1 Timoti 2 - Bwaki Kifwiyang

Ki̱kure we da siiku Kwamange

¹ Mang mwedu man ngau chi mi̱n ki̱kuremi ti̱na twa̱badu ti̱na matu di̱wan di̱ne ni̱bi kwang.

² Di̱ne mati̱mu n ti bi̱bu ki̱ni dwiyenimi kwang a makani, ni fiswe li̱ma ki̱ni tai Kwamai n ti wauwade.

³ Ti̱tu a le ki̱li̱ma Kwama wu a yu niye bwi.

⁴ Wu ki̱bau ni̱bu kwang ka ya yuku ka swaanti̱n yam bi̱yili̱mu.

⁵ Nangki̱n, n Kwama wiin, fware Kwama wiin ti̱n, wu ka kwarka Kwama n ti ni̱be n ki̱n nang Yesu Masiya.

⁶ N Ki̱n a ni ti̱kuri kitu di̱ne ke n kawure a ya yuku, bi̱bu nang ya̱mu n Kwama a du nimi̱n ko niyang mwadu we ki̱swi wumu.

⁷ Di̱ne yiko n Kwama a suti a yo mi̱n naba di̱mwa̱re ti̱n, mi̱n fwa bi̱yili̱m mang mwebu ti̱kwani, n mi̱n naba yungke wa keku bi̱yili̱mang di̱ne bi̱bu n ke kuu ni̱bu Yafudame.

⁸ Di̱ne yiko, yo yata twa̱ba̱ buniye, ti̱twa̱ba̱n ki̱ni ni̱r ni̱bu Kwaman bi̱bu a ne dutu wem. Ka nang chikiye n ke ni̱bu ki̱ twa̱ba̱ buni ki̱ni ki̱fwini wuka niye ka kaiyan ni̱re ka kungakungam.

⁹ N ke nati̱bu a do kuli̱nu yinang kangu a dakanangu, di̱ne dibwi n ti taku durang ka kuli̱n sinariyane ka kali kwa̱ti̱riye.

¹⁰ Nang yung da nati̱bu a yiko n chi ki̱bunti̱ Kwamamu, a do yile chi ki̱ni nangi̱n ti̱yili ti̱tu a makaku ni̱bangi. Nang chi n Kwama ki̱bau nati̱bu ki̱bung ki̱mi̱nti̱di̱mu ka made.

¹¹ Yo kwartabu a le miyake, a dakan nati̱bu ka si ki̱tele chi kwing, a bunti̱ miyaki̱ku, a ma nangangi ki̱n.

¹² Mang kebu nati̱bu ka ti kwartabu mi̱n kakku ka ka miya chimi̱nde, n ti ki̱ki yikongu, n chi miyan a bunti̱ chi ni̱bu ki̱miyaditu.

¹³ Chi a yo ye di̱ne n Kwama a mwe a yo Adamu, yinu Awawu.

¹⁴ Nii wu n Setana a bute, n Awawu, n ke Adamu ti̱tu a yo ki̱letiyu a lewe ti̱ti̱nitu.

¹⁵ Aya n Kwama ka yu nati̱bu we yotiyu a bi̱beyu n ti fiswe chi wu a keku bi̱yili̱mange, mi̱laku, wauwade Kwama n ti takku durang.