Luka 8 - Bwaki Kifwiyang

Nati̱bu a bungan ti Yesu

¹ A kuteng ki̱ku, n Yesu ki̱ya bi̱nti̱tu, ki̱yati̱ ti̱tiritu, ki̱ma di̱mwar ya̱m bi̱li̱mi̱nu we Yaa Kwama. Miyari̱m ki̱mi kub chiri burab a ya ware n ti ki̱n.

² Ti̱nti̱ne bi̱kam nati̱bu a be we buri̱n chitu, a chaki̱ti̱ ki̱fi̱bti yi bwilayu. Nati̱m bi̱bu we kwa̱l di̱di̱mu nang Maryamu wu a Maka̱dala wa chaku ki̱mi̱n ki̱fi̱bti yidibine.

³ Yowena naye Kusa wu n Yiridu ki̱tun ki̱ne, wetuwe, n Susana we n ti nati̱bu nabwen bi̱bu a maka ki̱n ki̱ni kuli̱n chinu.

Baltaku a fiku chamang

⁴ Ni̱bu nabwen ki̱bete bwa di̱Yesuwe ka beku we bi̱nti̱tu dangtidangti, yinu n Yesu a ni chi ki̱ku baltaku:

⁵ Ki̱n a yiko, wuka nii a yikan yaka fiye duum chaam a kuuko. Yo ki̱n a yaki̱ wadde, yikayu ki̱nuti a yar a wa̱re. Ni̱bu a faba duum bi̱ki̱mu, ki̱ni̱biyu a si̱ban we ti̱mu.

⁶ Yikayu ki̱nuti a yar a nani kwantim. Yo a kiye, a mwibu kuko di̱ne a ne ki̱ti̱mu we nabwen ka yo ki̱mi̱n lame, a kusu ti̱n.

⁷ Yikayu ki̱nuti a yar a tibe kwa̱da. Kwa̱da a dwiyen ware n ti duumu aya ki̱seliyu a kai chamu.

⁸ Yikayu ki̱nuti a yar a ti̱m bi̱yili̱m, a dwiyen, a le, ka nang wuwule susange, ki̱ni ki̱nutiyu kuul. A kuteng ki̱ku a ri baltakangu, a fwa ya̱mu ki̱ni dukan ko, “Wu ki̱ni ki̱tele, ka nwe de, a nwe!”

Chii baltaku ki̱yungde

⁹ Miyari̱mu a bi̱u Yesu ko a fwa chimi̱n chii baltaku ki̱yungde.

¹⁰ N ki̱n a yi chi ko, “N Kwama a ni chi̱n swaangku chi a yaako aya bi̱kamu ki̱nwe ka baltaku di̱ne n chi kono da̱ng a ne kudu, kasi no nwe a ne swaanu. Bi̱bu n ke miyari̱m mi̱mi̱mu, mi̱n fwa chimi̱ndi baltaku ke a swaan chi ki̱yungde, kasi ki̱ku n chi ki̱ku chitu mi̱n maditangu. Kasi ki̱ku n chi ki̱nwe ya̱m mi̱mangu a ne swaan chi ki̱yungditu.”

N Yesu a fwa ni̱bu mi̱n ki̱ku baltaku

¹¹ N Yesu a chakakku ko, “Duum bi̱bu mang fwa chini̱mu, nang ya̱m Kwamamu.

¹² Duum bi̱bu a yar a wa̱remu, a tiwe ni̱bu a nwe ya̱m Kwamamu aya n Setan a nibu chi da ka ma ti̱kurantu we ya̱m Kwamamu ko ke chi swaan. N Setan ki̱madi ying ko ke n chi a swaanu ya̱m Kwamamu ka yo chidu ka swidi̱mu we.

