Markus 11 - Bwaki Kifwiyang

N Yesu a le Wurchalima

¹ Yo n chi a be ki̱dwan n ti Wurchalima, n chi a tau Betafachi n ti Betani, a bale Kun tini Setuniye, n Yesu a tum miyari̱m ki̱mi burau,

² a yi chi ko, “Ti̱le bebi̱ne wu a kakku change, ka ti̱lenge, ta ku wukane bekurunge ni̱bu a kwau ki̱n wu nii ni a fili̱n be we. Ti̱kwi ti̱be ki̱n.

³ Ka wukane ni a bi̱u chi̱n ko di̱ne wule ti̱kwide? Ti̱yi ki̱n ko, ‘Tewuduwe ki̱baddu, ka ki̱ladi ki̱n a ne tike.’ ”

⁴ Yo n chi a yikane a ya bekurunge ni̱bu a kwau ki̱dwan n ti wa̱re, a fi̱lang a wuka lo,

⁵ Yo n chi a mwe ki̱kwide, ni̱bu we fikomu a bi̱u chi ko, “Ti̱kwidu a mayire, kurunge wu chi̱na?”

⁶ N chi a yi ni̱bu yinangu n Yesu a yi chiyangu, yinu ni̱bu a du chi a yikani ki̱n.

⁷ Yo n chi a be Yesu mi̱ne ki̱ni kurunge, a mau lukei chiyu we kurunge, yinu n Yesu a fi̱l a swe we.

⁸ Ni̱bu nabwen a mau lukei chiyu we wa̱re, bi̱kamu ni̱bu nabwen a switawe lwangi̱n ti̱kweni a mau we wa̱re.

⁹ Bi̱bu a kakku chiyamu n ti bi̱bu a kuteng chiyamu ki̱kukku kebitu ki̱yidu ko, “Delaku a di̱Kwama! Delaki̱kku a wu, ki̱bedu a di̱n Tewuduwe ne,

¹⁰ N Kwama a dela yaa te chire n Dauda wu ki̱bede. Di̱wanu n di̱Kwama!”

¹¹ Yo n Yesu a le Wurchalima, a le Kan Kwaman di̱duna Wurchalimanu, a da̱ngan ka ti̱tti̱le chiye, aya di̱ne dii a lenge a chir a yika Betani n ti miyari̱m ki̱mu.

N Yesu a ma tiyangu mi̱n yii

¹² Bafi̱nenangeko, yo n chi ki̱du Betani, n Yesu a nwe chun.

¹³ N ki̱n a ku tiyang sinangu ki̱ni lwangi̱nti ki̱li, a yawe ko kano ki̱ni ti̱kulan. Yo a lam fiko a ya a ne ti̱kulan we tiyangu, a yabu chi we ka lwangi̱n di̱ne n ke ki̱swi ko.

¹⁴ N ki̱n a ma Sinangu mi̱n yii ko, “Wuka nii a ne chati̱du we di̱mune ki̱da.” Miyari̱m ki̱mu fal a nwe chi n ki̱n a fwatu.

N Yesu a do Kan Kwaman

¹⁵ Yo n chi a le Wurchalimange, n Yesu a le Kan Kwamanu, a mwe ki̱naba ni̱bu ki̱tana chimu, n ti bi̱bu ki̱mi chi a fikomu. N ki̱n a tunga tebi̱ritu n chi ki̱suten ka̱mbi̱ritu, n ti fanti sweri ni̱bu bi̱bu ki̱feku ki̱kubti̱mu yi kumkuum.

¹⁶ A dubu ni̱bu ko a su we tanti̱lange yifi̱la Kan Kwamane ki̱ni kuli̱nitu.

¹⁷ Yinu n ki̱n a miya ni̱bu mi̱n ko, “Ta yabu we ya̱m Kwamamu yinangu a mwal ko, ‘Ka yal lomi ko, kan twa̱ba̱ku di̱ne kuuti ki̱ni kwanga?’ Aya ti̱yo a kau fi dabi̱kuum ki̱laiyande.”

