Luka 11 - Bwaki Kifwiyang

N Yesu a miya twa̱ba̱ku buniyang

¹ Wuka di n Yesu a yikan yaki̱ twa̱ba̱ buni, a wukane fi. Yinu wukane we miyari̱m ki̱mu, a bi̱u ki̱n ko, “Tewuduwe, m miya ni̱mi̱n twa̱ba̱ki̱ buniyangu yinangu n Yowana a miya miyari̱m ki̱mu mi̱nangu.”

² Yinu n Yesu a yi chi ko, “Ka yati̱ twa̱ba̱ bunite, ti̱yi ko, ‘Te ni̱n wu a diye, di̱n muni wauwadu. yaamo a be.

³ Ni ni̱n chabtu ti̱diitu n ti ti̱ti kwaditu.

⁴ Du ni̱mi̱n ki̱leti niyu, yinangu ni̱n du bi̱bu ki̱ma ni̱mi̱n ki̱letimu. Yo ni̱n yaruwe sweki̱ku.’ ”

⁵ N Yesu a yiti̱ miyari̱m ki̱mu ki̱da ko, Kanodu wuka nii we tibe chi̱n ki̱ni fate, a ya bwa di̱ki̱ne yi ki̱tangti̱lang kuma̱ng, a bi̱u ki̱n ko, fate, makai ki̱ni chabtu.

⁶ Di̱ne wuka fati̱mi wu a chire di̱bwa̱le a si̱ka lomi. Yinu mi̱n ne chabti̱tu ma si̱ki̱nditu we.

⁷ Yinu wu a mure, a ke ki̱mi̱ne ko, yingleyuwe! Aya n tu n yinge kwa̱ru. Mi̱n n ti bwesi̱m mi̱mu ni̱n dada. Ne ma yin yingle bwiyu ma ni̱n ti̱kan chi.

⁸ Mi̱n fwa chimi̱nu, kasi no a ne kunnu ka ni ti̱kan chi, di̱ne n ki̱n fati̱ki̱ne, ka kunnu ka nidu di̱ne ke di̱n ki̱nu a kaiya duwe.

⁹ “Di̱ne ye mi̱n yi chi̱nu mi, ti̱bi̱u ka ni chi̱nu, ti̱bau ta yaadu, ti̱bu kwa̱ru n Kwama ka wudi̱du.

¹⁰ Nii wu a ma di̱bi̱de ka ya ni ki̱ku, nii wu a bau chiye ka yaadu, wa bu kwa̱re ni̱bu ka wurki̱mi̱nu.

¹¹ “A ne nii we tibe chi̱n Tebubu, wu ka bwe ko a bi̱u ki̱n chi̱nge, yinu n ki̱n ka ni ki̱n soonga?

¹² Ka mwan ni ki̱n ki̱na yo n ki̱n a bi̱n fara?

¹³ Ka n ti̱n ni̱bu bwilamu ti̱yim yinangu ta ni bwesi̱m chimu chi a leletange, a mwintuwe ta swaanu yinangu ka n Te chi̱n wu a diye ka ni ni̱bu bi̱bu a bi̱u ki̱n Fi̱ki̱m bi̱bi Wauwadi̱me.”

Yesu ti Mai ki̱fi̱btiye

¹⁴ Wuka di n Yesu a chaku ki̱fi̱bti wu ki̱dang fwaki̱ya̱mange we ni, yo ki̱fi̱be chire, naba nii a fwa ya̱m. Muraki̱ku a ka̱ta̱n.

¹⁵ Yinu, bi̱kamu we ni̱bu bi̱bu a yi ko, ti̱tu nangang Bayalsebul n ki̱n tikake Mai ki̱fi̱bti nang wu a ni ki̱n dukan di̱du ki̱ chaki̱n ki̱fi̱btine.

¹⁶ Bi̱kamu ki̱baddu ka swe Yesu. Yinu n chi a yi ki̱n ko, “Ma ti̱kan chi ti̱tu a ka̱ta̱ki, ke a yung dukan Kwamanu we ware ti mun.”

¹⁷ Yinu, n Yesu a swaan ti̱kuran chitu, a yi chi ko, “Yaa wu a yaran dutu chite ka yaru. Yinu lo wu a yaran dutu chite ka yar ti̱nu.”

¹⁸ Ka Setan a yaran bali̱ntii turabe, ki̱kula yichi, yinu yaa ko ne tidu. Ti̱yi ko yi dukan Bayalsebul mi̱n chaku ki̱fi̱bti.

