2 Timoti 2 - Bwaki Kifwiyang

Naba ki̱rannge Masiya wu yile

¹ Bwe mi Timoti m Mi̱lan, ti ki̱ri̱ng we li̱me wu n Kwama a ni̱n a di̱n Yesu Masiyane.

² N nwe yinangu ya mi̱n miya chi ni̱bu nabwen a ke ki̱ne. Miya ni̱bu ka medu ka ma nangang ki̱ni ya̱m bi̱bi̱mumi̱n ya̱m bi̱yili̱mu.

³ Mu ni̱ru we nwe riye yinangu mang muwangu, yinang naba ki̱range wuyile wu Yesu Masiya.

⁴ We tiku mwangu ki̱ku a naba ki̱range wu yile Masiyangu, kedu chi ka da̱u ti̱kuran mwite we, ka fwe yiko, a ne mwang ma nii wu a yali̱nemi̱n chi ki̱badde.

⁵ Ti̱bunti̱ yili̱n Kwamatu we maku nangang ki̱kangu, yinangu bi̱bu ki̱ swa̱ka̱ bananimu a ne chau ki̱la, a mwituwe ka bunti̱n yili̱ntu.

⁶ Naba kuwe a ma nangangu yinange, nang ni a no dakan ka mwedu ka chau li̱mang kuwange.

⁷ Ma ti̱kuran we chi mi̱n fwaditu, N Tewuduwe ka ni chi̱n swaanki̱ku we ya̱miyu ki̱ni kwang.

⁸ Tabbi̱du Yesu Masiya we wu ni̱bu a bi̱u a di̱kur Lon Dauda ne. N Kwama a kukku ki̱n we fure. Bi̱bu nang ya̱mu mi̱n fwadi̱mu.

⁹ Aya di̱ne mi̱n fwa ya̱m bi̱be, mi̱n nwe riye wu ni̱bu a kwabai ti̱n ki̱ni maki̱lan yinang ni wubwila. Aya a ne ni ka kwau ya̱m Kwamame we.

¹⁰ Di̱ne yiko m mi̱n m mu ni̱ru mang tur kasi wuwule riye wu ka bedu ki̱ni yuku n ti dwiyen ki̱diya kwadi we bi̱bu Kwama a sutu chimu.

¹¹ Yam bi̱bu ya̱m bi̱yili̱m: Ka ni bwa ware n ti ki̱ne, ni swe ti̱nu ware n ti ki̱n.

¹² Ka ni mu ni̱ru we riye, ni ma mati̱ntu n ti ki̱n ware yinang mati̱m. ka ni yi ko niyang yimbu ki̱ne, n ki̱n ka koti̱ chi̱ni.

¹³ Ka ni a tumbu bi̱yili̱me, yile a sutebu we di̱ki̱ne n ki̱n a ne mwe dur ki̱nu mi̱n ti̱kwanitu.

¹⁴ Kur ka nang wuwule niye mi̱n ya̱m bi̱bu, yi chi we di̱n Kwamanu mwi a du tukaki̱kku a ti̱kwa̱li yii ti̱kusiyangu. Duum tukaki̱m bi̱bu bi̱kusi̱m. Ka kai bi̱bu ki̱nwedi̱mu.

¹⁵ Aya funti̱bwi li̱ma Kwama ni̱r yinangu a dakanang. Ti yinang ni ki̱ma nangangu a nwebu dibwi we nangang kange, ti̱nti̱ne nang miya di̱kwa̱l Kwamanu, sudu chi we.

¹⁶ Kedu ya̱mi yikusiyu n ti yiyu ki̱madu yinangu ni n ke naba Kwamayu we. Ya̱mi yiyu ki̱sudu ki̱kai ni yinangu n ke naba Kwama.

¹⁷ Duum ya̱mim bi̱bu ki̱ti̱radu yinang di̱nti̱le. N Yimeniya n ti Filetus n wetuwe ni̱bu bi̱bu ki̱fwa duum ya̱mim bi̱bi̱mu.

¹⁸ Ni̱bu bi̱bu a du bi̱yili̱mu we, kiyi ni̱bu ko kunku futangu a tu a su. We ki̱swi wu, n chi a yo bi̱kamu ni̱bu nabwen a du wa̱re keku bi̱yili̱mange.

¹⁹ Aya ni̱bu Kwamamu yinang tame wu a ne mi̱kade. Ya̱m Kwamamu a mwal ko, “N Kwama a yim bi̱ki̱mu,” Ti̱nti̱ne n ki̱n wu ki̱ ngau kwiye ko n ki̱n wu Kwama, a du nangi̱n ti̱bwilaitu.

²⁰ We lo naba kuliye, yikayu kutai a ma ki̱ni si̱nariya n ti asurfa yinu yikayu a ma ki̱ni tini n ti swani. Kuli̱n di̱yili̱nu a yo di̱ne diti yei ka di mabwiye. Aya kuli̱n tini̱nu n ti di̱du a swani̱nu a yo ki̱n di̱ne diti yikusi.

²¹ Ka n du yimwiyu yinang Kwama, mwang kau kuli̱n di̱du n Kwama ka ma nanga ki̱ni̱n. Di̱ne yiko, wu ka du yikiyu yinang Kwama, ka kau kuli̱n nangang di̱yili̱n a ki̱swi a dakane. Dako kanodi wauwad, Tewuduwe ka nwe ta̱ma̱ng, di̱ne n ki̱n a do bwi ka ma chi a dakane.

²² Wulmi̱n we kasi no ti̱ti̱le chi ti̱tu ki̱yo duum kubeki̱mu a kal tayonitu. Funti̱bwi tau nangang yilengu ki̱ni dukan, keku bi̱yili̱mangu n ti mi̱laku n ti li̱me. Ti̱ma fiswe fati̱ne n ti bi̱bu a ke bi̱yili̱m ki̱ni ni̱ri diini̱mu.

²³ Kedu bunti̱nu ni̱bu ki̱fumbwi a kana ti̱turan ti̱kusi ti̱tu ki̱yo ti̱kulanimu we.

²⁴ Aya naba nanga Kwama a dakabu kani̱n mana ti̱kulani n ti ni̱bu. N ki̱n a nang miya ya̱m Kwamamu yinangu a dakanang, a nang ma bwanu ki̱ni ni̱bu a ma bwari̱mu.

²⁵ Ki̱ni bubbuke ni̱re, miya ni̱bu mi̱n a swaan ya̱m bi̱yili̱mu. Ka n Kwama we ni chi ki̱swi ka wo ki̱ti̱me.

²⁶ Yinu yo ti̱kuran chitu ka ki̱lade, n chi ka chiru we la̱nu n Setan a tan chi̱nu ke a bunti̱ chi n ki̱n ki̱baddite.