Markus 3 - Bwaki Kifwiyang

N Yesu a be nii wu a ngi̱rma fa̱la̱nge

¹ Yo n Yesu a le kan murakangu, a ya wuka nii wu fa̱la̱ngu a ngi̱rmane ne we kannu.

² Bi̱kamu ni̱bu a kurti̱ nuiyi chiyu we di̱Yesuwe ko ka, ka be ni wu we difi̱kare, ke chi ya fi̱li wu chi tan ki̱ne.

³ Yinu n Yesu a yi ni wu ko, “Chire, tii tas.”

⁴ N Yesu a bi̱u chi ko, “Ti̱ti̱le a da ni madu we yilang Musangu, ni ma chi ti̱yili we difi̱kare ni̱bu Yafudama ka ni tum bwila? Ni yu ti̱kuriya ka ni chi̱u ti̱kuriya?” Ni̱bi wudidi, a yibu ki̱n ya̱m.

⁵ N Yesu a da̱ng chi ki̱ni ki̱fwini, di̱ne ki̱ngki̱nge ni̱tu chiye aya ki̱nweti̱ ki̱bune chi we ki̱leti chiyu. N ki̱n a yi nii wu ko, “Tare fa̱la̱ng mwangu,” fa̱la̱ngu a be ti̱n.

⁶ Kangu ni̱bu Farisamu a chirengu, bi̱nabi̱na n chi a di̱ka ya̱mu ti kwa̱l Yirudu we dur ki̱nu yinang kangu chi chi̱u Yesungu.

Ki̱tuu ni̱be a nabu Yesu

⁷ N Yesu a kun ti miyari̱m ki̱mu a du bi̱nu a yika ki̱ti̱ku la Ka̱liliyang. Ki̱tu ni̱be nabwen bi̱bu a chire a Ka̱lili n ti Yafudiya a nabi̱ ki̱n.

⁸ Kangu n chi a nwe chitu n Yesu ki̱maditangu, bi̱bu a Wurchalimamu n ti bi̱bu a ba̱la̱ng Yudiyamu n ti bi̱bu a yabu la wurduni̱mu n ti bi̱bu a Tayamu n ti bi̱bu a Sidon mu. Ni̱bu nabwen a mura ki̱mi̱ntuwe ke chi nwe, chi kuti̱ chi ki̱maditu.

⁹ Di̱ne ki̱wulu ko ke ni̱bu a fumadi̱ ki̱n we, a yi miyari̱m ki̱mu ko, “Ti̱be ki̱ni kwa̱mbi̱re mwe wuti̱re wiin ke ti̱fumantu a swe bunge.”

¹⁰ A ma ying di̱ne n ki̱n a be ni̱bu nabwen. Ni̱bu buri̱ni̱mu nabwen ki̱bedu we di̱ki̱ne ke chi twai ki̱n, chi ya beku.

¹¹ Yo ni̱bu ki̱ni ki̱fi̱btimu ki̱ku Yesu we, ki̱yaru we ti̱mu ki̱ni kemi ko, “M mun Bwe Kwama!”

¹² N Yesu a ngau chimi̱n ki̱kure ki̱ni dukan ko, “A yidu ni̱bu we ka n ki̱n n wure.”

N Yesu a sutu miyari̱mi kub chiri burau

¹³ Yinu n Yesu a fi̱l kunu, a yale bi̱bu n ki̱n ki̱baddi̱mu n chi a be fi a di̱ki̱ne.

¹⁴ A sutu ni̱bi kub chiri burau, bi̱bu n ki̱n kani̱n tundi̱mu ka nang chikiye fandu, a yi chi ko, “N sutu chi̱n niing swedu ware.” Ma ni̱n tum chi̱nu we a di̱mwaru.

¹⁵ A ni chi dukan, ka chaku ki̱fi̱bti yi bwilayu.

¹⁶ N ki̱n a sutu Simun, wu n ki̱n a ni di̱nu ko Biti̱r.