¹⁹ Ka ki̱ni dukan Bayalsebul mi̱n chaku ki̱fi̱btiye yinu miyari̱m chimude? N chi ki̱chaki̱di ki̱ni dukan wuren? Miyari̱m chimu nang ni̱bu ka ma chimi̱n mwata ki̱ki̱mu.

²⁰ Aya, ka ki̱ni dukan Kwamanu mi̱n chaku ki̱fi̱btiye, a yung Yaa Kwama a be tibe chi̱n.

²¹ Ka naba dukane a do bwi kiye, ki̱to loko yinange, kuli̱n ki̱nu a swi.

²² Aya ka wuka nii wu a la ki̱ni dukane a be chau ki̱la we di̱ki̱ne, ka yitu kuli̱n ki̱nu, di̱du a yon ni̱ri̱nu, yinu ka kerati̱ kuli̱nu.

²³ “Wu a ne we ware ti mi̱ne, ki̱kuladu n ti mi̱n, wu a makaibu murki̱ke, ki̱yaiyuyaiye.”

Ki̱laki̱ ki̱fi̱bti yi bwilai

²⁴ Ka ki̱fi̱bti a chir we bwi niye, ki̱bwa̱ladu we fanti yi kusiyu, ki̱bau fii fi̱kake, ka a yaabe ki̱yidu ko, ma ki̱lati̱ lo mang chir mi̱ne we.

²⁵ Yo a ki̱lange a be ya lo a fi̱ri dandan a ki̱bti̱n.

²⁶ Yinu, ka ki̱ladu ka twa̱ke yikai ki̱fi̱bti yidibin yi a la ki̱n ki̱ni bwilayu n chi ka bedu ka le ni wu, n chi ka swedu we fiko. A kuteng ki̱ku da ko ka kayadu ka la wu ferediye.

²⁷ Yo n Yesu yaki̱ fwa ya̱m bi̱be, yinu wuka naye we tibe murake, a kuku keru, a yi ko, “N Kwama a dela naye a bi̱ne ti wu a ka̱ri̱ne.”

²⁸ N Yesu a yi ki̱n ko, “Aya delaki̱ku a la chi a ni̱bu ki̱nwe ya̱m Kwamamu, ki̱tum ti̱di̱mu.”

Di̱mwal Yunusa

²⁹ Yo ni̱bu a mwe ki̱lwewe chiye, yinu n Yesu a mwe ki̱fwadu ko, “Di̱kalan di̱du di̱bwilan. N ti̱n ti̱badu mang yung chimi̱n di̱mwal chi ka̱ta̱kin, ke ti̱yim n Kwama a twiye. A ne di̱kan di̱mwal di̱du ta yadi̱nu we, a ya ta ya di̱mwalu yinang di̱Yunanangu.”

³⁰ “Yinangu n yunana a kau di̱mwal we ni̱bu Ni̱ni̱bemu, Bwe Nii ka kau di̱mwal we ni̱bu di̱kalan di̱di̱nu.”

³¹ We di n Kwama ka ma mwataki̱ke, Sarauniya Cheba ka kunnu wa̱re n ti ni̱bu di̱kalan di̱di̱mu, ka yung chidu ko n chi a mabu yinang. N ki̱n a chire kutan, a be ka nwe yungki̱ kassan Mai Solomon. Aya wu a be a la Solomon we n ti chi̱n.

³² We di n Kwama ka ma mwataki̱ke, ni̱bu Ni̱ni̱bemu n chi ka kunnu n ti ni̱bu di̱kalan di̱di̱nu, ka yung chidu ko n chi a mabu yinang, di̱ne n chi a wo ki̱ti̱mu we a di̱mwar Yunanangu. Aya, ti̱da̱ng, wu a la Yunana we fi.

Fiti̱la bwiye

³³ “A ne nii ka mwa fiti̱la ka laiya bura we ka, ka suntu ki̱ti̱nge. Aya ka yo da ti̱du ke ni̱bu ki̱lewe di̱mu a kuudi.

³⁴ Kwalangemo nang chi mun kuun diye. Ka kwalangi mwiyu ki̱ni li̱mange, bwi mwiyi kwang ka ri du ki̱ni yiki̱ku. Aya ka kwalangi mwiyu a ne li̱mang wenge, yinu bwi mwiyi kwang ka kwala yiki̱ku.

³⁵ Ti̱kur yiki̱ku we di̱munangu n ke ki̱liki̱liye.

³⁶ Ka bwi mwiyi kwang a ri ki̱ni yiki̱ke, a ne wuka ki̱swi ki̱liye we, yinu mwang ridu ki̱ni yiki̱ku, a kau yinangu chi yiiku ki̱yii munangu.”