¹³ Yinu duum bi̱bu a yar, a ti̱m kwanti̱mu, a tiwe ni̱bu a nwe ya̱m Kwamamu, a yiu fa̱li yurau, a baki̱swi bayim, aya keku bi̱yili̱mang chiyangu a tibu kwir, aya yo riye a be chimi̱ne, a ki̱lan ti̱ni kuteng.

¹⁴ Duum bi̱bu a yar, a kwa̱da ki̱selimu, a tiwe ni̱bu a nwe ya̱m Kwamamu aya riye n ti baku kuli n ti nwe ta̱ma̱ng ti̱ti̱niye a yo, n chi a rubbu we ya̱m Kwamamu.

¹⁵ Aya duum bi̱bu a yar, a ki̱ti̱m bi̱yili̱mu, a tiwe ni̱bu, a nwe ya̱m Kwamamu a tau yinang, ki̱ma kwa̱mbi̱ri ki̱n we ni̱tu chiiti̱mu. Di̱ne bwanu chi, n chi a tau ya̱m Kwamame, chi ti̱yili ki̱ chiredu we ni̱tu chitu.”

Baltaku ki̱ni fiti̱la

¹⁶ “A ne nii ka mwa fiti̱la ka sunti̱ chi, ka ka di̱ki̱du a bwang kwa̱mbi̱range. Ka la chi, ka yo fiti̱la a ti̱du di̱ne ke ka n wure ka lewede, ka ku yiki̱ku.

¹⁷ Ka nan ti̱ti̱le chi ti̱lairiye, ka kwa̱la̱du we bwa kake yinu a ne chi mwang madu a ne chire tametuwe, aya ya̱m mi̱mu ni̱bu a swaanbi̱mu beka swaan ti̱nu we bwa kake.

¹⁸ A dakan mwang sii ki̱tele yinang kangu mwang swaani̱ndangu. N Kwama ka suu wu a tum yile, a swaanti̱ chi we yaako mi̱n swaanki̱ku aya wu a newe ki̱ni swaanku ki̱yilange, n ki̱n ka kwala swaan ki̱ku n ki̱ni ki̱nangu.”

Ne Yesu ti kebi̱ ki̱mu

¹⁹ N ne Yesuwe n ti kebu Yesumu a ya bwa di̱Yesuwe, aya n chi a lebuwe bwa di̱ki̱ne di̱ne ni̱bu a ma nabwen.

²⁰ Wuka nii a yi Yesu ko, “N ne mun n ti kebu mumu a ti, a fi̱lang, ki̱baddu ka ku numo.”

²¹ N Yesu a yi ni̱bu a fikomu ko, “Ni̱bu ki̱nwe ya̱m Kwamamu, ki̱tunti̱numu, nang nemi n ti kebu mi̱mu.”

Yesu a ki̱l ki̱fi̱be wuduwe

²² Wuka ki̱di n Yesu a yi miyari̱m ki̱mu ko, “Chi yabu wuka bale we far di̱dunu.” N chi a le kwa̱mbi̱re mwe, a yabu far di̱dunu a Ka̱lilinu.

²³ Yo n chi a yaki̱ yadu we mwe, duum a da̱u Yesu. We ki̱daang kaangu, mwe ki̱swidu ki̱ni ki̱fi̱be wuduwe, a yo kwa̱mbi̱re mwe ki̱le mwe, di̱ne mwe a ri, n chi a le riye wuduwe.

²⁴ Miyari̱m ki̱mu a ya kukku ki̱n ko, “Tewuduwe! Yanan twiyadu.” N Yesu a kun a ki̱l ki̱fi̱be, mwe a du muli̱nu, ki̱fi̱be a ti si̱ng.

²⁵ N Yesu a bi̱u miyari̱m ki̱mu ko, “Keku bi̱yili̱mang changu a bwa̱le?” Aya n chi a ka̱ta̱n, a ki̱laki̱bi̱be yi chiyu ko, “N wure wu nii, wu mwe ti ki̱fi̱be ki̱nwe ki̱ne?”

