1 Timoti 6 - Bwaki Kifwiyang

¹ Ni̱bu bi̱bu ki̱ma ka̱bimu a dakan ka ni ni̱bu chi dwiyentu ki̱ni kwang, di̱ne ke di̱n Kwamanu n ti miyaki̱ku a kaiyu di̱n Kwamanu we.

² Ka naba lomo ki̱ma bunti̱ke, swa̱ba̱di̱ ki̱n we di̱ne n ki̱n ke chire naba bunti̱ke, n ti ki̱ki yikongu, n chi a ma nangangi bobu di̱ne ti̱maka naba bunti̱ke. Chi a yo n ti̱n kanodi bobe di̱ne tebi̱lom chimu ki̱bunti̱ Kwama. Di̱ne yiko, makaku chiyangu a yung ki̱maka bi̱bu n chi a kem. Ti̱miya ya̱m bi̱bu ti̱yo ni̱bu a ma nangangi ki̱n.

Miyaku ti̱kwaniyang n ti kuli ti̱yili

³ Ka wuka nii ki̱yung wa̱re ti̱kwaniye, wu a kekabu ti yungku ki̱yilang ka a di̱n Yesu Masiya n ti tai Kwamaye.

⁴ N ki̱n ki̱kukku dur ki̱n a swaanbu chi. N ki̱n ki̱bau bi̱ngai n ti di̱kulan yiin wu ki̱bedu ki̱ni kati̱n, di̱kulan, ya̱m muli̱n, ti̱kuran ti̱bwilai wu ki̱bedu ki̱ni kayaku we ni̱bu ni̱ti̱tu a kayankayanemu, bi̱bu a kwalan bi̱yili̱mi̱mu n ti bi̱bu ki̱kamadu ko taiyu wa̱re yake.

⁵ N chi ki̱swanadi di̱kulan. Ni̱bu yungku ti̱kwanim bi̱bu a mebu a swaanbu bi̱yili̱mu n ti bi̱bu a lebi̱mu. Kasi no nang bi̱yili̱mu n ti ti̱kwanitu n chi a swaanbu. N chi ki̱ma miyaku chiyangu ko ke chi kau kuli̱m.

⁶ Aya da wa taiyi Kwamaye ki̱ni nabwe yake.

⁷ Aya niyan bebu ti̱ti̱nitu ki̱ni chi yinu ne ni yikadu ki̱ni ti̱kan chin.

⁸ Aya ka nii a ya chabti̱tu n ti kuli̱n di̱dori̱ne, ni ma bwa̱nu ki̱n.

⁹ Ni̱bu ki̱badu ka ma kulimu ki̱le ki̱sweku n ti la̱n yinu n ti nabwe di̱te n ti ti̱kuran ti̱kusi ti̱tu ki̱mar ni̱bu a riye n ti kayaku.

¹⁰ Di̱ne mi̱laku ka̱mbi̱rangu nan ti̱le ka bi̱bi̱le duum bwilame. Bi̱kamu ni̱bu a yo baku ka̱mbi̱rangu a kakku a twa̱ng we keku bi̱yili̱mangu yinu a kure yichiyu ki̱ni kayan ni̱re nabwen.

Ki̱kure m Bulus a swan mi̱ne

¹¹ Aya m mun naba Kwama kusuku we ti̱ti kwang, yinu betuwe tungku yile, taiyi Kwamayu, keku bi̱yili̱mangu, mi̱laku, muku ni̱rang n ti da wu buke.

¹² Ma di̱kulan di̱yili̱n di̱du a keku bi̱yili̱mange. Kwar ti̱kuritu ki̱diya kwaditu wu mwan ya yalku yo mwan wo ki̱ti̱m bi̱yili̱me we kakku ni̱bu nabwenangu.

¹³ We kakku Kwamangu, wu ki̱ni ka nan ti̱ti̱le chi ti̱kuriye n ti Masiya Yesu wu ki̱dangu a ti̱ya kakku Buntu Bilatu wa fwa bi̱yili̱mi siine, mi̱n ya̱nu ki̱ni dukan, siine.

¹⁴ Bunti̱ yilang ki̱ku yi der ka lami̱nti̱ ki̱swi ki̱laku Tewuduwe chire n Yesu Masiya,

¹⁵ wu n Kwama ka ki̱ladu ki̱n a ki̱swi ko, n Kwama delaku wu n ki̱kun nan tikake n ki̱n mai mati̱me n ti Kwama Tewuduwe tebu bi̱duume.

¹⁶ wu ki̱kun a bwabubwa yinu wu a ne sweda yiiki̱ki̱ku niyan kwati̱buwe, wu wuka nii a kuun bu we, ka ka kude. N ti̱u ki̱n dwiyetu n ti dukanu ki̱diya kwadu. Amin.

¹⁷ Yi bi̱bu ki̱ni kuli we ti̱ti̱nitu ki̱kangu mwi a kukki̱du duru we ka ka yo ni̱ru we kulitu, wu ka yarade, aya a yo ni̱ru a di̱Kwama, wu ka ni nii ka nan ti̱ti̱le chiye di̱ne nwe ta̱me chire.

¹⁸ Ni chi yilang a ma chi a lenge ke a kul we nangi̱n ti̱yili̱tu yinu a kabi butur n ti ni̱r niki̱n.

¹⁹ We ye, n chi ka mur dutu chin mi̱n kulitu yinang tame wu yi ki̱ri̱nge we di̱ti̱nu ki̱bedi̱nu ke n chi kwar ti̱kuri ti̱yili.

²⁰ Timoti, so chi a ni̱n ko nang da̱ngde. Dan yimwiyu we ti̱fwaran ti̱tu a ne taiyi Kwama wengitu, we chi a newe yiko ki̱yalu ko yingku.

²¹ Wu bi̱kamu ki̱fwaradu ki̱n yinu we yiko n chi a twa̱ng we keku bi̱yili̱mangu. Li̱me a swe ti chin.