N Yesu a wela ni̱bu Farisamu n ti ni̱bu yungki̱ yili̱ni̱mu

³⁷ Yo n Yesu a ri fwaku ya̱mange, yinu wuka naba Farisa a yale Yesu ko, a be loko ke a chau chabtu. Yinu n Yesu a ya swe ki̱yam chabti̱tu.

³⁸ Yo naba Farisa a wu a ya batisma a ku Yesu a nurbu fa̱liye, yinu ka mwe chaku chabti̱te, n ki̱n a ka̱ta̱n.

³⁹ N Tewuduwe a yi ki̱n ko, “Ti̱n ni̱bu Farisamu, ti̱nur kuteng kwa̱se n ti cibe. Aya mure chi̱n ki̱ni bwila.”

⁴⁰ N ti̱n ni̱bu bi̱kusi̱m! N Kwama a yo fi̱lange n ketu wu a yo murenga?

⁴¹ Ti̱ni babumbi̱bu chi a mure a kwa̱se n ti cibe. Yinu, nang chi ka kau mi̱n fiti̱la we kakku Kwamangu.

⁴² “A no chi̱n, ni̱bu Farisa. Ti̱chaku ki̱ti̱me we kuli̱n lambu yinang kwekwe n ti fule. Aya n ti̱tabu yile wu a ya̱m Kwamame n ti mi̱laku Kwamangu. Ti̱tu nang chi a no dakan ta maditu, a dakabu ta du ti̱kantu.”

⁴³ “A no chi̱n, ni̱bu Farisa. Ti̱ke ni̱bu ka ni chi̱n dwiyentu n ti fanti yi sweri yidui we muraki̱ku. Yinu ti̱ke ni̱bu kani̱n sii chi̱nu a kwa̱ma̱ri.”

⁴⁴ “A no chi̱n, ni̱bu Farisa. Ti̱n yinang futu ti̱tu ni̱bu ki̱yaduwe a yimbitu.”

⁴⁵ Yinu wukane we a naba yungki̱ yili̱n Musante a yi Yesu ko, “Naba yungku, ka mun fwa yiko, n tuti̱ ni̱n.”

⁴⁶ N Yesu a yi naba yungku yili̱ni̱nmu ko, “A no chi̱n, ti̱n ni̱bu yili̱n, ti̱dui ti̱tu ni̱bu a yimbu tunditu. Aya n chi̱n ta chaki̱bu kang yilang tiko ke ni̱bu a fi̱kan.”

⁴⁷ “A no chi̱n, di̱ne ti̱muba ka futu fa̱kubu n ti bi̱bu tukebu chimu feredi a chibeni̱mu.”

⁴⁸ A yung n chi̱n ti̱ke ki̱ni chi tukebu chimu a maatu, n chi a chi̱u, yinu n chi̱n ti̱muba futu chi̱ntu.

⁴⁹ Di̱ne ti̱tu, n Kwama, we kassan ki̱tu, a yi ko, “Man tum chimi̱n fa̱kubu n ti fandubu. Yinu, ni̱bu ka chi̱u bi̱kam chimu, bi̱kamu ka nwe riye.”

⁵⁰ Di̱ne yiko, n Yesu a yi, “Di̱kalan di̱du ka ya mwata ki̱ku a di̱ne kurki̱ ki̱tum fa̱kubu Kwamami kwang, ki̱ku n chi a mangu a mwetuwe ki̱dangu ti̱ti̱nitu a mwe mi̱nangu.”

⁵¹ A mwe a ki̱tum Abilamu a lanti̱n Sa̱kariya, wu ni̱bu a chi̱u a mure Kan Kwamanu ki̱dwan n ti fii wauwade. No, mi̱n fwa chimi̱nu, n Kwama ka ma di̱kalan di̱du mi̱n mwataku we ti̱ti kwang.

⁵² “A no chi̱n n ti̱n ni̱bu yungku yili̱n Musanti̱mu, chi̱ni ki̱ni masoli yingku Yaa Kwamangu, aya n ti̱ni̱n ti̱fwan ta lebu. Yinu, ti̱da̱ngti̱ ni̱bu bi̱bu ki̱baddu ka le diimu.”

⁵³ Ki̱swi n Yesu a du fiko, ni̱bu Farisamu n ti ni̱bu yungku yili̱n Musati̱mu a mwe ki̱ko ki̱nu. N chi ki̱mi̱ku ki̱nu ki̱ni ti̱bi̱di̱ritu we chitu nabwen.

⁵⁴ N chi ki̱baddu ka si ki̱mi̱n la̱n, di̱ne ke fwa chitu a lebitu, wu ka yodu n chi ka tan ki̱nu ki̱ni ki̱letu.