Markus 6 - Bwaki Kifwiyang

Ni̱bu a ko Yesu a Nasa̱ret

¹ N Yesu a du fiko a ki̱la bi̱n ki̱nu a Nasa̱reti̱nu, miyari̱m ki̱mu a yikan ware n ti ki̱n.

² Yo difi̱kare ni̱bu Yafudame a lame, n ki̱n a mwe ki̱yungdu we a kan muraki̱nu, ni̱bu nabwen bi̱bu a nwe ya̱m ki̱mi̱mu a ya̱r yii we miyaki̱ kangu ko, “Kano niwu a ya yingku ki̱ku n ti dukan ya̱m chi ka̱ta̱ki ti̱tu a fi̱re?

³ Kano nii wu n ke kafinta, bwele Maryamu, ke Yakubu n ti Yusufu n ti Yafuda n ti Simun? Bi̱wuwiye ki̱mu n ke bi̱bu n chi̱ni ware ma?” N chi a nwe ki̱fwini a ko a kebu bi̱yili̱m we ya̱m ki̱mu.

⁴ Yinu n Yesu a fwa chimi̱n ko, “Fa̱ku Kwama a newe ki̱ni dwiyen we ti̱m ki̱mu n ti kebi̱ki̱mu n ti loko.”

⁵ N Yesu a yabu da a mabu chi ka̱ta̱kitu we bwako aya a yo fa̱la̱ng kangu a bi̱kam ni̱bi bayim bi̱bu a bubuwem, a be chi.

⁶ Aya a ya̱r Yesu yii we kwalan keku bi̱yili̱mang chiyange. N Yesu a kun fal a kana beti̱ bi̱ntiyu ki̱ma miyaku.

N Yesu a tum miyari̱mi kub chiri burabi̱mu

⁷ N Yesu a yal miyari̱m ki̱mi kub chiri burabi̱mu, a tum chi burau burau, a niti̱ chi dukanu ka chaku ki̱fi̱bti.

⁸ A yi chi ko, “Ti̱da̱ddu chi we, kasi no chabtu, ka swe, ka ka̱mbi̱re. N kawure a da̱u kana ki̱twalang.

⁹ Ti̱do ki̱wamiyu aya ti̱da̱du wuka luke we ka n ke wu a bwiye.

¹⁰ Kanang wuwule lo wu ta si̱ki̱nde, ti̱swe we fiko ka lami̱nti̱ ki̱swi ta dun bi̱n di̱ki̱ne.

¹¹ Kanang wuwule fi wu ni̱bu a yibu chi̱n, a ko a nwe ti̱bu chi̱ne, ka yata yikade, ti̱musu kuru we nani chiyu ke a kau di̱mwal we di̱chiye.”

¹² N chi a yikan a mwa ni̱bu ko a woki̱ti̱m.

¹³ N chi a chaka ki̱fi̱bti nabwen, a wa ni̱bu mi̱n ki̱nung olifang a be chi we buri̱ntu.

Bwa Yowana Naba Batisma

¹⁴ Yinu m Mai Yiridu a nwe ya̱mu yinangu di̱n Yesunu a ti̱ra ti̱mu yinang yinangangu. Nangki̱n bi̱kamu ni̱bu ki̱yidu ko, “N Yowana naba batisma a kuntuwe fure, nang chi a yo a ya dukan di̱du ki̱mang chi ka̱ta̱ki ti̱te.”

¹⁵ Aya bi̱kamu a yi ko, “N fa̱ku Yiliya.” Bi̱kamu ko, “Wuka fa̱ku dang, we bi̱bu feredimu.”

¹⁶ Yo n Yiridu a nwe ya̱m bi̱be, a yiko, “N Yowana, wu mang mwati̱ dur ki̱ne, a kuntuwe furu.”

¹⁷ Aya ki̱dangu ferediyangu n Yiridu a tum ni̱bu ko a tau Yowana, a yingen a di̱bi̱nti̱l. N Yiridu, a ma yiko di̱ne Yirudiya, naye ke ko n Filibu, wu n ki̱n a yiu a mang nayeko.

¹⁸ Di̱ne n Yowana kiyi Yiridu ko, “A dabu n ki̱n ka yiu naye ke ko.”

