1 Timoti 3 - Bwaki Kifwiyang

Tikaketi ni̱bu bunti̱ki̱me

¹ Bi̱bu ya̱m bi̱yili̱m. Ka nang wuwule niye wu ki̱baddu ka kau tikake ni̱be, ki̱bau nangang ki̱yilang.

² Tikake naba bunti̱ke Kwama siine, nang wu a ne ya̱m ki̱lem we dur ki̱ne. Nii wu a mabu ti̱kuliye, wu a mabu chi a kudiye, wu ki̱ma bwanu ki̱ni chi a ya ki̱ne, wu ki̱ma chi ni̱bu ki̱fwadu ko a da̱nge, wu a kobu ni̱be, wu ki̱miya ya̱m Kwamamu yinangu a dakanange.

³ N ke wu ka ma nori̱ne, n ki̱ni buk n ke naba kune, n ki̱n n ke dukan yiine, n ke naba mi̱kakwiye

⁴ Ni wu a me takki̱ longe, wu ki̱miya bwesi̱m ki̱mu mi̱nu yinangu ka ma nangangu ki̱ni ya̱m chimangu.

⁵ We bi̱yili̱mu, ka nii a mebu takki̱ lokonge, ka medu ka tau ni̱bu bunti̱ki̱ Kwamami yire?

⁶ Tikake naba bunti̱ke Kwama siine n ke wu wufwiye we bunti̱ke. Ti̱tu ka yo ki̱mi̱n ri̱kaku kano ki̱tati̱ wa̱re n Setan a yaan mwatake.

⁷ A dakan bi̱bu n ke ni̱bu bunti̱ki̱mi̱mu ka fwa chi a li̱me we dur ki̱nu. A lebi̱ bi̱bu n ke ni̱bu bunti̱ki̱mu ka swa̱ba ki̱nu. Ke ki̱la n chi a ma ki̱mi̱n chi a lebi ti̱tu ka yodu ni̱bu a ne nwe ya̱m ki̱mitu. Nang chi n Setan ki̱badde.

⁸ Ti̱nti̱ne Seli̱bu ni̱bu bunti̱ke Kwamamu siine ka maka ni̱bu, ka ni̱n ya dwiyentu we ni̱bu. A fwa ti̱nu ya̱mu we ying, a lekaduwe ti̱norantu, a madu mi̱kakwiye we.

⁹ Seli̱bu ni̱bu bunti̱ki̱m Kwamami siimu a dakan ni̱bu ki̱ni keku bi̱yili̱mang yinang, we ya̱m Kwamame.

¹⁰ We ka nang ki̱ki̱le sutuku Seli̱bu ni̱bu bunti̱ki̱m Kwama siine, ni̱bu a mwe a ya̱nti̱la̱n ka ni̱bu bi̱bu ka kau Seli̱bu ni̱bu bunti̱ki̱m Kwama siine. Ka a ne ti̱kan chi we dutu chinte, yinu chi ka ma nangang seli̱bangu.

¹¹ A fiwiine, nati̱bu chimu a kau ni̱bu makaki̱m, bi̱bu ki̱ya dwiyen we ni̱bi̱m, bi̱bu a mabi di̱bi̱di̱bi̱li̱m, bi̱bu ki̱tau dutu chim, bi̱bu ni̱bu a ke ki̱ni̱m a kaddu ni̱bu ti̱fwarim we, yiko ti̱n nati̱m chimu ka kadi da wile, n ke ni̱bu ki̱kem aya bi̱bu a tau dur chi yinange ki̱fumti̱bwi ki̱tum ti̱yili.

¹² Sele naba bunti̱ke Kwama siine ka kadu ki̱ni naye wiin, a mwituwe n ki̱n ka tau bwesi̱m ki̱mu n ti loko yinang.

¹³ Ni̱bu ki̱ma chi Sele naba bunti̱ke Kwama siine a dakan ka made, ka ya dwiyentu we ni̱bu. We yiko, n chi ki̱ya suku we keku bi̱yili̱mangu a di̱Yesu Masiyangu.

Nee keku bi̱yili̱m chirenge

¹⁴ N yo ni̱ru mang ya bwa di̱chine daatu, mi̱n mwal chimi̱nu di̱ne,

¹⁵ aya ka mang yabu ki̱swiye, a dakan mwang yindu yinangu a dakan mwang swedu n ti ni̱bu Kwamamangu, ni̱bu bi̱bu ki̱bunti̱ Kwama wukuremu. N ki̱n nang dukanu n ti si̱ki̱ku a tame wu bi̱yili̱mi̱nu.

¹⁶ A ne kamaku we chi ya̱r yiitu n Kwama a yo niyang swaan ya̱m ki̱mu a di̱Yesuwe ki̱ni dukani̱mu. N Yesu a be ki̱ni di̱ten bwin yinang ni, Fi̱ki̱m Kwamamu a yung ni ko n Yesu nang bwe Kwama. We kunku kangu a furangu, ni̱bu ti̱tumbi̱ri Kwamamu a ku ki̱n. Ni̱bu a fwa kunku kangu we kuuti. Ni̱bu a ke bi̱yili̱mu we di̱ki̱ne we ti̱ti̱nitu. N Kwama a da̱u ki̱n a yikan bwadiye ki̱ni dwiyen.