N Yesu a chaku ki̱fi̱btiyu we nii wu

²⁶ N Yesu n ti miyari̱m ki̱mu a yabu mwe, a yika Ka̱rasina wu a kwakan n ti Ka̱lili ye.

²⁷ Yo a chir we kwa̱mbi̱re mwe, a ti we ki̱ti̱ku far di̱dunu, a tekami̱n n ti naba ki̱fi̱bti. Nii wu a dobu chi, a swebu we lo, ki̱bwa̱lu a kana fanti yiyu a futti.

²⁸ Yo n ki̱n a ku Yesuwe, a bwe keme ki̱ni dukan, a be sung, a yar we kakku Yesungu ki̱ni kemi ko, “Lwangang mwang wule n ti mi̱n, Yesu Bwe Kwama wuduwe. Mi̱n wananu niyu riye we didiin.”

²⁹ Nii wu a fwa ying, di̱ne n Yesu a tu a yi ki̱fi̱btiyu ko a chir a du ki̱n. Yo kwade ki̱fi̱bti ki̱ngau nii wu ki̱mara ti̱m, kasi no ni̱bu a kwaba fa̱liyu n ti naniyu ki̱ni maki̱lan, a mwintuwe ki̱ti̱redu. Ki̱fi̱bti ki̱twa̱ku ki̱nu ki̱yikan di̱kir.

³⁰ N Yesu a bi̱u ki̱n ko, “Di̱n munu n wure?” N ki̱n a ke ko, “Tuule.” N ki̱n a fwa yiko di̱ne ki̱fi̱bti a le ni wu nabwen.

³¹ N chi a da Yesumi̱n ki̱ti̱m ko, a tungdu chi we bwang ki̱fi̱bti yangu didiin.

³² A ya di̱kan ki̱ran sulti̱ki̱mi loyi we fiko a nachang, a tile bange. Ki̱fi̱btiyu a da Yesumi̱n ki̱ti̱m ko, a du chi, chi le sulti̱kumiyu. N Yesu a du chi ko a ya.

³³ Ki̱fi̱bti a chir we nii wu, a le sulti̱kumiyu, yinu sulti̱kumiyu ki̱ni kwang a wul a le la, a bwara we mure.

³⁴ Yo ni̱bu ki̱to sulti̱kumimu a ku chi a fweete, n chi a wul, a le bi̱nu n ti ki̱swa̱tiyu, a fwa chi a fwetu.

³⁵ Ni̱bu a chire a be ki̱da̱ng chi a fwetu. Yo n chi a lam fi a di̱Yesu we, n chi a ku ni wu ki̱fi̱bti a no ki̱made a swe ki̱dwan a kakku Yesuwang, ki̱ni kuli̱n we bwi kiyu, ki̱ni ti̱kuran kitu a ri. tayi a tau chi ki̱ni kwang.

³⁶ Bi̱bu we fikomu, ki̱swe chimi̱nu yinangu nii wu ki̱ni ki̱fi̱bti a ya bekangu.

³⁷ Yinu ni̱bu ba̱la̱ng ti̱m Ka̱rasinamu a yi Yesu ko a yikan we bi̱n chi̱nu. N chi a ma ying di̱ne taye. N Yesu a le kwa̱mbi̱re mwe n ti miyari̱m ki̱mu a yikan.

³⁸ Nii wu n Yesu a chaku ki̱mi̱n ki̱fi̱btiye a wana Yesu ko, a du ki̱nabu chi. N Yesu a ki̱l ki̱n ko,

³⁹ “Ki̱la lo, yang fwa ni̱bumi̱n chi ka̱ta̱kitu n Kwama a ma we dur mun mwang yaan bekitu.” Nii wu a ki̱lan, a yika bi̱n chi̱nu ki̱fwa ni̱bumi̱n chi ti̱ka̱taritu n Yesu a ma yinu a be ki̱nitu.