¹⁹ Di̱ne yiko, n Yirudiya a le ki̱nwe ki̱fwini Yowana we a ni̱r ki̱nu, ki̱bau wa̱re ka chi̱u Yowana a yabi̱ da.

²⁰ Di̱ne n Yiridu ki̱nwe tayi Yowanangu, di̱ne n Yowana ni wu ki̱tum yile we kakku Kwamange, nang chi a yo n Yiridu ki̱so Yowana. Kasi ki̱ku ya̱m Yowanamu ki̱twai ni̱r ki̱nangu, ki̱nwe ta̱ma̱ng siiku ki̱telengu we ya̱m ki̱mu.

²¹ A kuteng ki̱ku, n Yurudiya a be ya da a di kurku bi̱be Yiriduse. N Yiridu a yal mati̱m ki̱mu n ti bi̱duum ni̱bu kuni̱m ki̱mu n ti ki̱kati Ka̱lilimu.

²² Yo fwa̱n Yirudiya a lewe a yiu yilange, a li̱ma mai Yiridu ni̱r n ti rungko ko. N ki̱n a yi fwa̱nu ko, “Fwa chi mun badditu mang ni̱nnu.”

²³ A bwa̱u ya̱mu ki̱ni di̱twa̱mbi̱r ko, “Kasi no mun bau wule mang ni̱nnu, kono ba̱la̱ng we yaa mati̱ne mi.”

²⁴ Fwa̱nu a chir a bi̱u neki̱n ko, “Mang bi̱u wureni?” N neki̱n a yi ko, “Dur Yowana naba Batisma.”

²⁵ Bi̱nabi̱na n ki̱n a le we kakku mai yangu, a yi ki̱n ko, “Mi̱n bau dur Yowana naba Batisma ki̱ka̱ng ki̱kang a kwa̱se.”

²⁶ Yo Mai a nwe ya̱m bi̱be, a ma furi ki̱lin, aya di̱ne di̱twa̱mbi̱r ki̱nu n ti ni̱bu ki̱mu, a ne kangu ka sute ya̱ma̱ngu we.

²⁷ M Mai a tum naba toke ko a ya be ki̱ni dur Yowananu, nii wu a yikan a ya swiye dur Yowananu we lo di̱bi̱nti̱le.

²⁸ A be ki̱ni duru a kwa̱se, a ni fwa̱nu, n ki̱n a ya, a ni neki̱n.

²⁹ Yo miyari̱m Yowanamu a nwe ya̱m bi̱be, n chi a be, a da̱u kunti̱le bwiye, a ya fur.

N Yesu A chabi ki̱ni ni̱bu kuneriti tunu

³⁰ Fandubu n Yesu a tumi̱mu a ki̱lawe, a fwa Yesu mi̱n ki̱ni kwang tiyangu chi a mawengu n ti yinangu n chi a yungengu.

³¹ Di̱ne ni̱bu nabwen ki̱ledu, bi̱kamu ki̱chiru, a ne da wu n chi ka chau chabte we. A yi fandubu ko, “Ti̱be ni swe a wuka fi ke ti̱fi̱kan.”

³² N chi a le kwa̱mbi̱re mwe a yika wuka fi wu a ne wuka nii we, n chi chikun.

³³ A mwintuwe ni̱bu nabwen bi̱bu a ku yikaku chiyamu, a wulani nani a bunti̱ ki̱ti̱ki̱ laangu, a tu chi we bwako.

³⁴ Yo n Yesu a swe a ku muraki̱ku nabwene a ki̱la nwe ki̱bune chi, di̱ne n chi yinang kwanti yiyu a ne naba toke we. Yinu a mwe ki̱miya chimi̱n chitu nabwen.

³⁵ Yo di a mwatan ki̱lede, miyari̱m ki̱mu a be we di̱ki̱ne, n chi a yi ki̱n ko, “Finu a ne niwe, dii ki̱ldue.

³⁶ Du ni̱bu a le kibitu n ti beti̱ bi̱nti̱tu ki̱dwanyu ke a ta̱n chabti̱tu n chi ka chaditu.”

³⁷ Aya n Yesu a yi chi ko, “N ti̱nde, ti̱ni chi chabti̱tu a chau.” Yinu n chi a yi ko, “Ya ni̱n kaiye nabwe ka̱mbi̱r suriyu kuulitu turau we ki̱daniyu ke ni̱bu a chaba?”

