Filimon 1 - Bwaki Kifwiyang

Di̱siir Bulus

¹ M mi̱n nang Bulus, wu a kange, di̱ne nangangu mi̱n ma Yesu Masiya mi̱ndangu, mi̱n n ti ke chire n Timoti ni̱n mwal mi̱nu Filimon. Mun fate wu yile we nangang Kwamangu.

² Ni̱n si Afiya wuwiye chire a wa̱re bunti̱ke n ti Arkibu wu ni mwa ya̱m Kwamamu ware yinange. Ni̱n siiti̱ bi̱kamu ni̱bu bunti̱ki̱mu ki̱si Kwama a lomomu.

³ Kwama Techire n ti Tewuduwe n Yesu Masiya a yo chimi̱n delaku, a niti̱ chi̱n li̱me n ti li̱mangu we ni̱tu chi̱ntu.

Mi̱laku n ti keku bi̱yili̱mang Filimonang

⁴ Mi̱n wana Kwama kwadu di̱ne mun we twa̱ba̱ku mangu,

⁵ Nangki̱n mi̱n nwe ya̱m keku bi̱yili̱mang mwangu we di̱Yesuwe n ti mi̱laku ni̱bu Kwamamu.

⁶ Twa̱ba̱ku mangu mi ke kunkaku changu n ti bi̱kamu a ti yinang yinang ke n swaan chi ti̱yilitu n chi̱ni ki̱n a di̱Yesu Masiya.

⁷ Mi̱laku mwangu kemi a yomi furi mwenu nabwen ti ruku di̱ne ta yo ni̱tu ni̱bu bunti̱ki̱mitu a twa̱bi buke.

M Bulus a bau makaku di̱ne Onisimu

⁸ Di̱ne yiko, Mi̱ni ki̱ni runni kwing a di̱n Masiya, mang ya̱nu mi ma ti̱tu a dakan mwang maditu.

⁹ Aya m babban di̱ne mang mi̱lane, kasi ki̱ku m mi̱n Bulus mang ka̱ra̱nangu, ki̱ka̱ng mi̱na di̱bi̱nti̱le di̱ne Yesu Masiya.

¹⁰ Mi̱n babbanu di̱ne bwemi n Onisimu we di̱n Yesunu wu mang kau Te ki̱n yo a kwai a di̱bi̱nti̱le.

¹¹ Feredi n ki̱n nii wukuse we di̱mune, aya ki̱ka̱ngu a kau nii wuyile we di̱ chiniye.

¹² Mi̱n tungmi̱nti̱ ki̱nu we ki̱ka̱ngu, m mi̱la ki̱n yinang.

¹³ A no mi̱n baddu ka swedu ware we fi ke a nang makayu yo mi̱n we mi̱n ma di̱mwaru we kange ke a nang mami nangangu yo mwang newe.

¹⁴ Aya mang babu mang ma chi n ke ki̱kemo, di̱ne ke li̱memo a kau wu a ki̱ke ni̱r mune n ke wu a dukane.

¹⁵ Ka kanodu n Kwama a du Onisimu, a yikan we di̱mune, a baki̱swi bayim ko, ke a ki̱lawe a swe n ti mun ki̱diya kwadu.

¹⁶ Ki̱kangu n ki̱n n ke ka̱be aya a ke ka ka̱be, di̱ne n ki̱n ke, wu a bunti̱ke. M mi̱la ki̱n yinang, aya mun mwang mi̱la ki̱nu a la fiko.

¹⁷ Ka n da̱u mi̱n fate nangangemo, yiu ki̱n yinang ka mwang yiu mi̱nangu.

¹⁸ Ka n ki̱n a ma mi̱n wuka ki̱le, ka mun bunti̱ ti̱kan chiye, yo a dur mi̱n.

¹⁹ Mi̱na Bulus mi̱n mwal ya̱m bi̱bu mi̱ni̱n mi̱fwan, mang fe chi n Onisimu ki̱bumi̱n ti̱ni tu. Aya tabi̱du we mwi m makan, di̱ne mang yo mwang kau naba bunti̱ke.

²⁰ Kemi mi̱n wananu makai yiu Onisimu di̱ne Tewuduwe. Di̱ne m mun kemi wu a bunti̱ke, Ma chi ka li̱mai ni̱re.

²¹ Bi̱yili̱m m yim mwang ma kwa̱mbi̱r, tiyangu mang mwal ti̱tangu, m yim mwang ma chi a la ti̱tu mang bi̱bitu.

²² Chi a dub mang bi̱ditu nang ti̱tu. Do fi mang si̱ki̱nde, n yo ni̱ru mang chiru we di̱bi̱nti̱lu di̱ne twa̱ba̱ku changu, mang ki̱la bwa di̱chine.

Di̱siiru a swan mi̱ni̱n

²³ Abafaraditu, kelami ni̱n ware we di̱bi̱nti̱lu di̱ne di̱n Yesune, ki̱sintedu.

²⁴ Markus n ti Aristakus n ti Dimas n ti Luka fati̱bu nangang mumu ki̱siintedu.

²⁵ Li̱me Tewuduwe Yesu Masiya a swe n ti chi̱n.