Luka 23 - Bwaki Kifwiyang

Bi̱latu a ma Yesu mi̱n di̱bi̱du

¹ Muraku ni̱bangu ki̱ni kwang a yika ni ki̱ni Yesu a bwadu kwabna Bi̱latu.

² N chi a mwe ki̱tura ki̱nu ki̱yidu ko, “Ni̱n ya nii wu ki̱kai fiswe kuu ni̱be we bi̱nu, a kebu ni̱bu ka ni Kaisar sangkalu, n ki̱n ki̱yiti̱nu ko n ki̱n nang Masiya Mai chire.”

³ Yinu Mai Bi̱latu a bi̱u ki̱n ko, “Mun nang Mai ni̱bu Yafudama?” N Yesu a yi ko, “Nang chi ta fwaatu.”

⁴ M Kwabna Bi̱latu a yi wuduwe fansetiye n ti ni̱bu ko, “Ma yabu nii wu ki̱ni wuka ki̱le.”

⁵ Aya ni̱bu a mwe ki̱fungka ki̱nu ko, “N Ki̱n a tau ki̱miyadu ki̱yo bi̱ngaiyu kasi no bwa̱le we ti̱m Yafudimu. A mwe a Ka̱lili, nau a lam ti̱n Wurchalima.”

N chi a yikani ki̱ni Yesu a di̱Mai Yiridu

⁶ Yo n Bi̱latu a nwe ya̱m bi̱be, a bi̱u ko, “Nii wu naba Ka̱lili ya?”

⁷ Yinang ka nwe ko Yesu a le mati̱n Yiridusangu, a tung ki̱n a di̱Yiridu wu we Wurchalima.

⁸ Yo m Mai Yiridu a ku Yesuwe, a nwe ta̱ma̱ng di̱ne a da yurau n ki̱n ki̱baddu ka ku Yesu di̱ne ya̱mu a nwe a dur ki̱ni̱mu. N ki̱n a yo ni̱ru ka ku chi ka̱ta̱ki.

⁹ N Yiridu a ma ki̱mi̱n ti̱bi̱di̱ritu nabwen, aya Yesu a ni ki̱nbu di̱ki̱li̱n yiin.

¹⁰ Tikake fansetiye n ti ni̱bu yungku yili̱ni̱mu a be kakku Yiridusangu, a fuku ki̱fwara chi n Yesu ki̱madu a lebitu.

¹¹ Mai Yiridu n ti ni̱bu ki̱rangmu a fiita ki̱n, a swa̱ba ki̱n, n chi a do ki̱mi̱n kuli̱n mati̱n a ki̱latuwe ki̱n we di̱ kwabna Bi̱latu.

¹² We diko n Yiridu n ti Bi̱latu a kau fati̱bu kasi ki̱ku n chi a no fakwarbu ferediyangu.

Chi a mwatan Yesu mi̱n Bwa

¹³ Bi̱latu a yale tikaketi fansetiyu n ti mati̱mu n ti ni̱bu.

¹⁴ A yi chi ko, ti̱be miye ki̱ni nii wu tiko ki̱yo yaram we ni̱be, aya ki̱ka̱ngu n ma ki̱mi̱n di̱bi̱du we kakku changu, man yabu nii wu ki̱ni ki̱letiyu ta yi tiko a dur ki̱niyu.

¹⁵ N Yiridu a ya ti̱bu ki̱le. Nang chi a yo, a ki̱l te nii wu we a di̱chine. A ne chitu nabani wu a matuwe, wu a lwe bwange.

¹⁶ Di̱ne yiko, mang twal ki̱nu, mang mar ti̱nu.

¹⁷ [N chi a yo ki̱n a chaku chimi̱n nii wiin.]

¹⁸ N chi ki̱ni kwang a yibi kemi ko, “Ti̱chi̱u nii wu ti̱mar nimi̱ne Barabas!”

¹⁹ Barabas wu n chi ki̱fwade nang wu a le di̱binti̱l a kuku di̱kulan we bi̱nu a chi̱u nii wiin.

²⁰ Yade m Bi̱latu a no ki̱baddu ka chaku Yesu we a fwa chimi̱nti̱ ya̱mu ki̱da.

²¹ Aya n chi a chakakku ki̱ni kemiyu ko, “Ti̱kukan, ti̱kukan!”

²² Bi̱latu a ki̱lan ki̱tarang ko, “A mayire? Naba ni wu a ma wuwule ki̱le? Mi̱n fwa chimi̱n ma yabu ni wu ki̱ni ki̱le a lam chike. Ma yodu ni̱bu ka twala ki̱nu, ka mayi ti̱du.”

²³ N chi ki̱su kemiyu ko, “Ti̱kukan, ti̱kukan.” Kemiyu a lala.

²⁴ A kuteng ki̱ku, m Bi̱latu a ki̱nta chi ka ma chi, n chi ki̱badde,

²⁵ Aya Bi̱latu a kwi chimi̱n nii wu a no a di̱bi̱nti̱le di̱ne ri̱ki̱ne ko n ti kakku durangu n ki̱n a chi̱bi̱nu, yina ni chi Yesu.

Kukaku Yesung

²⁶ Yo ni̱bu ki̱rangmu a yikani ki̱ni Yesuwe, n chi a tau wuka ni we ware di̱n ki̱nu n Simun naba Sairine, a ni ki̱tiyang bwangu ko a da̱u, a nang nabu Yesu.

²⁷ Muraku ni̱bangu nabwen a bun chimi̱nti̱n ware n ti nati̱bu ki̱bwe wii bwa ki̱ki wiimu.

