1 Timoti 4 - Bwaki Kifwiyang

Ni̱bu ka du keku bi̱yili̱mang chiyangu

¹ Fi̱ki̱m Kwamamu a fwa kwa̱rikwa̱ri ko we di swan kute bi̱kamu ni̱bu ka du keku bi̱yili̱mang chiyangu ka bunti̱n yikai ya̱mi yi kusi yiyu a ki̱fi̱bti.

² Duum ni̱bu yungki̱m bi̱bu ni̱bu di̱bebelin n ti bi̱bu ki̱mwe ti̱kwanim. N chi ki̱yungdu yinang ni̱bu bunti̱ki̱m bi̱yili̱m, aya ti̱kuran chitu a bwa yinang yo makka a bi wure a twiyang.

³ N chi ki̱dang ki̱na yinu ki̱yi ni̱bu ko a chadu ti̱kan chabti̱we ti̱tu n Kwama a yo ko ni yibi ki̱ni di̱wan, n chini bi̱bu ni ke bi̱yili̱mu n ti bi̱bu a ke ka yim bi̱yili̱me.

⁴ Ka nang ti̱ti̱le chi ti̱tu Kwama a yotu a le, ni kodu ti̱kan chi we, ni yiu ki̱ni di̱wan.

⁵ Di̱ne n Kwama a yo chitu lele, yam Kwamamu n ti twa̱ba̱ki̱ chirengu a yo chabti̱tu a kabi wawadu we kakku Kwamangu.

M Bulus a su Timoti mi̱n fur

⁶ Ka n miya kebi̱bu mi̱n yam bi̱be Timoty, mwan kau naba nangang wuyile Yesu Masiya, wu a yim bi̱yili̱mu a duyen we keku bi̱yili̱mu n ti miyaku bi̱yili̱mangu mun bunti̱nangu.

⁷ Lekaduwe ki̱ni ya̱mi yi kusi yiyu a ne makaku weyu. Funti̱bwi ni ki̱swi mo a miyaku chi a da, wu ka yodu mwan ridu ki̱ni Fi̱ki̱m Kwamame.

⁸ A dakan mwang ma nanangu, di̱ne kasi no nang ni̱bu ki̱fwadu ko ni a mi̱ki̱ bwiyu di̱ne ki̱ma makaku. Aya mi̱ki̱ku bwiyangu a Fi̱ki̱m Kwamamu a la chi, ki̱maka ni we da ti̱ti̱niye n ti wu a diye.

⁹ Ya̱m bi̱bu ni̱bu ki̱fwadi kwadi̱mu ya̱m bi̱yili̱m, n ke chi ni ka ma di̱bi̱du we.

¹⁰ Ni̱n funti̱bwi ki̱ni nwe riye we nangangu, niko ke ni̱bu a ke bi̱yili̱mu, di̱ne yo ni̱re n ni̱n ni ki̱n a di̱Kwama wukure, naba yuke ni̱be, a la chi we bi̱bu a ke bi̱yili̱mi̱mu.

¹¹ Miya ya̱m bi̱bu, funti̱bwi tiki̱ri̱ng ke ka nang wuwule niye a swaan.

¹² Kedu wuka ni a swa̱ba̱nu we ko m mun bweti̱re. Ma chi ni̱bu bunti̱ki̱m ka bunti̱de we chi mun miyaditu, we dati mwiyu n ti mi̱laki̱ mwangu n ti keku bi̱yili̱mang mwangu n ti ni̱r di̱yili̱n munu.

¹³ Ka lami̱nti̱n yo mang yade, ni dukanu a kiku ya̱m Kwamamu we ni̱bu bunti̱ki̱mu, kum chi mi̱n ni̱ru, miya chimi̱n.

¹⁴ Dudu ki̱ti̱me wu mwan yiu we ya̱mu fakubi̱ a fwa a dur munim, yo kwa̱l ni̱bu bunti̱ki̱mu a yo mi̱n fa̱la̱ngu ki̱ni twa̱ba̱ke ke ma nangangu.

¹⁵ Ma nangangu ki̱ni yam bi̱bu fum ni̱ru madu ti̱kaliwe, ni̱bi kwang ka kudu mun sute dati yinangu Kwama a ke mwang kaddangu.

¹⁶ Lekaduwe a ti̱kan chi, yo nangang Kwamangu a kakku. Ti̱nti̱ne miya kana ya̱m Kwamami siin mwan yimi̱nu, ke yu yimwiyu n ti bi̱bu ki̱nweni̱mu.