Luka 7 - Bwaki Kifwiyang

Ka̱be tikake naba kunne

¹ Ki̱dangu n Yesu a ri miyaku ti̱ti kwang we ki̱teli ni̱biyangu, a yikati̱ Kafanawu.

² Wuka ka̱be tikake ni̱bu ki̱rang Roma we bwako, a bubuwe, yaka bwadu. Tikake wu ki̱mi̱la bwe yinang.

³ Nii wu a nwe ya̱m Yesumu, a tum seli̱bu ni̱bu Yafudamu ko a yal ki̱mi̱ne Yesu, ke a be a be ki̱mi̱n bwe wu.

⁴ Seli̱bu a ya bwanu a di̱Yesu we, a ya da ki̱mi̱n ki̱ti̱m yinang ko, “Nii wu a dakan mwang makadu.

⁵ Di̱ne n ki̱n, ki̱mi̱la kuu ni̱bu Yafudam, a mu ni̱mi̱nti̱ kan muraki̱n.”

⁶ N Yesu a ke, a yikan ware ti chi. Ki̱dangu n Yesu a mwata lo tikakengu, naba ki̱range a tum bi̱kam fati̱bu ki̱m ko, a ya yi ko, “Tewuduwe, nwedu riye wu kuse we, mang lwebu wu mwang be lomiye.

⁷ Nang chi a yo ma yabu bwa a di̱mune di̱ne mang lwebu. Fwa kana ya̱m, ka̱bemi ka bedu.

⁸ M fwa bi̱bu di̱ne m mi̱n ti̱n, mi̱ma nangangu ki̱ni ya̱m bi̱kaki̱mu. M mi̱n ti̱n, ki̱ni ni̱bu ki̱rangmu ki̱ma nangangu ki̱ni ya̱m mi̱mi̱mu. Mi̱n yi wu mi a ya, mi̱n yi wu mi a be, n chi ki̱ma ti̱nu. Mi̱n yi ka̱biyu a di̱mi̱neyu mi a ma ying, n chi ki̱ma ti̱nu.”

⁹ Kangi̱n Yesu a nwengu, a ya̱r ki̱n yi. N ki̱n a sabran, a yi ni̱ba kuteng kangi̱mu ko, “N fwa chimi̱n, ma yabu wuka we Yisrela ki̱ni keku bi̱yili̱mangi ying.”

¹⁰ Ni̱bu nii wu a tumemu, a ki̱la lo, aya ka̱be tikake a be we burang kangu.

N Yesu a kuku bwe nabune

¹¹ Bafi̱nenangeko, n Yesu a yika di̱kan bi̱n di̱du ni̱bu ki̱yalu ko Nayin. Miyari̱m ki̱mu n ti ni̱bu nabwen a bung ki̱mi̱n ti̱n.

¹² Kangu n chi a lam kwa̱r bi̱nangu, ni̱bu ki̱chiredu ki̱ni wuka kwa̱me yaka furu. Nii wu a bwange, n ki̱kun we a nabune. Ni̱bu nabwen bi̱bu a chire a bi̱ni̱mu, we ware n ti ne naba niye.

¹³ Yo Tewuduwe a ku naye we, a nwe ki̱bune ko, a yi ki̱n ko, “kiidu wii we.”

¹⁴ Yinu n ki̱n, a ya twai kwa̱mbi̱re kwa̱me a da mi̱ne, ni̱bu a da̱a̱ kwa̱memu a ti ti̱n. Yinu n Yesu a yi ko, “Bwebwe, mi̱n ya̱nu, kun!”

¹⁵ Bwe a bwange, a kun, a sweswe, yinu a mwe ki̱fwa ya̱mu. N Yesu a tab a ni neki̱n.

¹⁶ Ni̱bu kwang a ri ki̱ni tayi Kwamayu, n kawure ki̱ri̱ka Kwama ko, “Wuka fa̱ku wuduwe a be nimi̱ne.” N chi ki̱yidu ko, “Kwama a be ka maka chidu.”

¹⁷ Bi̱bu ya̱m Yesum a ti̱ran we ti̱m ni̱bu Yafudiyamu n ti ti̱ntiya kwaka wareyi kwang.

