Luka 5 - Bwaki Kifwiyang

Miyari̱mu n Yesu a mwe swabi̱mu

¹ Wuka ki̱di n Yesu a ti, a ki̱ti̱ku la Sanesa̱retang, ni̱bu a mura ki̱mi̱ntuwe ki̱nwe ya̱m Kwamamu.

² N Yesu a ku kwa̱mbi̱ri mwei yurau, yiyu ni̱bu ki̱ ta̱n chi̱ngi, a yo, a ki̱ti̱ku laang, yo a yaki̱ nura dwa̱kai chiye.

³ N ki̱n a le wuka kwa̱mbi̱re mwe wu, n wu Simun Biti̱r, a yi ki̱n ko, “Sii kwa̱mbi̱re mwe, le mwe, a dudu ki̱tattake we nabwen. N ki̱n a swe we Kwa̱mbi̱re, a miya ni̱bu mi̱n.”

⁴ Yo n ki̱n a ri yungke, a yi Simun ko, “Yika fi a ki̱sulle ki̱ni kwa̱mbi̱re mwe, mar dwa̱kamo we, ke n tau chingiyu.”

⁵ N Simun a yi ki̱n ko, “Nii wuduwe, kumi kwadu ni̱n ti̱rtadu we fi nang tabu chi. Aya di̱ne mwang fwa yiko, mang bunti̱ ya̱m mumu, mang mar dwa̱ka.”

⁶ Kangu n chi a ma yikongu, n chi a tau chingiyu nabwen, yiyu a yo dwa̱ka chi yakani̱n ngi̱radu ki̱ni chingiyu.

⁷ Di̱ne yiko, n chi a ma di̱yal we kebuchimu ni̱bu taku chi̱ngi, a wuka kwa̱mbi̱re mwe ko, a be maka chi. Bi̱ki̱mu a be, a maka chi, a ri Kwa̱mbi̱ri mweyu ki̱ni chingiyu. Di̱ne turenangu, kwa̱mbi̱riyu ki̱su mure.

⁸ Yo n Simun Biti̱r a ku chitu a fweete, a sung we kakku Yesungu, a yi ki̱n ko, “Tewuduwe, du mi̱n, m mi̱n naba ki̱letiye.”

⁹ N ki̱n n ti ni̱bu a fikomi kwang a ya̱r yii, di̱ne nabwe chingiyu n chi a tabiyu.

¹⁰ N Yakubu n ti Yowana bwesi̱m Sa̱badi fati̱bu Simun mu a ya̱r yii ti̱nti̱n. N Yesu a yi Biti̱r ko, “Nwedu tayi we, bwa kake mwang ni̱n bedu ki̱ni ni̱bu ka bumiti̱ni̱m.”

¹¹ A kuteng ki̱ku, n chi a chake Kwa̱mbi̱ri mweyu, a yo, a ki̱ti̱ku laang, n chi a du kuli̱ni ti̱ti kwang, a bunti̱ Yesu.

N Yesu a be naba mwa̱liye

¹² Ki̱dangu n Yesu n ti Miyari̱m ki̱mu a ya di̱kan bi̱nangu, wuka nii wu mwa̱li a chau dukan ki̱ne, a be fi, a di̱Ki̱ne. Yo a ku Yesuwe, a suba sungi ti̱dumi̱n, a wana ki̱n ko, “Tewuduwe, ka mwang kede, n lwe mwang be burang mangu.”

¹³ N Yesu a tar fa̱la̱ng kangu a twai ni wu, a yi ko, “N ke mang benu, ya li̱mang n ya nuraki̱ku.” Bi̱nabi̱na mwa̱liyu a du nii wu.

¹⁴ Yinu n Yesu a yi ki̱n ko, “Ya, fwa nii mi̱nu we, yung dur munu we fanseti, yang ma niku m Musa a fwangu, ki̱ku a dakan we burang ki̱ka̱ngu mwiko, n ya beku.”

¹⁵ Ni̱bu bi̱ba nwe ya̱m Yesumu a ti̱r ya̱mu, a yo ni̱bu nabwen ki̱be bwana di̱Yesuwe ko ke chi nwe ya̱mu, chi yati̱ beku we buri̱n chiitu.

¹⁶ Aya wuka yo n Yesu, ki̱yika fanti yiya ne ni̱bu weyu yaki̱ twa̱ba̱ bunitu we.

N Yesu a be wu ngi̱rmane ni

¹⁷ Wuka ki̱di yo n Yesu a yaki̱ ma miyake, bi̱kam ni̱bu Farisamu n ti ni̱bu yungku yili̱n Musantu bi̱bu a be, a kibi Ka̱lili n ti Yafudiyamu n ti bi̱n Wurchalima n we fiko a sweswe. Dukan Tewuduwe we ware n ti ki̱n. A yo Yesu a be ni̱bu buri̱ni̱mu nabwen we fiko.

¹⁸ We ki̱swi wuko, bi̱kam ni̱bu a be ki̱ni wu ngi̱rmane ni a chi ti̱dari, n chi a ma, ka le lo, ka ni Yesu, ke a be ki̱n.