Fwa̱n Yayiru n ti naye a bubuwe

⁴⁰ Yo n Yesu a ki̱la ki̱ti̱ku far di̱dune, ni̱bu a yiu ki̱n kani yurau di̱ne n chi a no ki̱yam ki̱nu ka ki̱ladu.

⁴¹ We fiko, wuka tikake kan muraki̱ne a be. Nii wu di̱n ki̱nu n Yayiru, n ki̱n a be yar we kakku Yesuwangu ki̱wana ki̱nu ko a be loko.

⁴² N ki̱n a ma ying di̱ne fwa̱n ki̱nu a bubuwe yaka bwadu. Fwa̱nu swa̱ti̱ti kub chiri turau.

⁴³ We kweru n Yesu a chir ki̱ya lo Yayurunu, ki̱tuu ni̱be a nabu ki̱n ki̱fuma ki̱nu. We ki̱tuu ni̱be, wuka naye we wu a ma swa̱ti̱tu kub chiri turau ki̱fwal ki̱tume. N ki̱n a yabu nii ka be ki̱ne.

⁴⁴ N ki̱n a mwin ti̱n, a ya fi, a fi̱rsu, a twai luke wuduwe Yesuwe a bale kute. Bi̱nabi̱na ki̱tum ki̱mu a ti ti̱n.

⁴⁵ Yesu a bi̱u chitu ko, “N wure a twaiyiye?” N kawure ko n ke ki̱n. M Biti̱r ko, “Naba lo, ni̱bu a di̱bi̱ri̱n a tibe ki̱twainu, ki̱fumanu.”

⁴⁶ Aya n Yesu a yi ko, “Wuka ni a twaiyi, n nwe ki̱dangu dukan mi̱nu a chirangu.”

⁴⁷ Kangu naye wu a swaan ko n Yesu a yimangu, a be bwiyu ki̱ mi̱kati̱nu, a be yar we kakku Yesungu n ti ni̱bi kwang. A fwa Yesu mi̱n chi a yo ka twai ki̱nitu n ti yinangu ka ya beku bi̱nabi̱nangu.

⁴⁸ N Yesu a yi ko, “Naye m be, di̱ne mwang ke bi̱yili̱mu we wu ka bene. Ya li̱mang.”

⁴⁹ Yoko Yesu we ki̱fwa ya̱me, wuka ka̱be a be we lo Yayiruwe, a yi Yayiru ko, “Bwe mo a bwa, du naba yungke a yingledu yikiyu we.”

⁵⁰ Kangu n Yesu a nwe ya̱m bi̱bangu, a yi Yayiru ko, “Nwedu tayi we, ke bi̱yili̱mu we di̱ mi̱ne, n Kwama ka be bwemo kasi no a bwa.”

⁵¹ Yo n Yesu a lam lo Yayuruse, a le fi be fwa̱ne wemi̱ne n ti ni̱bi bayim. N ki̱n a le n ti Biti̱r n ti Yowana n ti Yakubu, n ti te befwa̱ne n ti neki̱n.

⁵² Ni̱bu ki̱ni kwang we lo, ki̱kiira, ki̱bwa̱ka kemiyu di̱ne be fwa̱ne a bwa. N Yesu a yi chi ko, “Ti̱kidu wii we, befwa̱ne a bwabu ki̱da duum.”

⁵³ N chi a kebu bi̱yili̱mu, ki̱nu di̱nur swa̱bani̱n, di̱ne n chi a yim befwa̱ne a bwa.

⁵⁴ Aya n Yesu a tau fa̱la̱ng befwa̱nengu a yal ki̱ni dukan ko, “Bwemi, kun!”

⁵⁵ Ti̱kuri befwa̱netu a ki̱latewe. Bi̱nabi̱na befwa̱ne a kun!

⁵⁶ Te n ti ne a ya̱r yi. Aya n Yesu a wu chimi̱n ki̱tele ko a fwadu wuka nii mi̱nu chi a fwetu.