N Yesu n ti Yowana naba batisma

¹⁸ Miyari̱m Yowana naba batismamu a fwa ki̱mi̱n nangi̱ntu n Yesu ki̱maditu. Yinu Yowana a yal miyari̱mi burau,

¹⁹ a tum chi a di̱Tewuduwe, ko a bi̱u ki̱n ko, “Mu nang nii wu n Kwama ka tumeda? Kanang yo nu a wukane niya?”

²⁰ Yo ni̱bu bi̱bu a lam bwa di̱Yesu we, a yi Yesu ko, “N Yowana naba Batisma a tum ni̱ne ko ni̱n bi̱n, m mun nang ni ki̱beda, ka wuka nii we wu ki̱beda?”

²¹ We ki̱daang kaangu, n Yesu a be ni̱bu nabwen bi̱bu ki̱ni buri̱ni̱mu a chaki̱ti̱ ki̱fi̱bti yibwilayu. Ki̱dubi̱bu nabwen nuyi chiyu a wuden ki̱ku di.

²² N Yesu a ki̱l ni̱bu Yowanamu ko, “Ti̱ki̱lan, yati̱ fwa Yowana mi̱n chi ta nwe n ti chi ta kuutu. Ki̱dubi̱bu ki̱ya kuku diyang, ki̱kubtiyu ki ya yayu, ni̱bu mwa̱limu a be, ti̱funitu ki̱nwe ya̱m, bi̱bwari̱mu a kabatuwe, ti̱lusanitu a ya ya̱m bi̱li̱m.

²³ Kwama a yo delaku we ni̱bu bi̱bu a ke bi̱yili̱mu a di̱ mi̱nemu.”

²⁴ A kuteng ki̱ku miyari̱m Yowanamu a yikanangu, n Yesu a mwe ki̱fwa ni̱bu mi̱n ya̱m we dur Yowananu ko, “Yo ta ya bwa a di̱Yowana we di̱si̱lachangi̱ne, a no ti̱badu ta ku wureni? Swa̱ku ki̱fi̱be ki̱mi̱danga?

²⁵ Ka a newe yiko yati̱ da̱nge wureni? Nii wu a do kuli̱n ka̱mbi̱ri̱n di̱yili̱na? Ni̱bu bi̱bu ki̱ni kuli̱n di̱yili̱ni̱mu n ti chi ka nwen ta̱ma̱nge a kwa̱tu mati̱mi a newe a di̱kir.

²⁶ Yoye wuwule ki̱dum niim bi̱bu yata da̱nge a di̱kir. A no ti̱badu ta ku fa̱kuwa? Bi̱yili̱m ti̱ku wu a la fa̱kuwe.”

²⁷ N Yowana nang wu n Kwama a fwa ya̱m a dur ki̱n ko, Ti̱nwe, mi̱n tume Naba di̱tumbi̱re a kakku mwan, n ki̱n ka do chimi̱n wa̱re ta yaande.

²⁸ “Mi̱n fwa chimi̱nu, ni̱bu a tibu bi̱u nii wu a la Yowana naba batisma. Aya wuti̱re we Yaa Kwama a la Yowana naba batisma.”

²⁹ Ni̱bu kwang, kono nang bi̱bu ki̱yiu sangkali̱mu, a nwe Yesu, a ke ko wa̱re Kwama a da. We yiko di̱ne n Yowana a ma chimi̱n batisma.

³⁰ Aya ni̱bu Farisamu n ti naba yungku yili̱n Musanti̱mu a ko ti̱kuran Kwamatu we dur chi̱nu. Di̱ne n Yowana a ma chi mi̱nbu batisma.

³¹ N Yesu a chakakku, a yi ko, “Kano mang swe ni̱bu a ki̱swi wumi yire? N chi a chirkan n ti wule?”

³² N chi yinang bwesi̱mu a swe a kwa̱mma̱r, bi̱bu ki̱yitta ya̱m a bwiti chi ko, Ni̱n ngau chimi̱n ki̱kunti, ta yibbu; ni̱n kau chimi̱n tee bwa, ta kiibu wii.