²⁸ Aya Yesu a sabran a yi chi, ko, “Nati̱m Wurchalima, ti̱kidu wii we di̱ne mi̱n aya ti̱ki di̱ne dutu chi̱n n ti Bwesi̱m chimu.

²⁹ Wuka di ni̱bu ka yidu ko, ‘Nati̱bu a ne bwesi̱m wemu a ma ki̱ti̱me.’

³⁰ Yinu n chi ka yi kunitu ko, ‘Da ni̱mi̱ntuwe, yinge ni̱n.’

³¹ “Ka ni̱bu ka ma ti̱chitu yo tini a kusube, ka kadi yire yo ka kusude?”

³² Bi̱kam Ni̱bu bi̱bwilami burau a yati̱ kukaku ware n ti Yesu.

³³ Yo n chi a lam fi ni̱bu ki̱yalu ko kasire, n chi a kuka ki̱n a fiko n ti ni̱bu bi̱bwilam, wuka a kang ki̱yilang, wuka a kangtakwelang.

³⁴ Yinu Yesu a yi ko, Tete, du chimi̱n di̱ne n chi a yimbu chi ki̱maditu. Yinu n chi a ma kuriya we a luke.

³⁵ Ni̱bu a ti ki̱da̱ndi̱mu n ti tikaketi mati̱mu ki̱fi ki̱nu, ki̱yidu ko, “A yu bi̱kamu, a mayire a ne yu yikiye ka nang Masiya wu suture wu Kwama.”

³⁶ Ni̱bu ki̱rangmu a ma ki̱mi̱n di̱fiir ti̱n. N chi a ni ki̱n chi bwangbwange, ko a no.

³⁷ Ki̱yidu ko, “Ka mun nang Mai ni̱bu Yafudame, yu dur munu!”

³⁸ We dii a di̱ki̱ne a mwal ya̱mu ko, “WU NANG Mai NI̱BU YAFUDAME.”

³⁹ Wuka we ni̱bu bi̱bwilamu ki̱ swa̱ba ki̱nu kiyi ti̱n ki̱nu ko, “Mun m Masiya? N yu dur munu n ti ni̱n.”

⁴⁰ Wukane a wela keko ko, “Mwang nwebu tai Kwama ya? Mare m mun a fi wiine n ti ki̱n.

⁴¹ Chi ni̱bu ki̱ma nimi̱de ki̱ma ni̱mi̱n chi a dakane, di̱ne chi niyang maatu aya n ki̱n a mabu ti̱kan chi ti̱tu a lebi.”

⁴² Yinu a yi ko, “Yesu kurti̱ mi̱n we yaamo.”

⁴³ Yesu a yi ki̱n ko, “Mi̱n fwa mi̱nu diwu mang swedu ti mun we Yaa Kwama.”

Bwa Yesuwe

⁴⁴ A bwana tibe kuko, ki̱liye a sum ti̱mu, a lanti̱ yo di a kau yinang ki̱swi yitta.

⁴⁵ Dii a du yiiku ti̱mangu. Labule a swe fi wauwade we Kan Kwamanu a Wurchalimanu a ngi̱ran ti̱nti yurau.

⁴⁶ Yinu Yesu a kuki̱ keru dukan a yal ko, “Te! Mi̱n ni ti̱kuri mitu a di̱mune.” Nanga fwa bi̱bangu, a mar duri kwa̱klak a bwa.

⁴⁷ Tikake naba ki̱range wu we fiko ki̱dangu chitu a fwenge, a dela Kwama ko, “Bi̱yili̱m ni wu a ne ki̱lewe!”

⁴⁸ Ni̱bu no a tirana fikomu kangu a ku chitu a fwetangu, n kawure ki̱ngau kwiye ki̱yikati̱nu di̱ne kaiyan ni̱re.

⁴⁹ Aya ni̱bu ki̱ni kwang bi̱bu a yim Yesumu n ti nati̱bu a bunga ware we Ka̱lilimu a tiye kutan ki̱da̱ng ti̱chitu wu.

Furem Yesum

⁵⁰ Wuka nabani we di̱n ki̱nu n Yusufu Arimatiya, ki̱n we bi̱duum bi̱bu a ni̱bu Yafudamu, n ki̱n nii wu yile, ki̱tum bi̱yili̱m.

⁵¹ N ki̱n a kebu ki̱ni mwataku ya̱ma̱ngu n ti chi ni̱bu a maatu, n ki̱n a be a bi̱n Yafudan wu a Arimatiya, n ki̱n a ti a yam Yaa Kwama.

⁵² N ki̱n a ya bwanu a di̱kwabna Bi̱latu, a bi̱u kwa̱me Yesu ko ka furu.

⁵³ N ki̱n a si̱ke kwa̱me, a bwa̱bani ki̱ni ti̱lukteni ti̱ti mwemwen, a di̱ku a wure kwa̱me wu ni̱bu a swa̱uswa̱be. Ni̱bu a furi̱nbu ni we fiko.

⁵⁴ Diko di sabwi ni̱bu Yafudam, ni̱bu ki̱do bwi di̱ne Difi̱kare ni̱bu Yafudam a mwatan ka mwedu.

⁵⁵ Nati̱bu bi̱bu a bungan n ti Yesu a Ka̱lilimu a nabu Yusufu, a ya kuwe furu n ti kangu a ti̱n bwiyangu.

⁵⁶ Yinu n chi a ki̱la lo, a da̱u ki̱nung ki̱ki fi̱rfi̱ra̱ngu n ti ki̱warangu. Aya n chi a fi̱kan difi̱kare ni̱bu Yafudam ke chi bunti̱ yili̱ntu.