2 Timoti 3 - Bwaki Kifwiyang

Riye di swan kute

¹ A dakan mwang yim ya̱m bi̱bu Timoti mwi diti swan kuteyu ka kau ki̱swi wu ki̱ni riye.

² Di̱ne ni̱tu ni̱bitu ka ki̱la bakku ka̱mbi̱rang n ti mi̱laku dutu chiyang. N chi ka ni̱n wer dutu chitu ko chi ma chi ti̱dui, kani̱n swa̱ba Kwama, ka ni̱n swa̱ba seli̱bu, a ne ma di̱wan a chi. A ne lwangang chiyang we n ti wauwade Kwama.

³ N chi a ne ki̱bune we, ki̱ko dokaku n ti ni̱bu, ni̱bu ti̱fwarani̱m, ni̱bu ni̱r di̱yanni̱n, bi̱bu a mi̱labu bi̱yili̱mu.

⁴ N chi ki̱ kwa̱l kebu chimu we fakwarbi̱bu, ki̱ma chi a dabitu a kurti̱bu bwilako, n chi ki̱da̱ngdu bi̱kamu ni̱bu a lambu chi. N chi ki̱mi̱la nwe ta̱me a la mi̱laki̱ Kwamangu.

⁵ N chi ki̱yungdu yinangu n chi ni̱bu Kwamamang, aya n chi a dubu dukan Kwamanu a ma nangangu we bwila chi. Wul mi̱n we duum ni̱bu bi̱bi̱mu.

⁶ Bi̱kamu we ni̱bu bi̱bu ki̱ butu ni̱bu, ki̱ le loniyu ki̱butu nati̱bu a rubi̱mu we ya̱m Kwamamu, bi̱bu ni̱tu a ma tureng we ki̱letimu. Bi̱bu ki̱doki a yo a kakki̱mu.

⁷ Duum bi̱bi kwadu ki̱ ku ya̱mu a fwiri. Aya a mebu a swirbu bi̱yili̱mu ya̱m.

⁸ Aya ni̱bu yungki̱m bi̱bu a ko bi̱yili̱mu yinangu n Yannes n ti Yambi̱re a ko ya̱m Musa mu, ni̱bu yungki̱m bi̱bu ki̱kur ka chi a muli̱ne, a bunti̱bu keku bi̱yili̱mang chirengu.

⁹ Aya n chi a ne ki̱ru kutan ki̱ni miyaku chiyangu, Wuka di ni̱bu ka swaan ti̱kwani chitu n ti di̱tu chitu.

Ki̱kure m Bulus a swan mi̱ne

¹⁰ Aya m mun Timoti, n yim chitu mi̱n miya ni̱bu mi̱nditu n ti dati̱miyu, n ti chi mi̱n kuradu mang maditu, n ti keku bi̱yili̱m mangu, n ti bwanumi, n ti mi̱laku mangu, yinu n ti mu ni̱re mi.

¹¹ N yim yinangu ni̱bu ki̱fummayu mi̱n nwe riyengu aya mang wulbu tayangu. N yim yinangu mang nwe riye we Antakiya n ti Yikoniya n ti Listi̱rangu. Ki̱ni yiko, n Kwama a yu mi̱n we riye.

¹² We bi̱yili̱mu, ka nang wuwule niye wu ki̱baddu ka yadu yinangu Kwama we di̱n Yesune ka nwe riye.

¹³ Aya ni̱bu bi̱bwilamu n ti bi̱bu ki̱kudu ko n chi ti̱kan chimu, ka chakakku kani̱n su bwila sube. N chi ka suddu kani̱n butu ni̱bu, n chi a ne swi ti̱nu we di̱buritu.

¹⁴ Aya muni̱n ti ki̱ri̱ng we chi mwang miyanitu. N tu yim mwi bi̱yili̱m. Di̱ne n yim mwi ni̱bu mwang yaan miyaki̱mu bi̱yili̱m ni̱bi̱m.

¹⁵ N ya miyaku ya̱m Kwamamu feredi yo no mwang tibu lwe niye. Ki̱ka̱ngu ya̱m Kwamamu a ni̱n kasantu n yim yinangu mwang ya yuku di̱ne keku bi̱yili̱mang a di̱Yesuwengu.

¹⁶ Ya̱m bi̱li̱mu ki̱ni kwang a be a di̱Kwama, ni ma nangangi ki̱n. We miyaku ni̱bangu n ti welaku ni̱bu a ma ki̱lemu n ti Kwabi̱ku bi̱bu ki̱le we wa̱remu n ti miyaku ke ni̱bu a ma chi a daatu.

¹⁷ Di̱ne ke naba nanga Kwama a do bwiyu a ma kasi no ki̱ki̱le nangi̱n ki̱yilang.