Markus 12 - Bwaki Kifwiyang

Baltaku a ni̱bu bi̱bwilam a ya suku ti̱mang

¹ Yinu n Yesu a chakakku ki̱fwa ya̱mu ki̱ni baltaku, “Wuka ni a fi ku yinabe, a kana kuu ki̱ni yakwale, a swa̱nti di̱kulen di̱du kani̱n ya̱mi̱n ti̱kulan mwe yinabiyentu, a buti̱ kweeru kani̱n mwata mi̱n ya̱mi̱nu. A ni bi̱kam ni̱bu suku ku, ko a nang sudu a yikati̱ di̱bwal.

² Yo ki̱swi yakku ti̱kulan we ku yinabe a lame, a tum wuka naba nanga ko we ni̱bu nanganmu ko a yiu ki̱mi̱ne ti̱kulantu.

³ Yo naba nanga a be, ni̱bu bi̱bu a tau a ngau, a yo ki̱n, a yikan fa̱li kwako.

⁴ Nii wu a tum chi mi̱nte wuka naba nanga, n chi a ngau wuko a dur, a ni ti̱n ki̱n riye.

⁵ A kuteng ki̱ku, n ki̱n a tungte wuka. N chi a ngau wuko, a chi̱u.

⁶ A du naba kuu mi̱n kana bweko, wu n ki̱n a mi̱lan yinange. A kuteng ki̱ku naba kuwe a tume ki̱n we di̱ chiye, ‘Ki̱kuradu ko ka ni bwe ko dwiyentu.’

⁷ Yo ni̱bu ki̱su kuumu a kuwe, a yi ko, ‘Bwe ka chau kula nang wu, ti̱be, ni chi̱u, ke ni chatti̱ kula!’

⁸ N chi a tau bwe a chi̱u, a da̱u bwe a mar a kuteng yakwaleng we ku yinabe.

⁹ “Kanodu Tewuduwe a kuu yinabe wu ka ma chidi yire? N Yesu a bi̱u chi. Chi ka maditu, ka bedu ka chi̱be ni̱bu suremu, ka da̱u ku wu ka ni bi̱kam ni̱bu.

¹⁰ Yoye ta kiinbu ya̱m Kwamam bi̱bu wenga? ‘Kale ni̱bu muki̱mu a konge, nang kale ki̱la da̱u tureng kanne.

¹¹ Ti̱tu nangang Tewuduwe, a kau chi ya̱r yii we da̱ngku chirengu.’ ”

¹² Bi̱duum tikaketi ni̱bu Yafudamu a bau wa̱re ka tau ki̱ne, di̱ne n chi a swaan ko baltaki̱ku a dur chi̱n. Kanang chikiye, n chi nang ni̱bu ki̱suu bi̱bwilamu we ya̱m bi̱bu. Aya a tabu ki̱n di̱ne n chi ki̱nwe tayi ki̱tu ni̱be, n chi a du ki̱n, a yarati̱n.

Feku sangkal a di̱Kaisare

¹³ Yinu n chi a tung ki̱mi̱ne ni̱bu Farisa n ti ni̱bu Yirudumu ko ke a yo ki̱mi̱n la̱ta̱ yii, ke chi tau we ya̱mu ka fwadi̱mu.

¹⁴ Yo n chi a benge, a yi ki̱n ko, “Naba yungke, ni̱n yim m mun, mun fwa ya̱mi der, mwang wulbu tayi ni̱biyu mwang da̱ngti̱bu dwiyen ni̱tu. Aya mun yung ka ya̱m bi̱yili̱m bi̱bu n Kwama fwamu. Kanodu a dakan nang fe Mai wuduwe Kaisar sangkala? Ni̱n fenga, ka ni̱n feduwenga?”

¹⁵ Aya n Yesu a swaan bwila chi, a yi chi ko, “A mayire ti̱ sweye? Ti̱niye ka̱mbi̱ru ti̱fen sangkali̱nu.”

¹⁶ N chi a be ki̱mi̱ne ki̱n. A bi̱u chi ko, “Wu kabu wure?” N chi a ke ko, “Kabu Kaisare.”

¹⁷ N Yesu a yi chi ko, “Ti̱ni Kaisar ti̱tu, n ti̱u Kaisaritu. Ti̱ni Kwama ti̱tu n ti̱u Kwamatu.” Chitu a ya̱r ni̱bu yii nabwen.

Di̱bi̱du a kunku kwa̱miyang

¹⁸ Yinu ni̱bu Sadukiyamu, bi̱bu a kebu ki̱ni kunki̱ kwa̱mimu a be fi a di̱ki̱ne a bi̱u ki̱n ko,

¹⁹ Naba yungke, m Musa a mwal ni̱mi̱n ko, “Ka kemo a bwange, a du naye ko a ne bi̱be wenge, a mwintuwe keko ka ni̱n na naye ko, ke a ya ki̱mi̱n bwesi̱mu ka chau kulamu.”

²⁰ Bi̱kam kebu we chi bi̱dibiin. Wu sele a ti kake, a yiu naye, a bwa a bi̱bu bwe.

²¹ Wu robe a bunti̱ ki̱ne, a da̱u naye ki̱nadu, n ki̱n a be bwa ti̱n a ne bi̱be we. Wu tare yiko ti̱nti̱n.

²² N nang kangu n chi ki̱ni bi̱dibiin, a twiya mi̱nangu. A ne wu a bi̱u bwe wa̱re n ti naye we. We kuteng ki̱ku naye wu a bwa ti̱n.