³³ “N Yowana naba Batisma a be, n ki̱n a chabu chabti̱tu, a norabu chi, di̱ne yiko, ‘Tiko ki̱ni ki̱fi̱bti.’

³⁴ Aya yo m mi̱n Bwe Nii mang be, n chau chabti̱tu n noti̱n, di̱ne yiko ti̱yi mi̱n tiko, mi̱n chau chitu nabwen naba ti̱norane. Fate ni̱bu sangkali̱me n ti ni̱bu ki̱leti̱m.

³⁵ Aya ni̱bu ki̱swedu we yingku Kwamamu ki̱yungdu a le.”

N Yesu a lo Simun naba Farisa

³⁶ Wuka naba Farisa a yal Yesu, ko a be chau chabtu a loko, n Yesu a ya swe ti̱n, ka chau chabti̱tu.

³⁷ We bi̱n di̱du, wuka naye we wu a no ma da ti̱kuliye, kanga nwe ko n Yesu ki̱chau chabtu we lon naba farisangu, a ta̱ne be lure ki̱nung ki̱ki fi̱rfi̱ra̱ng ki̱ku a ma kwa̱ti̱rang.

³⁸ A be, a ti a kuteng Yesuwang, a kwatuwe nani kiyu, ki̱ki wii. Ti̱mweni kitu a mwe ki̱yaradu we nani Yesuyu. Naye wu a musu Yesu mi̱n ti̱mwenitu ki̱ni rii kitu, a wa ti̱ki̱nung ki̱ki fi̱rfi̱ra̱ngu, ki̱yubadu we nang Yesuwangu.

³⁹ Yinang kangu naba Farisa a kuwangu, a kuran ko nii wu, ka no fa̱ku Kwama wuyile, a no yim ki̱dum nayemu ki̱twai ki̱ni̱mu.

⁴⁰ N Yesu a yi naba Farisa ko, “Simun, mi̱n baddu mang ya̱n ya̱m.” Wuko a ke ko, “Naba yungke, fwawe.”

⁴¹ N Yesu a mwe ya̱mu ko, “Wuka nabani we, ki̱bunti̱ ni̱bi burau ka̱mbi̱r. Wuka ka̱mbi̱r suri wan tunu, aya wuka ka̱mbi̱ru suri kuniriti tunu.

⁴² N ki̱n a du chimi̱n di̱chi̱nu, yinu we da̱ngki̱ mwangu, wure nang nii wu ka kenu yinange?”

⁴³ Simun a ke ko, “Nang wu di̱chin ki̱nu nabwene.” N Yesu a yi ki̱n ko, “N fwaa deer.”

⁴⁴ A da̱ng na wu, a yi Simun ko, “Mwang ku nawa? N lewe lomu, mwang niibu mwe mang nuri̱n naniye, aya na wu a nur naniyu ki̱ni ti̱mwenitu a musu ti̱n ki̱ni rii dur ki̱nitu.

⁴⁵ Mwang kwaribu, yinangu mang lewe lomongu, aya yinangu mang lemi̱ne longu, na wu a dubu kwarku mangu.

⁴⁶ Mwang wamibu ki̱nung we durmi̱nu, aya naye wu a wami ki̱nung ki̱ki fi̱rfi̱ra̱ng we nani miyu.

⁴⁷ Mi̱n yi chi̱nu, n da̱u ki̱mi̱n ki̱leti kiyu nabwen niyu, n ki̱n a yung mi keki̱ku yinang yinu nii wu mang du ki̱mi̱n ki̱leti kiyu bayim me a milayi ti̱n bayim.”

⁴⁸ Yinu Yesu a yi naye wu ko, “N dumi̱n ki̱leti mwiyu.”

⁴⁹ “Ni̱bu n ki̱n ki̱chau chabtu waremu a mwe ki̱ti̱ksi̱du ko, n wure ki̱niko, wu ki̱du ni̱bu mi̱n ki̱letiye?”

⁵⁰ N Yesu a yi naye wu ko, “Keku bi̱yili̱mang mwangu a yun, ya li̱mang.”