Markus 5 - Bwaki Kifwiyang

N Yesu a be naba ki̱fi̱btiye

¹ N Yesu n ti miyari̱m ki̱mu a yabu la wu a ti̱m Ka̱rasina.

² Yo n Yesu a chire we kwa̱mbi̱re mwe, wuka naba ki̱fi̱btiye a chi̱reng a bwa fute, a mwati̱ ki̱n.

³ Nii wu ki̱swedu a futu, a ne nii ka kwau ki̱ne we, kasi no ki̱ni maklan.

⁴ Kasi no ni̱bu ka kwau ki̱nu ki̱ni maki̱lan ka dwatte, ki̱ti̱reti̱du we. A ne wuka nii we ki̱ni dukan di̱du ka tami̱n ki̱ni̱nu we.

⁵ Kum n ti kuko ki̱bwa̱ladu we futi̱tu, ki̱fi̱la kunnitu ki̱bwa̱ka kemi, ki̱rura bwikiyu ki̱ni kali.

⁶ Yo n ki̱n a ku Yesu ki̱dwan n ti ki̱ne, a kunni ki̱ni ka banang, a ya sung we kakki̱kangu,

⁷ a bwe keme ki̱ni dukan ko, “Lwangang mwangu wureni n ti mi̱n, Yesu Bwe Kwama wuduwe? Mi̱n ka̱li̱nu, ki̱ni di̱n Kwama, niyu riye we.”

⁸ A fwa di̱ne n Yesu a tu, a yi ki̱n ko, “Chir mi̱n, ki̱fi̱bti yibwilai, chir mi̱n we nii wu!”

⁹ N Yesu a bi̱u ki̱n ko, “Di̱n munu n wure?” Nii wu a ke ko, “Di̱n mi̱nu n Tuule, di̱ne n ni̱n nabwen.”

¹⁰ Yinu n chi a da Yesu mi̱n ki̱ti̱m ko a chaki̱du chi we bale ti̱mme wu.

¹¹ Ki̱dwan n ti fiko, di̱kan ki̱ran sulti̱ki̱mi loi ki̱chau cham a tile bange.

¹² Ki̱fi̱btiyu a wana Yesu ko, “Du ni̱n le sulti̱ki̱mi loi yiyu.”

¹³ N Yesu a ki̱nta chi, yinu ki̱fi̱bti a chir a le sulti̱ki̱mi loi. Ki̱ranu ki̱ni sulti̱ki̱mi loi yu kunniyi yurabu, n chi a kiyani ki̱ti̱bu, a wul a fi̱tan we ki̱di̱ng laangu a bwaran we mwe.

¹⁴ Kangu ni̱bu toki̱mu a ku chiti yangu, n chi a wul a ya fwa ni̱bu a bi̱ni̱mu mi̱n chitu a fwetu. Ni̱bu a dalawe beka da̱ng chi a fwetu.

¹⁵ Yo n chi a be fi a di̱Yesu we, a ku ni wu a no ki̱ni ki̱fi̱btiye a swe sobu ki̱ni kuli̱n. N chi kwang a nwe tayi.

¹⁶ Ni̱bu bi̱bu we fikomu a fwa chitu nui chiyu a kuutu we naba ki̱fi̱btiye n ti sulti̱kumi loiyu.

¹⁷ Yinu ni̱bu a le ki̱wana Yesu ko a yikan a du yaa chi.

¹⁸ Yo n Yesu a yaki̱ le kwa̱mbi̱re mwe, nii wu a no ki̱ni ki̱fi̱btiye a bau ko chi bungadu ware.

¹⁹ Aya n Yesu a ko. N ki̱n a yi nii wu ko, “Ki̱la lo, fi a kebi̱ mume, ya n fwa chimi̱n nangangu n Tewuduwe a ma a dur munangu n ti li̱me mwang ya a di̱Kwama.”

²⁰ Nii wu a yikan a mwe ki̱mwa ni̱bu a Dikafoli chi n Yesu a ma a dur ki̱ne. Kanang wuwule niye wu a nwe, ki̱ya̱r yii.

Beku fwa̱n Yayirusi̱n n ti naye a twai luke Yesuwe

²¹ Yo n Yesu a yabti̱ ki̱ti̱ku langu we ki̱ni kwa̱mbi̱re mwe, muraki̱ ki̱duwang a kang ki̱n a tibe we ki̱ti̱ku laangu.

