Luka 22 - Bwaki Kifwiyang

Yafuda a kwa̱l Yesu.

¹ Yo ki̱swi Yiye wu a ki̱dane wu a ne chi ki̱fude we, ni̱bu ki̱yalu ko Yiye yabake a lame.

² Aya wuduwe fansetiye, n ti ni̱bu yungku yili̱n Musati̱mu, ki̱babba wa̱riyu ka yo Yesu ka bwadiyu. N chi ki̱nwe tayi ni̱biyu.

³ Yinu n Setan a le ni̱r Yafuda Yiskariyoti, wu n ki̱n we miyari̱mi kub chiri burabi̱me.

⁴ N Yafuda a ya yi tikake Fansetiye n ti bi̱duumu ki̱to Kan Kwamana Wurchalimanu yinangu ka kwa̱l chimi̱n Yesuwangu.

⁵ N chi a ma furi mwemwen, a ke ka ni ki̱n ka̱mbi̱r.

⁶ Yafuda a ke ti̱n, a bau kana da wu ka niin Yesu a di̱chiye a yo a ne muraku we.

N Yesu a chau chabtu n ti Miyari̱m ki̱m

⁷ Yinu di Yiye yabake wu a chaku ki̱danne wu a ne Yis we a lame, wu ni̱bu ki̱ma niku ki̱ni kwan niki̱ne.

⁸ N Yesu a tum Biti̱r n ti Yowana ko, “Ya ti̱do nimi̱n chabtu Yiye yabake ti̱tu niing chadu.”

⁹ Chi a bi̱u ki̱n ko, “Mun baddu yana dodu a bwa̱le?”

¹⁰ A yi chi ko, “Ka ti̱le bi̱ne, ta tekadu n ti nii ki̱ni sur mwen. Ti̱bunti̱ ki̱n ka lam mi̱nti̱ fi ka lede.

¹¹ Yinu ti̱yi naba lo tiko, ‘Naba yungke ki̱bi̱du, a bwa̱le kan rungkonu, fi mang chan chabtu Yiye yabake n ti miyari̱m mi̱me?’

¹² N ki̱n ka yung chi̱n di̱kan kan di̱dun ki̱ni fanti sweriyu we. Ti̱do chabti̱tu a fiko.”

¹³ N chi a yikan, a ya chitu we yinang ka n Yesu a fwa chimi̱nangu. N chi a do chabtu Yiye yabake ti̱tu fal.

Ki̱danne Tewuduwe

¹⁴ Yo ki̱swi a lame, n Yesu ti fandubu ki̱mu a swerani mal we teburu.

¹⁵ N ki̱n a yi chi ko, “M bau mang chau chabtu ti̱tu Yiye yabake, yinu mang nwe riye.

¹⁶ Mi̱n fwa chimi̱nu, ne mang chati̱ chabtu ti̱tu ki̱da, ka lami̱nti̱ ki̱dangu ti̱chitu wu ka ridu wa Yaa Kwamangu.”

¹⁷ A kuteng ki̱ku n ki̱n a da̱u be sanengu, a wana Kwama, yinu a yi ko, “Ti̱da̱u ti̱keran we yichiyu.

¹⁸ Mi̱n fwa chimi̱nu, a ne mang noti̱nu ki̱da we mwe yinabe, ka lami̱ti̱ yo Yaa Kwama ka bede.”

¹⁹ Yinu a da̱u ki̱danne, a ma di̱wana di̱Kwama, a wulan, a nika chi, a yi ko, “Yiyu bwimi, yiyu mang nidu di̱ne chi̱ni. Ti̱ma ying ti̱nang kuri̱n mi̱nu.”

²⁰ A lakanbu, a da̱u wuka sa̱ne ko, “Wu sa̱ne wu a bwa̱ki̱ ki̱fwiyange a ki̱tum mi̱m, wu mang kuru di̱ne chi̱ne.

²¹ Aya fa̱la̱ng ni wu yaka kwa̱liye we chi̱be mi̱n chande ware n ti ki̱n.

²² Aya Bwe Nii ka bwadu yinang kangu a do ki̱mi̱nangu, aya a no ni wu n ki̱n ka dwalade.”

²³ We fiko miyari̱m ki̱mu a le ki̱bi̱be yichiyu, ka nodu n wure we tibe chi ka ma ti̱te.

²⁴ Ti̱kwilantu a kun we tibe chi ti̱n, we ka nang wuwule ni wu a la chiye.

²⁵ N Yesu a yi chi ko, “Mati̱m kuuti ni̱bu bi̱bu a yimbu Kwamamu ki̱yo ni̱bu mi̱n mati̱n. Bi̱kam chimu ki̱yidu ko n chi ni̱bu makaki̱ ni̱bi̱m.

