko chi̱nu di̱ne di̱n mi̱ne. Aya wu ka tidi ki̱ri̱ng ka lami̱nti̱ di swan kute, ka swidu.

²³ Ka n chi a ni chi̱n riye we di̱kanu bi̱nne, ti̱wulti̱ di̱kan bi̱n. Bi̱yili̱m mi̱n fwa chimi̱nu, a ne ta ri kanaku kuti Yisrela, Bwe Nii ka bedu.

²⁴ Miyare a labu naba yungke ko, ka̱be a labu naba loko.

²⁵ Miyare ka nwe ta̱ma̱ng ka ka kadu yinang naba yungke ko, yinu ka̱be yinang naba loko ti̱n. Ka a yal teloko Bayalsebul we, yinu ka yal ni̱bu lomu ko wule?

Wu ta nwe tayi kiye

²⁶ Nangki̱n, ti̱wulu tayi chiyu we. A ne chi ti̱yingeri ti̱tu a ne wudeditu we. A ne ti̱lairi ti̱tu a ne kwa̱ladituwe.

²⁷ Chitu mang fwa chimi̱n a bura tu, ti̱fwa yi kwa̱rikwa̱ri, ti̱lairitu mang fwaatu, ti̱fwa a fi̱lang yinang yilang.

²⁸ Ti̱wulu bi̱bu ki̱chi̱u bwiyumu we, aya a ne chi̱u ti̱kuritu. Aya ka la chi ta wul Kwama ka chi̱u bwiyu n ti ti̱kuritu a far ki̱rane.

²⁹ Ni̱bu ka medu ka ta̱n kwa̱la ki̱ni kobo wiina? A bwin yiko a ne wuka wu ka swidu we ti̱mu n Te chi̱n a yimbe we.

³⁰ Kasi no nang ritu a duriti kwang n Kwama a yim.

³¹ Di̱ne yiko, ti̱nwedu tayi we di̱ne n ti̱n ti̱la kwa̱la ki̱ni ki̱siyangu nabwen.

Wu ka yung yikiye we kakku ni̱bange

³² Kanang wuwule niye wu ka yung yikiyu ko n ki̱n wu mi̱n we kakku ni̱bange, mang yungti̱ ki̱nu we kakku Temi wu a diyengu.

³³ Aya wu ka koyu we kakku ni̱bangi kwa̱rikwa̱riye, mang koti̱ ki̱nu we kakku Temi wu a diye.

Mang bebu ki̱ni li̱me, kana bi̱ngai

³⁴ Ti̱kamaduwe ti kanodu m be ti̱ti̱nitu mi̱ne ki̱ni li̱mang. Mang bebu di̱ne li̱mange aya di̱ne bi̱ngai.

³⁵ Aya m be di̱ne, ke n yo di̱kulan we tibe te n ti bweko fwa̱n n ti neki̱n, yinu yire n ti nelaki̱n,

³⁶ Fakware kawure ka kadu ni̱bu lokom.

³⁷ Wu ka mi̱la teki̱n, ka n neki̱ne, ka la mi̱ne a lwebu ka kau miyare mi. Bi̱bu a mi̱la bwesi̱m bi̱bari̱m chimu, ka bi̱wuti̱m chimu a la chiye, a lwebu ka kau miyare mi.

³⁸ Aya wu a ne da̱u ki̱tiyang bwang kangu ka bumiti̱ne, a lwebu ka kau miyare mi.

³⁹ Wu ka mi̱la ti̱kuri kite, ka kwaladu. Wu ka kwala ti̱kuri kitu di̱ne mi̱ne, ka yadu.

Sure

⁴⁰ “Wu ka yiu chi̱ne, a yiu mi̱n, aya wu a yiu mi̱ne, a yiu wu a tum mi̱ne.

⁴¹ Wu a yiu fa̱ku di̱ne n ki̱n fa̱kuwe, ka yiu sure fa̱kuwe. Yinu wu ka yiu naba yile di̱n n ki̱n naba yile, ka ya sure naba ni̱ri diine.

⁴² Aya wu ka nii wuka win we bi̱ti̱ri̱m bi̱bu, kasi no be kwa̱se wiin wu a mwe wu ki̱ri̱me, di̱ne n ki̱n miyare miye, bi̱yili̱m mi̱n fwa chimi̱nu a ne kwala ki̱ti̱me ko.”