Markus 2 - Bwaki Kifwiyang

N Yesu a be nii wu a ngi̱rmane

¹ A kutengu ditiyi bayimangu, n Yesu a ki̱latewe Kafanawu, ni̱bu a nwe ko a ki̱la loko.

² Ni̱bu nabwen a muran we kwa̱ru, a ne fi wu lere we. N ki̱n we mure ki̱fwa chi mi̱n ya̱m Kwamamu.

³ Yinu bi̱kam ni̱bu, n chi baana a da̱a̱ wuka nii wu a ngi̱rmane.

⁴ Yinangu n chi a kwala kangu ka le fi a di̱Yesuwe ki̱n di̱ne nabwen ni̱bengu, n chi a fi̱l dii kanne, a wum fi a tiben n ti Yesuwe, a mare nii wu ki̱ni kwa̱mbi̱re mweko a kakku kang.

⁵ Yo n Yesu a ku keku bi̱yili̱mang chiyange, a yi wu ngi̱rmane ni ko, “Bwemi, n du mi̱n ki̱leti mwiyu.”

⁶ Ni̱bu yungku yili̱ni̱mu we fiko a swe ki̱ma ti̱kuran we ni̱tu chitu,

⁷ ko, “A mayire ni wu ka fwadi ye? Ti̱tu ka swa̱bban! N wure ki̱ni dukan di̱du ka du nimi̱n ki̱letiye, ka n ke Kwama ki̱kune?”

⁸ Bi̱nabi̱na n Yesu a swaan ti̱kuran ti̱tu a ni̱tu chitu. A yi chi ko, “Di̱ne wule ti̱ma ti̱kuran ti̱tu we ni̱tu chinte?

⁹ Bi̱bi̱le ya̱m a lachi, bi̱bu ni ka yi naba burange ko, ‘N du mi̱n ki̱leti mwiyu, kuni̱n da̱u chi ti̱dari mwitu, n ya yayuwa?’

¹⁰ Aya mi̱n baddu ke ti̱yim tiko Bwe Nii ki̱ni dukan di̱du we ti̱ti̱nitu ka du ni̱bu mi̱n ki̱letiyu.” A yi wu ngi̱rmane ni ko,

¹¹ “N fwa mi̱n, kun, da̱u kwa̱mbi̱re mo, ya yayu.”

¹² Bi̱nabi̱na a kun a da̱u kwa̱mbi̱re mwe ko we a nui ni̱biyu, a yikan. Ti̱tu a ya̱r ni̱bu yii, n kawure a ni Kwama dwiyentu ko, “Nang kuunbi̱ ti̱tu chi we.”

N Yesu a yal Lawi

¹³ N Yesu a ki̱lati̱ ki̱ti̱ku la Ka̱liliyangu we, ni̱bu nabwen a mura ki̱mi̱ntuwe di̱bi̱l, yinu n ki̱n a mwe ki̱miya chimi̱nu.

¹⁴ Yo yaki̱sude, a ku lawi bwele Alfa, a swe we fi ni̱bu ki̱yin sangkale. N Yesu a yi ki̱n ko, “Bumite.” A kun a bunti̱ ki̱n.

¹⁵ Wuka di n Yesu n ti miyari̱m ki̱mu ki̱chau chabtu ki̱ni me a lo Lawiye. Ni̱bu ki̱yiu sangkali̱mu n ti ni̱bu a bunti̱bu yili̱n Kwamati̱mu we fiko nabwen ki̱chau chabti̱tu n ti chi. Di̱ne ni̱bu nabwen we mure bi̱bu ki̱bunti̱ ki̱ni̱mu.

¹⁶ Ki̱dangu ni̱bu Yungku yili̱n Musamu, bi̱bu n chi Farisamu a ku ki̱chau chabti̱tu n ti ni̱bu ki̱leti̱m n ti bi̱bu ki̱yiu sangkali̱mu, a bi̱u miyari̱m ki̱mu ko, “A ma yire ki̱chau chitu n ti ni̱bu ki̱letime?”

¹⁷ Yo n Yesu a nwe ya̱me, a yi chi ko, “Ni̱bu li̱mamu a babu naba yinenge, ka n ke naba di̱buwe. Mang bebu di̱ne mang yal ni̱bu yilem we kakku Kwamangu, aya di̱ne ni̱bu a tumbi̱ yilem.”

Di̱bi̱du a da̱kku dimwenang

¹⁸ Miyari̱m Yowanamu n ti bi̱bu a Farisamu, ki̱da̱u dimwen. Bi̱kam a be bi̱u Yesu ko, “Di̱ne wule miyari̱m Yowanamu n ti bi̱bu a Farisiyawamu ki̱da̱u dimwenu aya bi̱mumu a da̱bbe?”

¹⁹ N Yesu a yi chi ko, “Fate wutabi̱re ka da̱u dimwen we ki̱dangu bwele ki̱yiu naye we ware n ti chiyanga? Ki̱swi ki̱bedu wu bwele ki̱yiu naye ka du chide. N chi a ne da̱u dimwenu yo n we ware n ti bwele ki̱yiu naye.

²⁰ Ki̱swi ki̱bedu wu bwele ki̱yiu naye ka du chide we, n chi ka da̱u dimwen we ki̱dang kangu.

²¹ “A ne ni wu ka tal luke wu ka̱re ki̱ni di̱bal di̱fwine we. Ka a kabi yikonge, di̱bal di̱fwinu ka ngi̱r di̱ka̱ri̱nu, ngi̱raki̱ku ka la ki̱ferediyangu ki̱ni kayaki̱ku.

²² A ne ni ka lwa̱u mwe yinabi a swagi yika̱ri we, ka ni a lwa̱bbe, swa̱ngi yika̱riyu ka fweradu, mwe yinabi wu fwiye niin lwa̱du a swagi yifwi.”

Di̱bi̱du a difi̱kare ni̱bu Yafudam

²³ Wuka difi̱kare ni̱bu Yafudam n Yesu n ti miyari̱m ki̱mu yaki̱sudu a kuni chami, miyari̱m ki̱mu ki̱ kiya ti̱changri ki̱kudu.

²⁴ Ni̱bu Farisamu a yi ki̱n ko, da̱ng miyari̱m mumu, “A ma yire ki̱ma chi yilang a kebitu we di difi̱kare chire?”

²⁵ N Yesu a ki̱nta chi ko, “Yoye ta kiinbu chi n Fa̱ku Dauda a ma we se Kwama yo n chi a nwe chunu n ti fati̱bu ki̱mu we yayu chiya?

²⁶ A ki̱dangu n Abiyata nang tikake Fansetiye, n Dauda a le se Kwama a chau chabtu ti̱yangritu, yinu a niti̱ fati̱bu ki̱mu chabtu ti̱tu a dakan kana fanseti ka chaditu.”

²⁷ Yinu n Yesu a yi chi ko, “A yo difi̱kare di̱ne ni aya a yobu ni di̱ne difi̱kare.

²⁸ Di̱ne yiko, Bwe Nii, nang Tewuduwe wu a difi̱kare ni̱bu Yafudam ti̱n.”