²³ We di kunki̱ kwa̱miyange, ka kau naye wure we tibe chi? Yo n chi kwang a na naye we.

²⁴ N Yesu a yi chi ko, “Ti̱kuran chi̱ntu n ke ti̱yili di̱ne ta swanbu ya̱m Kwamamu, yinu ta swanti̱bu dukan Kwamanu.”

²⁵ We di swan kute, a ne ya̱m ki̱natim we bwadiye. Ni̱bu kwang ka kadu yinang ni̱bu ti̱tumbi̱ri Kwamam.

²⁶ Ki̱ka̱ngu we ya̱m kunku kwa̱miyamu, ta kibu we tati̱ki̱dai Musa? Ta kibu chi a mwal ki̱dangu a be di̱ki̱ di̱lukene ki̱ tau ki̱ranga yinangu Kwama fwa ko, “M mi̱n nang Kwama Yibrayime, n ti Kwama Yichaku, n ti Kwama Yakubu we.

²⁷ N ki̱n n ke Kwama bi̱bwari̱m. N ki̱n wa bi̱kuri̱me. N ti̱n ni̱bu Sadukiyamu ti̱le nabwen.”

Yilang ki̱duwangu

²⁸ Wuka ni we ni̱bu yungku yili̱n Musantu a be nwe yinangu n chi ki̱tukadu we yichiyangu, kangu n ki̱n a swan ko n Yesu a nii chi di̱ki̱li̱n di̱yili̱nangu, a bi̱u Yesu ko, “Yilang ki̱ku a la chiyangu n nang ki̱ki̱le?”

²⁹ N Yesu a yi ki̱n ko, “Yilangu a la chiyangu n nang ki̱ku ‘Ti̱nwe ni̱bu Yisrelamu, Kwama Tewuduwe, Tewuduwe wiin ki̱kumang.

³⁰ Mi̱la Kwama Tewuduwe mo ki̱ni ni̱r muni diin, ki̱ni ti̱kuri mwiti kwang, ki̱ni ti̱kuran mwiti kwang, yinu ki̱ni dukan muni kwang.’

³¹ Ki̱ku ki̱bunti̱dangu n nang ki̱ku, ‘Ke kemo yinang yimwi.’ A ne yilangu a la ki̱kangu we.”

³² Yinu naba ni̱bu yungku yili̱ne a yi Yesu ko, “N fwa bi̱yili̱m, naba yungke, n Kwama wiin, a ne wukane we.

³³ Ke ki̱ni ni̱ru kwang, ki̱ni ti̱kuri mwitu kwang, ki̱ni dukan munu kwang, yinu mi̱la kemo yinang yimwi. Ti̱tu a la ti̱niriti kwang n ti niku ki̱tumang.”

³⁴ Kangu n Yesu a yim ko nii wu ki̱ni yingkangu, a yi ki̱n ko, “N kwatuwe yaa Kwama.” A kuteng ki̱ku a ne ni a ma ki̱mi̱n di̱kan di̱bi̱de we.

M Masiya Bwe wure?

³⁵ Yinangu n Yesu yaki̱ ma yungki̱ku we Kan Kwamana Wurchalimanu, a ma di̱bi̱du ko, “Kanodu ni̱bu yungku yili̱ni̱mu ki yidu ko m Masiya bwe Dauda n wure?

³⁶ N Dauda n ki̱fwan, we dukan Fi̱ki̱m Kwamami̱nu a yi ko, ‘Tewuduwe a yi Tewuduwe mi ko, N swe a kang ki̱yilamangu ka lammi̱nti̱ ki̱dangu mang chau ki̱la ki̱ni fwakwarbu mumu we nani mwiyangu.’ ”

³⁷ Yo n Dauda ki̱fwan, a fwa ko, “M Masiya Tewuduwe, yinu ka kaddi yire m Masiya ka kau bwe we di̱Dauda?” Ni̱bu nabwen a ma furi mwemwen, ki̱ni ya̱m Yesumu.

³⁸ We yungki̱ku, n Yesu a yi ko, “Ti̱ma dandan ki̱ni ni̱bu yungku yili̱ni̱nmu, n chi ki̱do lukei yiswa̱mi, ki̱bwali ki̱n, ki̱baddu ni̱bu ka ni̱n sii chidu a kwa̱ma̱ri.

³⁹ Ki̱bau fanti yiyili we kambi murakitu, ti fanti yiyili we yo ni̱bu ki̱ma yeniye.

⁴⁰ N chi nang bi̱bu ki̱chau kuli̱n nati̱bu kwartabu chimu a bwaran ni̱mu. Ki̱twa̱ba̱ buni chitu swa̱n swa̱n ko ke ni̱bu a yim chi. Aya n chi ka ya mwataku ki̱duwang.”

Niku na buneng

⁴¹ N Yesu a swe we Kan Kwama di̱dunu, a kwatuwe finu ni̱bu ki̱kurin ka̱mbi̱r. Ki̱da̱ngdu yinangu ni̱bu ki̱kur kambi̱ritangu, kuli̱nmu a kur ka̱mbi̱ru nabwen.

⁴² Yinu wuka nabune a bete, a kur ki̱nuti ka̱mbi̱ri yurabu, ka nang chi kiye a ni̱ni yurau.

⁴³ Yinu, n Yesu a yale miyari̱n ki̱mu, a yi chi ko, “Bi̱yili̱m, min fwa chimi̱nu, chi nabune wu a kure a la ni̱bi kwang.

⁴⁴ Ni̱bu bi̱bu a chake we kuli chitu a ni, aya nabune wu, a chake we kwalan kiti kwang a ni.”