¹⁷ N ti Yakubu bwele Sa̱badiye wu ke ko n Yowana, a chau ki̱mi̱n di̱nu ko Buwarnachis ka nang chikiye, bwesi̱m ki̱yalem,

¹⁸ n Andi̱riya, n ti Filibu, n ti Bartolomi, n ti Matta, n ti Toma, n ti Yakubu, bwele Alfiyus, n ti Tadiyu, n ti Simun naba Kana. Di̱n di̱du ki̱swe ni̱r Simuni̱nu n ti chi n ki̱n ki̱made we siiku Kwamangu. We wuka ki̱swi ki̱yung kwa̱l ni̱bu ki̱ma chitu yinang ni̱bu ki̱rangi̱n bi̱bu a babu ka bunti̱ku mati̱n Romamu,

¹⁹ n ti Yafuda Yiskariyoti wu a mii ki̱ne.

N Yesu n ti Mai Ki̱fi̱btiye

²⁰ Yinu n Yesu a le lo. Ki̱tu ni̱be nabwen a mura ki̱mi̱ntuwe ti̱nti̱n. N ki̱n n ti miyari̱m ki̱mu a yabi̱ da tiyangu ka chau chabti̱tangu.

²¹ Yo kebu ki̱mu a nwe ya̱me, n chi a ya, yaka taa ki̱nu, di̱ne ni̱bu ki̱yidu ko, “N ki̱n a newe li̱mang.”

²² Ni̱bu yungku yili̱ni̱m bi̱bu a be a Wurchalimamu a yi ko, “Bayalsebul we bwi kiyu, tikake Mai ki̱fi̱btiye nang wu a ni ki̱n dukan di̱du ki̱chaki̱n ki̱fi̱btinu.”

²³ N Yesu a yal chi, a swe chimi̱n ko, “Setan ka chaku Setani yire?

²⁴ Ka bi̱ngaiyu a le ti̱mu ki̱kula bwiti chiye, ti̱m bi̱ki̱mu a ne ya dukanu.

²⁵ We yiko, ka bi̱ngaiyu a le di̱kur lone, lo wuko a ne dukan we.

²⁶ Ka yaa Setane a le bi̱ngaiye, yaa a ne yin tidu, yare a be chimi̱ne, wu yaa ko ka fi̱ri̱nde.

²⁷ A ne ni ka le lo naba dukane yinang Setane, ka kaar kuli̱n ki̱ne we, ka n ke ka tau ki̱nu ka kwadu, yinu ka yindu ka le lo ka wur nii we.

²⁸ Mi̱n fwa chimi̱n bi̱yili̱m, Kwama ka du chimi̱n ki̱letiyu n ti swa̱ba ku Kwamangu.

²⁹ Aya wu a swa̱ba Fi̱ki̱m Kwamame, a ne du ki̱mi̱n ki̱leti kiyu, bwila ko a swe ki̱diya kwadu.”

³⁰ N ki̱n a fwa bi̱bu di̱ne n chi ki̱yidu ko n ki̱n ki̱ni ki̱fi̱be wu bwila.

Ne Yesuwe n ti kebu Yesum

³¹ Yinu n ne Yesuwe n ti kebu ki̱mu a be, a ti a fi̱lang. A tum chitu ko a yale Yesu.

³² Aya ki̱tuu ni̱be a di̱bi̱l ki̱n. N chi a yi ki̱n ko, “N ne mun n ti kebu mumu a fi̱lang, ki̱yali̱nu.”

³³ Yinu n ki̱n a ke chi mi̱n ko, “N wure nang nemi, m bi̱wure nang kebu mi̱mu?”

³⁴ N ki̱n a da̱ng ni̱bu bi̱bu a bwa̱l ki̱ni di̱bi̱li̱mu, a yi chi ko “N nemi nang wu n ti kebu mi̱mu!”

³⁵ “Kanang wuwule niye, wu ki̱ma chi n Kwama a keete, n ki̱n nang kemi wubare, n ti wuwiye, n ti nemi.”