²⁶ Aya we di̱chine, ni̱bu chim bi̱duumu we tibe chi̱n a kau yinang bi̱ti̱ri̱m, bi̱kaki̱mu a kau yinang Bwesi̱m ditumbi̱ri̱m.

²⁷ Kano n wure nang wuduwe, nang nii wu a swe a tebura, ka wu ki̱kera chiya? N ke wu a swe a tebure? Aya mi̱n we tibe chi̱n mi̱n kera chimi̱nu.

²⁸ N ti̱n nang bi̱bu ta timituwe we ki̱dang swa̱ka̱ku mangu.

²⁹ Nangki̱n mang ni chi̱n yaa yinang mati̱m, Yinang ka n Temi a ni mi̱n wukangu.

³⁰ Ke ti̱chau, ti̱noti̱n we tebur mi̱nu we yaa mi yinu ta swedu yinang mati̱m ta mwata kuu Yisrela kub chiri burab mi̱nu.”

M Biti̱r yaka kwila Yesu

³¹ N Yesu a yal ko, “Simun Biti̱r, n Setan ki̱baddu ka swe ka nang wuwule chi̱ne. Ka yu chi̱nu yinangu naba kuwe ki̱chaku chaam we tui kitangu.

³² Aya n twa̱ba̱ mi̱n buni Biti̱r, mi ke keku bi̱yili̱mang mwangu a ki̱taduwe. Yo mwang ki̱la bwa di̱mi̱ne, maka bi̱kamu.”

³³ M Biti̱r a yi ko, “Tewuduwe, n ke mang ya lo di̱bi̱ti̱le ware ti mun, ka bwange ni bwati̱du ware.”

³⁴ N Yesu a yi ko, “Mi̱n fwa mi̱nu Biti̱r a ne lanti̱ kunsiin kware ki̱tari̱n chiye, mwang kwilayu ki̱da yitta mwi mwang yimbu mi̱n.”

Ti̱so bwiti chiyu di̱ne ki̱swi riye ki̱bede

³⁵ Yinu n Yesu a bi̱u miyari̱m ki̱mu ko, “Yo mang tum chi̱n a ne ka̱mbi̱r we, a ne chabtu we, a ne swe we ka ki̱wamiye, ti̱kwala ti̱kan chiya?” N chi a yi ko, “Ngango.”

³⁶ Yinu n ki̱n a yi chi ko, “Aya ki̱ka̱ngu ka nii ki̱ni swe ka̱mbi̱re, a tati̱ we fa̱la̱ngu n ti swe yayuwe. Yinu ka n ne kul wenge, mi lukemo ta̱ni wiin.

³⁷ A mwalmwale ko, A ki ki̱n n ti ni̱bu ki̱letimu. A mwintuwe ka ridu n ti mi̱n. Ki̱kumang chi ni̱bu a mwal a dur mi̱nitu ki̱lam fi a ki̱yilang kange.”

³⁸ Miyari̱m ki̱mu a yi ki̱n ko, “Tewuduwe, kulitu nang ti̱ti turabu.” N Yesu a yi chi ko, “A lwe yi ko.”

Yesu a twa̱ba̱ buni a ku Saitune

³⁹ Yesu a du bi̱nu a yika ku Setuniye, miyari̱m ki̱mu a buntu ki̱n.

⁴⁰ Yo a lam fikonge a yi chi ko, “Ti̱twa̱ba̱ buni ke ti̱yaruwe sweki̱ku.”

⁴¹ Yinu a ki̱lani kuteng a ni chi baki̱twalangi bayim, a sung, a twa̱ba̱ bunitu.

⁴² A yi ko, “Tete, ka mwang kenge yo n nwedu riye we. Aya n ke di̱ne ki̱ke mi, ma ki̱ke mo.”

⁴³ Yinu naba di̱tumbi̱re Kwama a chire a bwa diye, a be ni ki̱n dukanu.

⁴⁴ Di̱ne ni̱r ki̱nu a mutene, a le twa̱ba̱ bune wu a yo ture ko ki̱yaradu yinang ki̱tuum we ti̱mu.

⁴⁵ Yo Yesu a kun we twa̱ba̱ku buniyange, a ki̱la bwana miyari̱m ki̱me, a ya chi a da duum di̱ne n chi a tibwi we kaiyan ni̱re.

⁴⁶ A yi chi ko, “A mayire ti̱da duume? Ti̱kun ti twa̱ba̱ buni ke ti yaruwe a sweki̱ku.”

Ni̱bu a tau Yesu

⁴⁷ Yo n Yesu we ki̱fwa ya̱me, muraki̱ ni̱bangu a be. Ni wu ni̱bu ki̱yalu ko Yafuda, wu wetuwe miyari̱mi kub chiri burabi̱m ki̱me, a ti chimi̱ne kakku, n ki̱n a be ka kwar Yesu.

⁴⁸ Aya Yesu a yi ko, “Yafuda, mwang mi Bwe Nii ki̱ni kwarka ka?”