²² Yinu wuka sele we seli̱bu kan muraki̱ni̱nu di̱n ki̱nu n Yayiru, a ya bwa di̱Yesuwe, a ya sung we kakki̱kangu.

²³ A da ki̱mi̱n ki̱ti̱mu yinang ko, “Befwa̱ne mi yaka bwadu, mi̱n wananu be twai ki̱n ke a be a ya ti̱kuritu.”

²⁴ Yinu n chi a bunga ware. Ni̱bu nabwen ki̱tungadu ki̱funkatu bwitichiyu.

²⁵ Wuka naye we fiko a ma swa̱ti̱ti kub chiri turabu, ki̱kur ka ki̱tum.

²⁶ A nwe riye nabwen we a fa̱li ni̱bu yini̱ni̱mu. A chi̱u ka̱mbi̱r ki̱nu ki̱ni kwang, a mwintuwe li̱mangu a yabu.

²⁷ Yo n ki̱n a nwe ya̱m Yesume, a le tibe ni̱be a bale kute, a twai luke ko,

²⁸ ki̱kuradu we ni̱r ki̱nu ko, “Kasi no mang twai ka luke ko mang bedu.”

²⁹ Yo a twaiye, bi̱nabi̱na ki̱tumu a ti, n ki̱n a nwe we bwikiyu ko ki̱ya ta̱ma̱ngu.

³⁰ Bi̱nabi̱na n Yesu a nwe yo dukan a chir we bwikiye, n ki̱n a sabran a bi̱u chitu ko, “N wure a twai luke miye?”

³¹ Miyari̱m ki̱mu a yi ki̱n ko, “Wule! Mwang kubu kangu ni̱bu ki̱fumananga? Ni yim wure a twayine?”

³² Yo n Yesu ki̱da̱ngadu ka n wure twai ki̱ne,

³³ naye wu kanga yim chi a fwetangu, tayi a tau ki̱n. A be fi a di̱Yesuwe ki̱ni bwiyu ki̱yiu ka yilang, a sung we kakku kangu, a fwa chi n ki̱n a maatu.

³⁴ N Yesu a yi ki̱n ko, “Fwa̱n mi̱n, n ya beku di̱ne keku bi̱yili̱mang mwange, ya li̱mang, burang mwangu a be.”

³⁵ Yo n Yesu we ki̱fwa ya̱me, bi̱kam ni̱bu a be a loon Yayiru, tikake wu a kan muraki̱ne a yi ko, “Fwa̱n munu a bwa, kwa̱ma̱du naba yungke we.”

³⁶ Aya n Yesu a mabu nangang ki̱ni ya̱m chimu a yi wu sele kan muraki̱ne ko, “Wulu tayuwe, ke bi̱yili̱mu.”

³⁷ N Yesu a dubu ni̱bu ko a bunki̱mi̱nti̱n ka n ke Biti̱r n ti Yakubu n ti Yowana ke Yakube.

³⁸ Yo a lam lo Yayiruse, n Yesu a ku ni̱bu a kaiya ni̱tu, ki̱kira wiini bwa, ki̱bwa̱kati̱ kemi.

³⁹ N ki̱n a le a yi chi ko, “Di̱ne wule ti̱kira wini ti̱bwa̱ka̱ti̱ kemiye? Be fwa̱ne a bwabu, ki̱da duum.”

⁴⁰ N chi a ma ki̱mi̱n di̱nur di̱kusi̱n, n ki̱n a chaku chi kwang a fi̱lang, a yal te n ti ne n ti bi̱bu ware n ti ki̱ni̱mu, a le finu be fwa̱ne we mi̱ne.

⁴¹ A tau fa̱la̱ng kangu, a yi ki̱n ko, “Talita kumi!” Ka nang chikiye, “Be fwa̱ne kuun.”

⁴² Bi̱nabi̱na befwa̱ne a kuun ki̱ya yayu (swa̱tu kitu kub chiri turabu) Yo ti̱chituwu a fwe, n chi a ya̱r yii.

⁴³ Aya n Yesu a wu chi mi̱n ki̱tele yinang ko, wuka nii a nwedu ya̱m bi̱bu we. Ti̱ni chabti̱tu a chau.