³⁸ A yi chi ko, “Ki̱daniyu yile we di̱chine? Yati̱ da̱nge,” Yo n chi a da̱nge, a yi ko, “Ni̱n yangi yunu n ti chingiyi yurabu.”

³⁹ Yinu n ki̱n a yi miyari̱m ki̱mu ko, “Ti̱yo chi a swengi kwa̱li we a swa̱ki̱ ki̱ribangu.”

⁴⁰ Yinu ni̱bu a swe ki̱ni kwa̱litu kuulikuuli, ti̱kantu kwa̱li wan tunutunu.

⁴¹ N ki̱n a da̱u ki̱danniyi yunuyu n ti chingiyi yurabiyu, a kukku kabuko a dii, a wana Kwama, a kera chi mi̱n ki̱danniyu. A ni miyari̱m ki̱mu ko a keran yinu a mati̱ chi̱ngi yiko ki̱ni kwang.

⁴² N chi kwang a chab a lwe.

⁴³ We fiko miyari̱m ki̱mu a mur ti̱buken ki̱dannitu n ti chingiyu a ri ti̱ti̱ngriti kub chiri turau.

⁴⁴ Kwartabu a chau ki̱dannimu, kuniyi yunu.

N Yesu a ya yayu a dii a mwe

⁴⁵ Bi̱nabi̱na n Yesu a yo miyari̱m ki̱mu a le kwa̱mbi̱re mwe ki̱yabi̱ la ki̱yika kakku bwana Betsaida yo n ki̱n we kutengu ki̱yo ni̱bu ki̱yaradi̱me.

⁴⁶ Yo n ki̱n a yo ni̱be, a fi̱l kun n ki̱kun ki̱twa̱ba̱ buni.

⁴⁷ Yo di a lenge, a ya kwa̱mbi̱re mwe tibe la, n Yesu a swe n ki̱kun we ki̱di̱ng langu.

⁴⁸ Yo a ku chi ki̱nwe riye a siku kwa̱mbi̱re mwe di̱ne ki̱fi̱be ki̱yingle chide, a ya bwa di̱chiye ki̱ni kunsiin, n ki̱n a ya fi a di̱chiye ki̱fadu a mwe yinangu ka su chi dang.

⁴⁹ Aya yo n chi a kuu ki̱n ki̱fadu we mwe, n chi a da̱u ko kano butu, n chi a bwe keme.

⁵⁰ Di̱ne n chi kwang a ku ki̱n a nwe tayi. Bi̱nabi̱na a fwa chimi̱n ya̱mu a yi ko, “M mi̱n, ti̱nwedu tayuwe.”

⁵¹ Yinu a le kwa̱mbi̱re mwe n ti chi, ki̱fi̱be a ti ti̱n. N chi kwang a ya̱r yii.

⁵² Di̱ne n chi a swaanbu kangu n ki̱n a chabi ki̱ni ni̱bu kuniyi yunuwangu, n chi a swaanbu chi ti̱chitu wu ki̱yunde.

N Yesu a be ni̱bu ti̱burani̱mu a Chanisara

⁵³ Yo n Yesu n ti miyari̱m ki̱mu a yabu la, a le ti̱m Chanesa̱ret, finu n chi a kwau kwa̱mbi̱re mwe a ki̱ti̱ku laange.

⁵⁴ Yo n chi a chire we kwa̱mbi̱re mwe, ni̱bu a swaan Yesu.

⁵⁵ Kanga a swaan mi̱n ko n Yesuwangu, n chi a kiyani ki̱ti̱bu, a ki̱lan yaki̱ da̱a̱ ni̱bu chimu a buraburanemu ki̱ni fanti dari chiyu, ki̱ya ki̱mi̱ndi ki̱n kasi no bwa̱le.

⁵⁶ Kasi no n Yesu ki̱yadi wuwule ki̱swi, we bi̱nu n ti beti̱ bi̱nti̱tu n ti kuniyu, n chi ki̱ti̱u ki̱mi̱n ni̱bu a bubuwemu we wa̱re ki̱ni chi ti̱dari chitu, ni̱bu ki̱wana ki̱nu ko, kasi no nang twai kana lukeko a lwe, di̱ne bi̱bu a twaiyimi kwang a be.