Luka 17 - Bwaki Kifwiyang

Yodu bi̱kamu a yaru we

¹ Yesu a yi miyari̱m ki̱mu ko, “Chi ki̱yo ni̱bu ki̱ma ki̱le, a mwintuwe ka bedu ka ya chi̱nu. Aya ka kau chi ki̱bune we nii wu a yo yare.

² A no la nii wuko mi̱n chi ka a no kwau kale nere we kwir ki̱nu yinu ka mar ki̱nu a far di̱dun n ti ki̱ku ka yo nii wu a yiu Kwama a mabu ki̱lenge mi̱n yare.”

³ Ti̱ma ki̱yolang we yichiyu. “Ka ke mo a mami̱n ki̱lenge, fwa ki̱mi̱n ya̱m, ka a bau woki̱ ki̱ti̱mange, du ki̱mi̱n ti̱n.

⁴ Kasi no a ma mi̱n ki̱le ki̱dati yi yidibiin we diwiine, ka a ki̱lawe ko n du ki̱mi̱ne, du ki̱mi̱n.”

Keku bi̱yili̱mang

⁵ Yinu fandubu Kwamamu, a yi Tewuduwe ko, “Maka ni̱n, ke ni̱n ti ki̱ri̱ng we keku bi̱yili̱mangu.”

⁶ Tewuduwe a ki̱nta chi ko, “Ka keku bi̱yili̱mang changu a lam yinang ki̱kwi ki̱si̱raiye, ta yi nabwe tiyang ki̱ku tiko chir we fi, yang ti a tibe far di̱dune, ka fwe ti̱ni yiko.”

⁷ “Ni da̱du ka wuka nii ki̱ni ka̱be wu ki̱su kumi̱n ti̱m ki̱toti̱ kwantiye, yo ka ki̱ladu we nachange, mwang yi ki̱nu mwi a funti̱bwi a chau chabtu kita?

⁸ A ne mwang yidu mwiko sii mi chabtu metu, be miye ki̱n mang chadu, mang noti̱du yinu mwang chau ti̱mwiya?

⁹ Kano ka̱be ka ya ti̱wanan di̱ne n ki̱n a ma nangang ka dakananga?

¹⁰ N chi̱n ti̱n ka ti̱bunti̱ chi ni̱bu a yi chi̱n ko ti̱mangite, ta yidu tiko n ni̱n ka̱bi ni̱ni̱n ma chi ni̱bu a yi ni̱n ko ni̱n ma.”

Yesu a be ni̱bu mwalimi kubu

¹¹ Yo n Yesu a tau wa̱re ki̱yika Wurchalimange, a bunti̱ ki̱dire Ka̱lili n ti Samariya.

¹² Yo n ki̱n a lam be bi̱ne, ni̱bu mwalimi kubu, a ya ki̱n. N chi a ti da̱k.

¹³ A yal chi ki̱ni dukan ko, “Wa Yesu Tete nwe ki̱bune ni̱n!”

¹⁴ Yo n Yesu a ku chiye, a yi ko, “Ti̱ya bwa fansetiye a da̱ng chi̱n.” We wa̱re n chi a be we mwalitu.

¹⁵ Wu wiine kanga ku ka bengu, a ki̱lawe ki̱dela Kwama ki̱ni ker di̱dun di̱ne li̱me n ki̱n a yange.

¹⁶ A be sung a kakku Yesu, a wana ki̱n, nii wu naba Samariya.

¹⁷ Yesu a yi ki̱n ko, “Ni̱ba ya beki̱mi kubu, bi̱bu turkubumu a bwa̱le?

¹⁸ A mayire kana rungko ka ki̱ladu be ka ma di̱wanu we di̱Kwama?”

¹⁹ N Yesu a yi nabani ko, “Kun n yikan, keku bi̱yili̱m a di̱mi̱nengu a been.”

Yaa Kwama ware n ti chi̱n

²⁰ Bi̱kam ni̱bu Farisamu a bi̱u Yesu ki̱swi Yaa Kwama ka bede. N Yesu a yi ki̱n ko, “Yaa Kwama a bebu yinang ka mwang kudu ki̱ni nuiyang.

²¹ Ka nii ka ya̱nu ko n da̱ng nang wuwe, ka nang wu a bwa di̱ne we ware n ti chi̱ni.”

²² Yinu n ki̱n a yi miyari̱m ki̱mu ko, “Ki̱swi ki̱bedu wu ta baddu nota ku wuka di we ditiyu Bwe Nii a mayu, aya ne ta yadu.”

²³ Ni̱bu ka bedu bi̱bu kani̱n yi chi̱nu ko, da̱ng n ki̱n a bwa ka, ka yidu ko ti̱da̱ng n ki̱n a fiye, ti̱yaduwe.

²⁴ Yinang ka ta ku ki̱yile ki̱chiredi kwa̱lbu we kangu ba̱la̱ng ki̱fweti̱nu a kangu ba̱la̱ngu, nang yinang ka di Bwe Nii kano we wemi̱nangu.

²⁵ Aya n ki̱n ka mwedu ka nwe riye chitu nabwen, yinu ni̱bu di̱kalan di̱di̱mu ka koti̱ ki̱nu.

²⁶ We yiko, yinang kangu a fwe we ki̱dang Nufuwangu, nang kangu ka fweti̱nu we ki̱dang Bwe Nii yangu.

²⁷ Kanang wuwule niye a lekan we chachabe n ti nori̱n tu, kwartabu n ti nati̱bu a lekan a kana ki̱nati a lami̱nti̱ di n Nufu a le kwa̱mbi̱re mwe. Mwe bambi̱li̱me a be bulma chi a bwarani ki̱ni kwang.

²⁸ A lakabu n ti diti Lotu, ka nang wuwule ki̱chadu ki̱nodu, ki̱ta̱nu ki̱feki̱du, ki̱fidu ki̱muba ti̱nu.

²⁹ We diko, n Lotu a dun Sodome, ki̱rang n ti ki̱fi̱bti ki̱rangi ki̱ swiyedu we dii, a chi̱be ni̱bu kwang.

³⁰ Nang chi ka fwedu we di Bwe Nii ka ki̱la mi̱nede.

³¹ We diko, ka a ya mun a yifi̱la, ki̱ladu lo we mwi yamwang da kuli̱n mun. A fi wiine n ti wu a no yika kire, a ki̱ladu lo we.

³² Ti̱kur chi a fwe ki̱ni naye Lotu we chitu a maatu.

³³ Nii wu ka funti̱bwi ko ka to ti̱kuri kite, ka kwa̱la̱du, wu a mar ti̱kuri kite ka ya yuku.

³⁴ Mi̱n fwa chimi̱nu, we kum wuko, ni̱bi burau ka da duum a kwa̱mbi̱re wiin, ka da̱u wuka ka du wuka.

³⁵ Nati̱bu burau kanodu ki̱kwa cham, ka da̱u wuka, ka du wuka a kuteng.

³⁶ Ni̱bi burau kani̱n ma nangangu we kuu, ka da̱u wuka, ka du wuka we.

³⁷ Yinu miyari̱m ki̱mu a bi̱u ki̱n a yi ko, “Tewuduwe, a fi̱re, a bwa̱le?” A yi chi ko, “Kasi no bwa̱le fi kwa̱me we mi̱ne nang fi ki̱sungti̱kwasiyu ki̱murande.”