¹⁸ Tikaketi Fansetiyu n ti ni̱bu yungku yili̱n Musayimu, kangu a nwe ya̱m bi̱bangu, a mwe ki̱bau wa̱re wu ka chi̱n ki̱ne, aya n chi ki̱yar yii we yungku kangu, di̱ne ki̱tuu ni̱be ki̱nwe miyaki̱kangu.

¹⁹ Ki̱ni me, n Yesu n ti miyari̱m ki̱mu a chir we bi̱nu.

Sinangu n Yesu a ma ki̱mi̱n yiiyangu a kusu

²⁰ Bafi̱nenangeko yo n chi yaki̱sudu ki̱ni si̱nne, a ku tiyang sinangu n Yesu a ma ki̱mi̱n yiiyangu a kusu ki̱ni ki̱ yinang kangu kwang.

²¹ M Biti̱r a kur chi n Yesu a ma tiyang sinangu mi̱n baki̱darenge, a yi Yesu ko, “O! Tete, da̱ng Sinangu mwang ma ki̱mi̱n yiiyangu a kusu.”

²² N Yesu a yi miyari̱mu ko, “Ti̱ke bi̱yili̱mu we di̱Kwama.

²³ Bi̱yili̱m mi̱n fwa chimi̱nu, ka nii ki̱ni keku bi̱yili̱mang we di̱Kwama a kamabu chiye, ka medu ka yi kunnu ko, ‘Kun fi̱tan a far mwen,’ ka a ne kamaku we chi n ki̱n a bi̱u we ni̱r ki̱ne, Ka ma ki̱mi̱nti̱nu.

²⁴ Di̱ne yiko mi̱n fwa chimi̱nu, kanang ti̱ti̱le chiye ti̱tu ta bi̱du a twa̱ba̱ku buniyangitu, ti̱ke bi̱yili̱mu tiko ti̱ya, ti̱kitu a kau ti̱chin.

²⁵ Yo kano ti̱twa̱ba̱ buniye, ka ta tau wuka ni a ni̱re, ti̱kur ki̱mi̱n a ki̱ti̱m, ke techi̱n wu a diye a du chimi̱n yichiyu ki̱leti ti̱n. [

²⁶ Ka ta du ni̱bu mi̱nbu ki̱leti chiye, yi yiko ti̱n, n Techi̱n wu a diye a ne du chimi̱n ti̱nu.”]

Ni̱bu ki̱kama dukan Yesunu

²⁷ N chi a ki̱late Wurchalima we. Kangu n Yesu yaki̱ kana Kan Kwamana Wurchalimanu, tikaketi fanseti̱mu, ni̱bu yungku yili̱n Musayimu n ti bi̱kamu seli̱bu a be fi a di̱ki̱ne. A bi̱u chitu ko,

²⁸ “N wure a ni̱n dukanu mwang kakan ni̱bu kwa̱ma̱ri̱mu we kan Kwamana Wurchalimane?” Ti̱nti̱ne, “N wure ni̱n dukanu ko n ma ti̱tu.”

²⁹ N Yesu a yi chi ko, “Mang ma chimi̱n di̱bi̱du, ka ti̱ni mi̱n di̱ki̱li̱n yiine, mang fwa chimi̱nu ka mang ma ti̱tu ki̱ni dukan wurene.”

³⁰ Ti̱fwami, “N wure a ni Yowana dukan maku batisma? N Kwama ka ni̱ba.”

³¹ N chi a twaiyan we yichiyu ko, “Ka ni yiko a di̱Kwama, ka yidu ko a mayire niyang kebu bi̱yili̱me?

³² Aya we ni medu ni yidu ko, ‘A be a nii ya?’ ” N chi ki̱nwe tayi ko ka yo kulangkulange di̱ne ka nang wuwule niye a keko n Yowana Fa̱ku Kwama.

³³ Di̱ne yiko, n chi a yi Yesu ko, “Nang yimbu.” Yinu n Yesu a yi chi ko, “M mi̱n ti̱n a ne mang fwa chimi̱n ti̱nu ka mi̱n ma ti̱tu ki̱ni dukan wurene.”