Luka 21 - Bwaki Kifwiyang

Niku nabune

¹ N Yesu a kuku kabu ko a ku ni̱bu ki̱ni ka̱mbi̱ri̱mu ki̱mar niku chiyangu a kwa̱se nike.

² Yinu a ku wuka nabune a mar kobo yurau.

³ Yinu Yesu a yi ko, “Bi̱yili̱m mi̱n fwa chimi̱nu, niku di̱lusan nabune wunu, a la wu bi̱kamu a niye kwang.

⁴ N kawure a fwe we chi n ki̱ni ki̱ne aya di̱lusan nabunenu a ni chi n ki̱ni ki̱ne kwang.”

Di̱mwal a di swang kuteng

⁵ Bi̱kamu miyari̱m a le ki̱fwadu yinangu Kan Kwamana Wurchaliman a le ki̱ni kaliyu ni̱bu a mubbi ki̱niyu n ti ki̱li̱mangu ni̱bu a tal we bwiki̱niyu. Aya n Yesu a yi ko,

⁶ “Ti̱ku kali yiya? Ki̱swi ki̱bedu wu neta ya wuka kale a di a wukane, ka nang wuwule ka tungadu.”

Riye ki̱bede

⁷ Yinu n chi a bi̱u ki̱n ko, “Naba yungke ti̱chituwu ka fwedi fere? Yinu di̱mwalu kanodi yire wu ka yungdu ti̱chitu wu yaka fwede?”

⁸ Yinu a yi chi ko, “Ti̱ma dandan, wuka nii a buti̱du chi̱n we, di̱ne ni̱bu nabwen ka bedi di̱n mi̱n, ‘Kanang wuwule ki̱yidu ko, n ki̱n nang Masiya,’ ti̱nti̱ne, ‘Ki̱swi a lam,’ ti̱bunti̱nu chiwe.

⁹ Yo ta nwe kumbite n ti ti̱kulaniye, ti̱wulu tayi we a mwintuwe ti̱chituwu ka mwedu ka fwedu, aya n ke di swa̱n kute.”

¹⁰ N ki̱n a chakakku ki̱fwadu ko, Kuu ka kuladu n ti kuu ti̱m n ti ti̱m

¹¹ Ti̱mu ka mi̱kadu ki̱ni dukan, chun n ti di̱kumen ka fwedu a fanti nabwen. Ni ku chi taiyitu nabwen we dii.

¹² “Aya ka ti̱chitu wu yaka fwede, ni̱bu ka taba chi̱nu, ka ni chi̱n riye. Ka yikadu ki̱ni chi̱n a kan muraki̱n n ti loni di̱bi̱nti̱li, ka bedu ki̱ni chi̱n a kakku mati̱m mang n ti kwabnati di̱ne di̱n mi̱ne.

¹³ Ti̱chituwu ka ni chi̱n da wu ta fwa chimi̱n ya̱m bi̱li̱me.

¹⁴ Ti̱kaiyu ni̱r we ti ta fwadu ko wule.

¹⁵ Mang ni chi̱n ti̱kwa̱liyitu n ti kassan ke ti̱yim chi ta fwaditu. Ni̱bu a ko chini̱mu a ne medu ka sute ya̱mu ka, ka kwila chitu ta yi chidite.

¹⁶ Tebu chimu n ti kebu chimu, n ti nami̱n chi̱ntu n ti fati̱bu chimu ka ko chi̱nu, n chi ka chi̱be bi̱kam chimu.

¹⁷ N kawure ka ko chi̱nu di̱ne di̱n mi̱ne.

¹⁸ Aya kasi no ki̱riyangi kiin we duru a ne twiyadu.

¹⁹ Ka ti̱ti ki̱ri̱ng we di̱n mi̱ne ta ya yuku ti̱kuri chi̱ntu ki̱diya kwadu.”

Yesu a fwa yare Wurchalima

²⁰ “Kati̱ ku ni̱bu ki̱rangmu a di̱ku Wurchalima a tibe, ta yindu ko yare ko a lame.

²¹ Yinu ni̱bu a mure Yafudamu a wul kun. Bi̱bu a bi̱ni̱mu a chir, aya wu no a chir we bi̱ne, a leweduwe.

²² Nang ki̱swi wu wa ti̱welane ke a rii ti̱tu ni̱bu a mwal a ya̱m Kwamamitu.

²³ A no nati̱bu ki̱ni lubimu n ti bi̱bu ki̱bwa̱u bwesi̱mu! Riye nabwen ka le ti̱mu n ti ki̱fwini Kwama we ni̱bu bi̱bu.

²⁴ Ni̱bu ka chi̱be bi̱kamu ki̱ni kul, yinu ka kaar bi̱kamu ka kau ka̱bi we kuuti. Kuuti ka faba Wurchalima ka lami̱nti̱ yo ki̱swi ka ride.”

Yo Bwe Nii ka ki̱lade

²⁵ “Ni̱bu ka ku di̱mwalu we dii n ti swangu n ti ki̱switi. We ti̱ti̱nitu kuuti ka ka̱ta̱du ka mutedu di̱ne nabwe diir mwenu n ti ki̱kuuli kiyu.

²⁶ Ni̱bu ka funu di̱ne taiyi chi ki̱lewe ti̱ti̱niye. Dukan ka ti̱ti̱le we bwadiye ka mi̱kadu.

²⁷ We ki̱dang kangu, n chi ka ku Bwe Nii ki̱bedu a ti̱twini ki̱ni dukan ki̱ni dwiyen ti̱dui.

²⁸ Yo ti̱chitu wu a mwe ki̱fwede, ti̱kun ti̱ti yinang di̱ne yuki̱ku a lame ki̱dwan.”

Miyaku a tiyang sinang

²⁹ Yinu n Yesu a fwa chimi̱n ki̱ku baltaku ko, ti̱da̱ng tiyang sinangu n ti yikayu tini kwang.

³⁰ Ka a mwe ki̱twa̱ba̱ lwangi̱nte, ta kudu n ti̱n ti̱fwan ta yinti̱nu ko didi̱be a lame.

³¹ Aya ka ti̱ku ti̱chitu wu ki̱fwede, ta yindu ti Yaa Kwama a lame.

³² Bi̱yili̱m mi̱n fwa chimi̱nu, ki̱dang ki̱ku a ne sudu ka lami̱nti̱ yo ti̱chitu wu ka fwede.

³³ Dii n ti ti̱mu ka sudu aya ya̱m mi̱mu a ne sudu ko bayim.

³⁴ Ti̱ma daandan! Ka ni̱tu chi̱ntu a ma tureng ki̱ni chachabe n ti nori̱n n ti mabwi ti̱ti̱niye, di wu beka fu chi̱nu yinang kul a ne doku bwiyang we.

³⁵ Di wuko ka ya̱r kawure yii we a ti̱ti̱nitu.

³⁶ Ti̱swe ki̱ni doku bwiyangi kwadu, ti̱nang ma twa̱ba̱ku ditiyu ki̱da̱ng, ke ti̱chir we chi ki̱yadu ka fwede. Di̱ne ke ti me ti̱ti we kakku Bwe Nii yangu.

³⁷ Kanang wule diye, n Yesu ki̱ma miyaku we Kan Kwamana Wurchalimanu, aya ka di a lenge, ki̱chiru ki̱yika kunu ki̱ni tini Setuniye ki̱diye kum we bwako.

³⁸ Ki̱ni kunsiin ni̱bu kwang ki̱bedu be ki̱nwe miyaku kangu a Kan Kwamana Wurchalimanu.