⁴⁹ Yo miyari̱m ki̱mu a ku chi yaka fwedite, a bi̱u Yesu ko, Tewuduwe, “Ni̱n ma kunu ki̱ni kuli ni̱nta?”

⁵⁰ Yinu wuka chi a mwatu ki̱tele ka̱be wuduwe fansetiye wu a kang ki̱yilange wad.

⁵¹ N Yesu a yi chi ko, “A ri yiko! A twai ki̱tele niwe, a beti̱ ni wuwe.”

⁵² Yinu n Yesu a yi wuduwe fansetiye, bi̱duumu we bi̱bu ki̱to Kan Kwamana Wurchalimanu, n ti seli̱bu bi̱bu a be ka tau ki̱ni̱mu ko, “A mayire ta chire ki̱ni tooti, kuli n ti dwami yinang ka m mi̱n wu bwilange?

⁵³ Ditiyu ki̱dang mi̱n we ware ti chin we Kan Kwamana Wurchalimanu, ta taibu. Aya ki̱ka̱ngu nang ki̱swi chi̱n wu a dukan ki̱liyene.”

M Biti̱r ko ka yimbu Yesu

⁵⁴ N chi a tau Yesu a yikan lo tikake Fansetiye m Biti̱r a marti̱ ki̱twalang ki̱bun chimi̱nti̱nu.

⁵⁵ Yo n chi a mwaka ki̱rang, we tare lo, a sweran a fiwiine. M Biti̱r a swetuwe ti chi.

⁵⁶ Wuka we mure ka̱be be fwa̱ne, wu a swe ki̱do n ti ki̱range, a da̱ng ki̱n yinang, yina fwa ko, “Nii wu no ware n ti Yesu!”

⁵⁷ Aya Biti̱r a kwilan ko, “Naye, mang yimbu ki̱n!”

⁵⁸ A mabu ki̱twalang, wuka nii a ku ki̱n a yi ko, “M mun ti̱n wetuwe mure chi.” M Biti̱r a yi ki̱n ko “Tete, mi̱n n ke ki̱n.”

⁵⁹ Ki̱twalangu yinang awa wiin, wuka nii a ti chik ko, “Ki̱kumang nii wu we ware n ti ki̱n, n ki̱n naba Ka̱liliye.”

⁶⁰ Aya Biti̱r a yi ko, “Tete, mang yimbu chi mun fwaditu!” N ki̱n a tibu ri ya̱mu, kware a ta̱r ti̱n.

⁶¹ Tewuduwe a sabran a da̱ng Biti̱r ri̱ng, yinu m Biti̱r a kur chitu Tewuduwe fwa ki̱mi̱nitu ko, “Ka lanti̱n yo kware ka ta̱re we kum wu diye, mwang yidu mwi mwang yimbu mi̱n ki̱da yitta.”

⁶² M Biti̱r a chir fi̱lang, a ki wii dukan.

Ni̱bu toki̱mu a ma ti̱kali ki̱ni Yesu

⁶³ Yinu ni̱bu ki̱to Yesumu, a le ki̱fita ki̱nu ki̱ngauti̱ ki̱nu.

⁶⁴ A bwa̱ba ki̱mi̱n nuyu, ki̱ngadu yinu ki̱bi̱u ki̱nu ko, “M ma fa̱kuitu, n wure ngane?”

⁶⁵ N chi a fwa ki̱mi̱n ya̱miyu nabwen yiyu a swa̱ba̱ke n ti ki̱fiyeyu.

A yikani ki̱ni Yesu a di̱ Bi̱latu n ti Yiridu

⁶⁶ Yo ti̱mu a kwiyane, bi̱duuma kuumu n ti wuduwe fansetiye n ti kwa̱l ni̱bu yungku yili̱n Musati̱mu a muran, yinu ni̱bu a ya chimi̱ni ki̱ni Yesu.

⁶⁷ Chi a bi̱u ki̱n ko, “N fwa ni̱mi̱n, ka mun nang Masiya?” N Yesu a ke ki̱mi̱n ko, “Ka n fwami̱ne, a ne mwan ke bi̱yili̱mu we di̱mi̱ne.

⁶⁸ Ti̱nti̱ne ka m ma mi̱n di̱bi̱de, a ne mwang nii di̱ki̱li̱n yiin.

⁶⁹ A mwetuwe ki̱ka̱ngu Bwe Nii ka swedu a kan ki̱yilang Kwama naba dukane kwang.”

⁷⁰ N chi ki̱ni kwang a bi̱u ki̱n ko, “M mun Bwe Kwama?” A yi chi ko, “Ti̱fwa tas yinang ka ta yi tiko mi̱n nangki̱nangu.”

⁷¹ Yinu n chi a yi ko, “Yinu ni bau wule wu niyang yabe? A fwa n ki̱fwan.”