¹⁹ Yo n chi a yabu wa̱re, di̱ne ni̱bu a ma nabwene. N chi a ku, a ne dawenge, a fi̱l dii a kane, a wum swa̱mu, a si̱ke ki̱n ki̱ni chi daritu we kakku Yesuwangu.

²⁰ Kangu n Yesu a ku keku bi̱yili̱mang chiyangu, a yi ni wu a bubuwe ko, “Bwa̱le, n dumi̱n ki̱leti mwiyu.”

²¹ Ni̱bu yungku yili̱n Musantu n ti ni̱bu Farisamu, n kawure a mwe ki̱fwadu ti keko ko, “N wure ki̱fwa ya̱m swa̱ba̱ni̱me? N Kwama, n ki̱kun ki̱ni da, ka du nimi̱n ki̱letiyu.”

²² N Yesu a swaan chi, n chi ki̱kurade, yinu a yi chi ko, “A mayire ti̱kuran chi̱ntu ki̱twa̱ng wa̱re?

²³ Ti̱ti̱le a la chi, ti̱tu a yi ko, ‘N dumi̱n ki̱letita’, ka ti̱tu a yi ko, ‘Kun, ya yayu ta?’

²⁴ N ke mang ma ti̱tu, ke ti̱yim ti Bwe Nii ki̱ni dukanu ka du nii mi̱n ki̱letiyu we ti̱ti̱nitu.” Yinu a yi nii wu ngi̱rmane ko, “Mi̱n ya̱nu, kun, da̱u chi ti̱dari mwitu n yikan.”

²⁵ Bi̱nabi̱na nii wu, a kun we kakku ni̱bangu, a da̱u chi ti̱dari kitu, a yika lo, ki̱dela Kwama.

²⁶ Kanang wuwule niye we fiko a ya̱r yii, tayu a tau chi, n chi a dela Kwama ko, “Diwu ni̱n ku nangang Kwamang!”

Yesu a sutu Lawi

²⁷ A kuteng ki̱ku n Yesu a ku Lawi, wu ki̱yiu sangkale, a swe a kan sangkali̱n, n Yesu a yi ki̱n ko, “Bumite.”

²⁸ N lawi a kun, a du kanang ti̱ti̱le chiye ki̱ni kwang, a bung ki̱mi̱n ti̱n.

²⁹ N lawi, a sii Yesu mi̱n Yiye wuduwe we loko. Ki̱tuu ni̱be nabwen, wu a ni̱bu ki̱yiu sangkali̱me n ti bi̱kami kwang ki̱chau chabti̱tu ware.

³⁰ Aya ni̱bu Farisamu n ti ni̱bu yungku yili̱n Musati̱m bi̱bu a kwa̱l chi̱nu, a be a ma Miyari̱m Yesumu mi̱n ki̱mwiti̱mwi ko, “Di̱ne wule tani̱n chau chitu n ti ni̱bu ki̱yiu sangkali̱mu n ti ni̱bu ki̱letime?”

³¹ N Yesu a ki̱nta chi ko, “Ni̱bu ki̱ni li̱mamu a babu nabari, kana ni̱bu di̱buum ki̱bau nabari.

³² Mang bebu di̱ne ni̱bu ki̱tum yilem aya m be di̱ne ni̱bu ki̱letimu, ke a wo ki̱ti̱m, a yiu Kwama.”

Di̱bi̱du a dimwen

³³ Bi̱kamu a yi Yesu ko, “Miyari̱m Yowana naba batismamu ki̱ bwa̱ladu we dimwen n ti twa̱ba̱ku buniyangu, miyari̱m ni̱bu Farisamu ki̱ma ti̱ni yiko ti̱n, aya bi̱mumu ditiyu ki̱dang ki̱chadu ki̱noti̱du.”

³⁴ N Yesu a ki̱nta chi ko, “Kano fati̱bu bwele ki̱yiu nayemu, ka ma dimwen yo bwele we ware ti chiya?

³⁵ Aya ki̱swi ka bedu yo ni̱bu ka da̱u bwele ki̱yiu naye we di̱chiye, yinu n chi ka ma dimwen we diti yikiyu.”

³⁶ N Yesu a fwa chimi̱n kaang baltaku ko, “A ne ni wu ka bi di̱fi̱tan luke wufwiye ka tali̱n luke wuka̱re we. Ka fwe yiko, kuli̱n di̱fwinu a kaiyan, di̱fi̱tan luke wufwiyenu ti̱n a ne bikadu n ti kuli̱n di̱ka̱ri̱nu.

³⁷ We da ni̱bu Yafudame, a dakabu ni̱bu ka kur mwe yinabi wufwiye we swe wuka̱re, di̱ne ka a fwe yiko, swe wuka̱re ka fwedu yo mwe yinabiye ka fwide, mwe yinabiye ka yudu a ti̱m.

³⁸ A dakan ni̱bu ka kur mwe yinabiye wufwiye a swe wufwiye.

³⁹ A ne ni ka kedu ka no mwe yinabi wufwiye we, a kuteng ki̱ku n ki̱n a no wu ka̱rengu, aya ni̱bu ki̱yidu ko, wuka̱re a la chi ki̱ni li̱mangu.”